මත්ද්‍රව්‍ය සම්බන්ධ විමර්ශනයකට අදාළව අත්අඩංගුවට ගත් 29 හැවිරිදි දෙදරු පියකු පොලිස් භාරයේ සිටියදී රෝහල්ගත කිරීමෙන් පසු මියගොස් ඇති අතර හෝමාගම පොලිස් ස්ථානයේදී ඔහුට පහරදී ඇති බවට පවුලේ සාමාජිකයෝ චෝදනා කරති.
මියගිය පුද්ගලයා කිරීවත්තුඩුව ප්‍රදේශයේ පදිංචි ඉෂාර හර්ෂකුමාර ලෙස හඳුනාගෙන ඇති අතර ඔක්තෝබර් 25 වැනිදා උදෑසන ඔහුගේ සුවදුක් විමසීම සඳහා හෝමාගම පොලිස් ස්ථානයට ගිය ඥාතීන්ට ඔහුට පොලිස් නිලධාරීන් විසින් පහර දී සිහිසුන් වී සිටි බව දැකගන්නට ලැබුණු බව ඔවුහු පවසති.
ඉෂාර මහතාට පහරදී ඇත්තේ ඇයි දැයි ඥාතීන් පොලිස් නිලධාරීන්ගෙන් විමසූ අවස්ථාවේදී පොලිසිය ඔහුට වෛද්‍ය ප්‍රතිකාර ලබාදීම සඳහා හෝමාගම මූලික රෝහලට ඇතුළත් කිරීමට පියවර ගත් බවත්, රෝහලට ඇතුළත් කරන අවස්ථාව වන විටත් ඔහු මියගොස් සිටි බවත් පවුලේ සාමාජිකයෝ චෝදනා කරති.
කෙසේ වෙතත් වැටලීමකින් පසු පොලිස් ස්ථානයට රැගෙන ආ සැකකරු හදිසියේ රෝගාතුර වී රෝහල්ගත කිරීමෙන් පසු මියගිය බව පොලිසිය පවසන අතැ මරණයට හේතුව තීරණය කිරීම සඳහා පශ්චාත් මරණ පරීක්ෂණයක් පවත්වන ලෙස හෝමාගම මහේස්ත්‍රාත් අධිකරණය නියෝග කර තිබේ. සිද්ධිය සම්බන්ධයෙන් හෝමාගම සහකාර පොලිස් අධිකාරිවරයාගේ උපදෙස් මත විශේෂ මූලික විමර්ශනයක් ද ආරම්භ කර ඇත.
