අධිකරණයේ බලතල, විධායකයේ බලය සහ මූලික අයිතිවාසිකම් පිළිබඳ නීතිඥවරුන්ගෙන් කරුණු
රජය විසින් යෝජනා කර ඇති “ත්‍රස්තවාදයෙන් රාජ්‍යය ආරක්ෂා කිරීමේ පනත් කෙටුම්පතට” එරෙහිව ගොනු කර ඇති පෙත්සම් 25ක් ශ්‍රේෂ්ඨාධිකරණය හමුවේ ඔක්තෝබර් 20 දින විභාගයට ගෙන තිබේ.
අදාළ පනත් කෙටුම්පත මඟින් අධිකරණයේ ස්වාධීනත්වයට, විධායකයේ බලතලවලට සහ ජනතාවගේ මූලික අයිතිවාසිකම්වලට ඇති විය හැකි බලපෑම් සම්බන්ධයෙන් පෙත්සම්කරුවන් වෙනුවෙන් පෙනී සිටි නීතිඥවරු කරුණු ඉදිරිපත් කළහ.
අගවිනිසුරු ප්‍රීති පද්මන් සූරසේන මහතා සහ අචල වෙංගප්පුලි, සම්පත් අබේකෝන් යන ශ්‍රේෂ්ඨාධිකරණ විනිසුරුවරුන්ගෙන් සමන්විත විනිසුරු මඬුල්ලක් හමුවේ පෙත්සම් විභාගය පැවැත්විණි.
නීතිපතිවරයා වෙනුවෙන් පෙනී සිටි අතිරේක සොලිසිටර් ජනරාල් නෙරින් පුල්ලේ මහතා අධිකරණයට දැනුම් දුන්නේ අදාළ පනත් කෙටුම්පතට එරෙහිව පෙත්සම් 25ක් ගොනු කර ඇති බවත්, ඒ පිළිබඳ තොරතුරු කථානායක කාර්යාලයට දැනුම් දී ඇති බවත්ය.
පෙත්සම්කරුවන් කිහිපදෙනකු වෙනුවෙන් පෙනී සිටි නීතිඥ හිජාස් හිස්බුල්ලා මහතා තර්ක කළේ, නීතිපතිවරයාගේ එකඟතාවකින් තොරව සැකකරුවන් මුදාහැරීමට මහේස්ත්‍රාත්වරුන්ට ඇති බලතල සීමා කිරීම මඟින් අධිකරණයේ බලතල දුර්වල විය හැකි බවයි.
පනත් කෙටුම්පතේ 27 සහ 28 වගන්ති මඟින් අධිකරණ නියෝගයකින් තොරව පුද්ගලයන් රඳවා තබා ගැනීමට ඉඩ සැලසෙන බව ද ඔහු පවසා ඇති අතර 59 වැනි වගන්තිය මඟින් ජනාධිපතිවරයාට අධික බලතල පැවරෙන බවත්, එය ආණ්ඩුක්‍රම ව්‍යවස්ථාවේ 3 සහ 4 වැනි වගන්ති සමඟ ගැටලු ඇති කළ හැකි බවත් ඔහු අධිකරණයට ඉදිරිපත් කළේය.
නීතිඥ හිස්බුල්ලා මහතා තවදුරටත් පෙන්වා දුන්නේ පොලිසියට පමණක් සීමා වී තිබූ අත්අඩංගුවට ගැනීමේ බලතල සන්නද්ධ හමුදාවන්ට සහ වෙරළාරක්ෂක දෙපාර්තමේන්තුවට ද ලබාදීමට පනත් කෙටුම්පතෙන් යෝජනා කර ඇති බවයි. එම බලතල ක්‍රියාත්මක කිරීමේදී පවතින ආරක්ෂණ ක්‍රමවේද මඟහැරී බලය අනිසි ලෙස භාවිත වීමේ අවදානමක් පවතින බව ද ඔහු සඳහන් කළේය.
එමෙන්ම, ආරක්ෂක අමාත්‍යාංශයේ ලේකම්වරයාට ඇතැම් ප්‍රදේශවලට පුරවැසියන් ඇතුළුවීම සීමා කිරීමට බලය පැවරෙන විධිවිධාන සම්බන්ධයෙන් ද ඔහු විරෝධය පළ කළේය. මතභේදයට තුඩු දී ඇති විධිවිධාන සම්මත කිරීම සඳහා පාර්ලිමේන්තුවේ තුනෙන් දෙකක බහුතර ඡන්දයක් සහ ජනමත විචාරණයක් අවශ්‍ය බවට තීරණය කරන ලෙස නීතිඥවරයා අධිකරණයෙන් ඉල්ලා සිටියේය.
හිටපු අමාත්‍ය මහාචාර්ය ජී.එල්. පීරිස් මහතා වෙනුවෙන් පෙනී සිටි ජනාධිපති නීතිඥ අලි සබ්රි මහතා සඳහන් කළේ ජාතික ආරක්ෂාව තහවුරු කිරීම වැදගත් වුවද, රාජ්‍යය ආරක්ෂා කිරීමේ ක්‍රියාමාර්ග මඟින් නිර්දෝෂී පුරවැසියන්ගේ අයිතිවාසිකම් උල්ලංඝනය නොවිය යුතු බවයි.
2019 පාස්කු ඉරිදා ප්‍රහාරවලට පෙර වවුනතිව්හි පොලිස් නිලධාරීන් ඝාතනය කිරීමේ සිද්ධිය උදාහරණයක් ලෙස ඉදිරිපත් කළ ජනාධිපති නීතිඥවරයා, එම සිද්ධිය සම්බන්ධයෙන් දෙමළ තරුණයන් දෙදෙනකු අත්අඩංගුවට ගෙන රඳවා තබා තිබූ නමුත්, පසුව සිදුකළ විමර්ශනවලදී එම ඝාතන පාස්කු ඉරිදා ප්‍රහාරවලට සම්බන්ධ කණ්ඩායමක් විසින් සිදුකරන ලද බවට කරුණු අනාවරණය වූ බව පැවසීය.
යෝජිත පනත් කෙටුම්පත යටතේ පුද්ගලයකු වසරක කාලයක් රඳවා තබාගෙන ඉන් අනතුරුව තවත් වසරක කාලයක් රක්ෂිත බන්ධනාගාරගත කිරීමට හැකි තත්ත්වයක් ඇතිවිය හැකි බවත්, එය ඇප පනතේ විධිවිධාන සමඟ ගැටලු ඇති කරන බවත් ඔහු තර්ක කළේය.
පනත් කෙටුම්පතේ 51 වැනි වගන්තිය සම්බන්ධයෙන් ද කරුණු ඉදිරිපත් කරමින් ජනාධිපති නීතිඥ අලි සබ්රි මහතා පවසා ඇත්තේ ජාතික ආරක්ෂාවට තර්ජනයක් ලෙස සැලකෙන රැස්වීම්, මාධ්‍ය සාකච්ඡා සහ වෙනත් ක්‍රියාකාරකම් තහනම් කිරීමට විධායකයට බලය ලැබිය හැකි මෙවැනි තීරණ ගැනීමේ බලය විධායකය වෙනුවට මහේස්ත්‍රාත්වරුන් සතු විය යුතු බව බවය.
පසුගිය සතියෙහි ජනාධිපති ලේකම් කාර්යාලය ආසන්නයේ පැවති විරෝධතාවක් සම්බන්ධයෙන් පොලිසිය මහේස්ත්‍රාත්වරයකුගෙන් නියෝග ලබාගත් අවස්ථාව උදාහරණයක් ලෙස ගෙන කරුණු දක්වා තිබුණු අතර මහජන සාමය සම්බන්ධ ගැටලු විසඳීමේදී අධිකරණයට කාර්යභාරයක් පැවරීමේ වැදගත්කම පෙන්වා දී තිබිණි.
නීතිපතිවරයා වෙනුවෙන් පෙනී සිටි අතිරේක සොලිසිටර් ජනරාල් නෙරින් පුල්ලේ මහතා අධිකරණයට දැනුම් දී තිබුණේ යෝජිත පනත් කෙටුම්පත මඟින් අදහස් ප්‍රකාශ කිරීමේ නිදහස සීමා කිරීමට රජයේ අරමුණක් නොමැති බවයි.
තවත් පෙත්සම්කරුවන් කිහිපදෙනකු වෙනුවෙන් පෙනී සිටි ජනාධිපති නීතිඥ එම්.ඒ. සුමන්තිරන් මහතා තර්ක කළේ මෙම පනත් කෙටුම්පත පවතින ත්‍රස්තවාදය වැළැක්වීමේ පනතේ අඛණ්ඩ පැවැත්මක් වන අතර, එමඟින් පුද්ගල නිදහස සහ අධිකරණයේ බලතල තවදුරටත් සීමා විය හැකි බවය. එමඟින් ආණ්ඩුක්‍රම ව්‍යවස්ථාවෙන් සහතික කර ඇති මූලික අයිතිවාසිකම් උල්ලංඝනය වීමේ අවදානමක් පවතින බව ද ඔහු අධිකරණයට කරුණු ඉදිරිපත් කරමින් පවසා තිබිණි.
අදාළ පනත් කෙටුම්පතට එරෙහි පෙත්සම් සම්බන්ධ ශ්‍රේෂ්ඨාධිකරණ විභාගය තවදුරටත් පැවැත්වෙයි.
