නඩුව නොවැම්බර් 18ට කල් යයි – සැකකරුවන් දෙදෙනකු අත්අඩංගුවට ගැනීමට ජාත්‍යන්තර රතු නිවේදන
ශ්‍රීලන්කන් ගුවන් සේවය සඳහා එයාර්බස් ගුවන් යානා මිලදී ගැනීමේදී සිදුවූ බව කියන මූල්‍ය අක්‍රමිකතා සහ මුදල් විශුද්ධිකරණය සම්බන්ධයෙන් පාර්ලිමේන්තු මන්ත්‍රී නාමල් රාජපක්ෂ මහතා ඇතුළු සැකකරුවන්ට එරෙහිව සිදු කළ විමර්ශන අවසන් කර ඇති බව අපරාධ පරීක්ෂණ දෙපාර්තමේන්තුව අද (14) කොටුව මහේස්ත්‍රාත් අධිකරණයට දැනුම් දී තිබේ.
ඒ අනුව අදාළ සැකකරුවන්ට එරෙහිව අධිචෝදනා ගොනු කිරීමට පියවර ගන්නා බව ද අපරාධ පරීක්ෂණ දෙපාර්තමේන්තුව අධිකරණයට දැනුම් දී ඇත. මෙම නඩුව අද කොටුව මහේස්ත්‍රාත් පසන් අමරසේන මහතා ඉදිරියේ කැඳවනු ලැබූ අවස්ථාවේදී විමර්ශන නිලධාරීන් මෙම කරුණු ඉදිරිපත් කර තිබේ.
ඉදිරිපත් වූ කරුණු සලකා බැලූ මහේස්ත්‍රාත්වරයා නඩුව නොවැම්බර් 18 වැනිදා යළි කැඳවීමට නියම කළේය.
මෙම නඩුවේ සිව්වැනි සැකකරු ලෙස නම් කර ඇති පාර්ලිමේන්තු මන්ත්‍රී නාමල් රාජපක්ෂ මහතා එදින වන විට බන්ධනාගාරගතව සිටින්නේ නම් ඔහු අධිකරණයට ඉදිරිපත් කරන ලෙස ද මහේස්ත්‍රාත්වරයා බන්ධනාගාර අධිකාරිවරයාට නියෝග කර තිබේ. නාමල් රාජපක්ෂ මහතා මෙම නඩුවට අදාළව රුපියල් මිලියන 100 බැගින් වූ ශරීර ඇප දෙකක් මත මුදාහැර ඇති බව ද අධිකරණයේදී සඳහන් විය.
මේ අතර නඩුවේ පළමු සැකකරු වන කපිල චන්ද්‍රසේන මහතා මියගොස් ඇති බවට තොරතුරු ලැබී ඇතැයි අපරාධ පරීක්ෂණ දෙපාර්තමේන්තුව අධිකරණයට දැනුම් දී තිබේ. කෙසේ වෙතත් ඔහුගේ මරණ සහතිකය මෙතෙක් විමර්ශන නිලධාරීන් වෙත ලැබී නොමැති බව ද අධිකරණයට වාර්තා කර ඇත.
එමෙන්ම නඩුවට සම්බන්ධ ප්‍රියංකා නියෝමාලි සහ ෂමින්ද්‍ර රාජපක්ෂ යන සැකකරුවන් අත්අඩංගුවට ගැනීම සඳහා ජාත්‍යන්තර පොලිසිය හරහා රතු නිවේදන ලබාගෙන ඇති බවත්, ඒ අනුව ඉදිරි ක්‍රියාමාර්ග ගනිමින් සිටින බවත් විමර්ශන නිලධාරීන් අධිකරණයට දැනුම් දී තිබේ. ඒ අනුව නඩුවේ වැඩිදුර කටයුතු නොවැම්බර් 18 වැනිදා සිදු කිරීමට නියමිතය.
