පාස්කු ඉරිදා ත්‍රස්ත ප්‍රහාර සම්බන්ධ විමර්ශනවලට අදාළව අපරාධ පරීක්ෂණ දෙපාර්තමේන්තුව විසින් තමන් අත්අඩංගුවට ගෙන රඳවා තබා ගැනීමට එරෙහිව හිටපු රාජ්‍ය බුද්ධි සේවා අධ්‍යක්ෂ, විශ්‍රාමික මේජර් ජෙනරාල් සුරේෂ් සලේ මහතා ගොනු කළ පෙත්සමට අදාළව මැදිහත් වීමට අවසර ඉල්ලා ඉදිරිපත් කළ පෙත්සම් පිළිබඳ තීරණය ප්‍රකාශයට පත් කිරීම අභියාචනාධිකරණය ඔක්තෝබර් 22 වැනිදා දක්වා කල් දමා තිබේ.
අදාළ තීරණය අද (14) ප්‍රකාශයට පත් කිරීමට නියමිතව තිබුණ ද, එය ලබන 22 වැනිදා ප්‍රකාශයට පත් කරන බව අභියාචනාධිකරණ විනිසුරු මඩුල්ල පාර්ශ්වකරුවන්ට දැනුම් දී ඇත.
සුරේෂ් සලේ මහතාගේ පෙත්සමට මැදිහත් වී කරුණු දැක්වීමට අවසර ඉල්ලා මෙම පෙත්සම් ඉදිරිපත් කර ඇත්තේ බෙංගමුවේ නාලක හිමියන් ඇතුළු බෞද්ධ හිමිවරු ඇතුළු මැල්කම් කාදිනල් රංජිත් හිමිපාණන් සහ සිවිල් සමාජ සංවිධාන කිහිපයක් විසිනි.
පාස්කු ඉරිදා ත්‍රස්ත ප්‍රහාර සම්බන්ධයෙන් සිදු කෙරෙන විමර්ශනවලට අදාළව තමන් අත්අඩංගුවට ගැනීම සහ රඳවා තබා ගැනීම අභියෝගයට ලක් කරමින් සුරේෂ් සලේ මහතා අභියාචනාධිකරණය හමුවේ මෙම පෙත්සම ගොනු කර තිබුණු අතර මැදිහත් වීමේ පෙත්සම් සම්බන්ධයෙන් අධිකරණයේ තීරණය ඔක්තෝබර් 22 වැනිදා ප්‍රකාශයට පත් කිරීමට නියමිතය.
