බාල ඖෂධ නඩුවේදී නියම කළ රුපියල් මිලියන 275ක මුදල නොගෙවූ බවට ට්‍රාන්ස්පේරන්සි ඉන්ටර්නැෂනල් ශ්‍රී ලංකා චෝදනා කරයි
බාල ඖෂධ මිලදී ගැනීමේ නඩුවට අදාළව ශ්‍රේෂ්ඨාධිකරණය ලබාදුන් තීන්දුව අනුව රජයට ගෙවිය යුතු මුදල් ගෙවීමට අපොහොසත් වීමෙන් අධිකරණයට අපහාස කළ බවට චෝදනා කරමින්, හිටපු සෞඛ්‍ය අමාත්‍ය කෙහෙළිය රඹුක්වැල්ල මහතා ඇතුළු පස්දෙනකුට එරෙහිව ට්‍රාන්ස්පේරන්සි ඉන්ටර්නැෂනල් ශ්‍රී ලංකා ආයතනය ශ්‍රේෂ්ඨාධිකරණය හමුවේ පෙත්සමක් ගොනු කර තිබේ.
2026 මාර්තු 27 වැනිදා බාල ඖෂධ මිලදී ගැනීමේ නඩුවට අදාළව ශ්‍රේෂ්ඨාධිකරණය ලබාදුන් තීන්දුවේ නියෝග ක්‍රියාත්මක නොකිරීම සම්බන්ධයෙන් මෙම පෙත්සම ගොනු කර ඇත. එමගින් අධිකරණයට අපහාස කිරීමේ නඩුවක් ආරම්භ කර අදාළ වගඋත්තරකරුවන්ට එරෙහිව නීතිමය පියවර ගන්නා ලෙස ට්‍රාන්ස්පේරන්සි ඉන්ටර්නැෂනල් ශ්‍රී ලංකා ආයතනය ඉල්ලා සිටී.
අදාළ ශ්‍රේෂ්ඨාධිකරණ තීන්දුව මගින් හිටපු සෞඛ්‍ය අමාත්‍ය කෙහෙළිය රඹුක්වැල්ල මහතාට රුපියල් මිලියන 75ක් ද, සෞඛ්‍ය අමාත්‍යාංශයේ හිටපු ලේකම් ජනක චන්ද්‍රගුප්ත මහතාට, ජාතික ඖෂධ නියාමන අධිකාරියේ (NMRA) හිටපු සභාපති මහාචාර්ය එස්.ඩී. ජයරත්න මහතාට සහ එහි හිටපු ප්‍රධාන විධායක නිලධාරී වෛද්‍ය විජිත් ගුණසේකර මහතාට රුපියල් මිලියන 50 බැගින් ද රජයට ගෙවන ලෙස නියෝග කර තිබිණි. වෛද්‍ය සැපයුම් අංශයේ හිටපු අධ්‍යක්ෂවරයා ද පෙත්සමේ වගඋත්තරකරුවකු ලෙස නම් කර ඇත.
ඒ අනුව අදාළ පස්දෙනා විසින් රජයට ගෙවිය යුතු මුළු මුදල රුපියල් මිලියන 275කි.
බාල ඖෂධ මිලදී ගැනීමේදී අදාළ ප්‍රසම්පාදන ක්‍රියාපටිපාටි මඟහැර හදිසි මිලදී ගැනීමක් සිදුකිරීමේ අවශ්‍යතාව තහවුරු කිරීමට වගඋත්තරකරුවන් අපොහොසත් වූ බවත්, පෞද්ගලික සැපයුම්කරුවකුගෙන් ඖෂධ මිලදී ගැනීමට පහසුකම් සැලසීමේදී ප්‍රසම්පාදන ප්‍රමිතීන් උල්ලංඝනය කර ඇති බවත් ශ්‍රේෂ්ඨාධිකරණ තීන්දුවේ සඳහන් වූ බව ට්‍රාන්ස්පේරන්සි ඉන්ටර්නැෂනල් ශ්‍රී ලංකා ආයතනය පවසයි. එම ක්‍රියා හේතුවෙන් ආණ්ඩුක්‍රම ව්‍යවස්ථාවේ 12(1) වගන්තියෙන් සහතික කර ඇති නීතියේ සමාන ආරක්ෂාව ලැබීමේ මූලික අයිතිවාසිකම උල්ලංඝනය වී ඇති බව ද අධිකරණය තීරණය කර තිබිණි.
ශ්‍රේෂ්ඨාධිකරණය සහ සෞඛ්‍ය අමාත්‍යාංශය වෙතින් අදාළ ගෙවීම් සිදුකර නොමැති බව තහවුරු කරගැනීමෙන් අනතුරුව මෙම පෙත්සම ගොනු කළ බව ට්‍රාන්ස්පේරන්සි ඉන්ටර්නැෂනල් ශ්‍රී ලංකා ආයතනය සඳහන් කරයි. ගෙවීම් සඳහා නිශ්චිත කාලසීමාවක් නියම කර නොතිබුණ ද, අධිකරණ නියෝගය අනුව එම මුදල් ගෙවිය යුතුව තිබූ බව එම ආයතනයේ අදහසයි.
අදාළ නියෝග පිළිපැදීමට අපොහොසත් වීම, ඒවා නොසලකා හැරීම හෝ ප්‍රතික්ෂේප කිරීම අධිකරණයට අපහාස කිරීමක් බවට පෙත්සම මගින් චෝදනා කර ඇත. ඒ අනුව, 2024 අංක 8 දරන අධිකරණයකට, විනිශ්චය සභාවකට හෝ ආයතනයකට අපහාස කිරීමේ පනත සමඟ කියවිය යුතු ආණ්ඩුක්‍රම ව්‍යවස්ථාවේ 105(3) ව්‍යවස්ථාව යටතේ සුදුසු නීතිමය පියවර ගන්නා ලෙස ට්‍රාන්ස්පේරන්සි ඉන්ටර්නැෂනල් ශ්‍රී ලංකා ආයතනය ශ්‍රේෂ්ඨාධිකරණයෙන් ඉල්ලා තිබේ.
ශ්‍රේෂ්ඨාධිකරණ තීන්දු ක්‍රියාත්මක කිරීම නීතියේ ආධිපත්‍යය සහ රාජ්‍ය වගවීම තහවුරු කිරීම සඳහා අත්‍යවශ්‍ය බව ද ට්‍රාන්ස්පේරන්සි ඉන්ටර්නැෂනල් ශ්‍රී ලංකා ආයතනය සිය නිවේදනයෙන් අවධාරණය කරයි.
