අධිකරණයට අපහාස කිරීමේ වරදට නියම කර ඇති සිරදඬුවමේ ඉතිරි කාලය ක්‍රියාත්මක කිරීම සඳහා බන්ධනාගාරගත කර සිටින පූජ්‍ය ගලගොඩඅත්තේ ඥානසාර හිමියන්ට සිරකරු අංකයක් ලබාදී සිරකරුවන් සඳහා නියමිත ජම්පරය ලබාදී ඇති බව බන්ධනාගාර මාධ්‍ය ප්‍රකාශක සේනක පල්ලේතැන්න පවසා ඇත.
ඒ අනුව, ඥානසාර හිමියන්ගේ චීවරය ඉවත් කර සිරකරුවන් සඳහා නියමිත ඇඳුම අන්දවා ඇති බවද පවසා ඇති අතර ඥානසාර හිමියන් සාමාන්‍ය සිරකරුවන් රඳවා සිටින වාට්ටුවක රඳවා ඇති බවත් ඒ මහතා පවසා ඇත.
අධිකරණයට අපහාස කිරීමේ වරදට වරදකරු වීමෙන් අනතුරුව නියම කර ඇති සිරදඬුවමේ ඉතිරි කාලය ක්‍රියාත්මක කිරීමට අවශ්‍ය පියවර ගන්නා ලෙස අභියාචනාධිකරණය අද (5) බන්ධනාගාර කොමසාරිස් ජනරාල්වරයාට නියෝග කළේය.
අත්අඩංගුවට ගැනීම සඳහා නිකුත් කර තිබූ විවෘත වරෙන්තුවකට අනුව බන්ධනාගාර නිලධාරීන් විසින් ඥානසාර හිමියන් අද අභියාචනාධිකරණය හමුවට ඉදිරිපත් කිරීමෙන් අනතුරුව මෙම නියෝගය නිකුත් කර තිබේ. අධිකරණය හමුවේ ඉදිරිපත් වූ කරුණු සලකා බැලූ විනිසුරු මඩුල්ල, ඥානසාර හිමියන්ට නියම කර ඇති සිරදඬුවමේ ඉතිරි කාලය ක්‍රියාත්මක කිරීමට අවශ්‍ය පියවර ගන්නා ලෙස බන්ධනාගාර කොමසාරිස් ජනරාල්වරයාට නියෝග කර ඇත.
