හිටපු ජනාධිපති ආර්යා ශිරන්ති රාජපක්ෂ මහත්මිය ‘සිරිලිය සවිය’ සංවිධානයේ මූල්‍ය කටයුතු සම්බන්ධයෙන් සිදුකෙරෙන විමර්ශනයට අදාළව තමන් අත්අඩංගුවට ගැනීම වළක්වන ලෙස ඉල්ලා මාලිගාකන්ද මහේස්ත්‍රාත් අධිකරණය හමුවේ අපේක්ෂිත ඇප ඉල්ලුම්පතක් අද (5) ගොනු කර තිබේ.
ඇය වෙනුවෙන් නීතිඥවරුන් විසින් මෙම ඉල්ලුම්පත ගොනු කර ඇති අතර පොලිස් මූල්‍ය අපරාධ විමර්ශන කොට්ඨාසය (FCID) විසින් ‘සිරිලිය සවිය’ සංවිධානයට අදාළ මූල්‍ය ගනුදෙනු සම්බන්ධයෙන් ශිරන්ති රාජපක්ෂ මහත්මියගෙන් ප්‍රකාශයක් ලබාගැනීමට කටයුතු කරමින් සිටින අතර ඒ සම්බන්ධයෙන් විමර්ශනයක්ද ක්‍රියාත්මක වේ.
ශිරන්ති රාජපක්ෂ මහත්මිය මේ වන විට වෛද්‍ය ප්‍රතිකාර සඳහා සිංගප්පූරුවේ රැඳී සිටින අතර මීට පෙර මූල්‍ය අපරාධ විමර්ශන කොට්ඨාසය වෙත පෙනී සිටීම සඳහා අමතර කාලයක් ලබාදෙන ලෙසද ඉල්ලා තිබිණි.
ඇයගේ නායකත්වය යටතේ ක්‍රියාත්මක වූ ‘සිරිලිය සවිය’ සංවිධානයේ මූල්‍ය ගනුදෙනු සම්බන්ධයෙන් මෙම විමර්ශනය සිදු කෙරේ. ශිරන්ති රාජපක්ෂ මහත්මිය ශ්‍රී ලංකාවට පැමිණි පසු මෙම විමර්ශනයට අදාළව තමන් අත්අඩංගුවට ගැනීම වළක්වන ලෙසයි අපේක්ෂිත ඇප ඉල්ලුම්පත මගින් ඉල්ලා ඇත්තේ. ඉල්ලුම්පත සම්බන්ධයෙන් ඉදිරි නඩු කටයුතු මාලිගාකන්ද මහේස්ත්‍රාත් අධිකරණය හමුවේ සිදු කිරීමට නියමිතය.
