අධිකරණයට අපහාස කිරීමේ වරදට වරදකරු කර සිරදඬුවම් නියම කර ඇති ගලගොඩඅත්තේ ඥානසාර හිමියන්ට නියම වූ ඉතිරි සිරදඬුවම් කාලය ක්‍රියාත්මක කිරීමට අවශ්‍ය පියවර ගන්නා ලෙස අභියාචනාධිකරණය අද (5) බන්ධනාගාර කොමසාරිස් ජනරාල්වරයාට නියෝග කර තිබේ.
අත්අඩංගුවට ගැනීම සඳහා විවෘත වරෙන්තුවක් නිකුත් කර තිබූ ඥානසාර හිමියන් අද බන්ධනාගාර නිලධාරීන් විසින් අභියාචනාධිකරණය හමුවට ඉදිරිපත් කර තිබිණි. අධිකරණය හමුවේ ඉදිරිපත් වූ කරුණු සලකා බැලීමෙන් අනතුරුව, ඥානසාර හිමියන්ට නියම කර ඇති සිරදඬුවමේ ඉතිරි කාලය ක්‍රියාත්මක කිරීමට අවශ්‍ය පියවර ගන්නා ලෙස අභියාචනාධිකරණය බන්ධනාගාර කොමසාරිස් ජනරාල්වරයාට නියෝග කර ඇත.
මාධ්‍යවේදී ප්‍රගීත් එක්නැලිගොඩ අතුරුදන්වීම සම්බන්ධ නඩුවට අදාළව පැවති අධිකරණයට අපහාස කිරීමේ නඩු කටයුත්ත සම්බන්ධයෙන් අභියාචනාධිකරණය මීට පෙර නිකුත් කළ නියෝගයකට අනුව ඥානසාර හිමියන් අත්අඩංගුවට ගෙන තිබිණි. ඊයේ (4) අත්අඩංගුවට ගත් ඥානසාර හිමියන් කොළඹ අතිරේක මහේස්ත්‍රාත්වරයා හමුවට ඉදිරිපත් කිරීමෙන් අනතුරුව අද දක්වා රක්ෂිත බන්ධනාගාරගත කර තිබිණි.
එහිදී කොළඹ අපරාධ කොට්ඨාසයේ නිලධාරීන් අධිකරණයට දැනුම් දී තිබුණේ අභියාචනාධිකරණය, කොළඹ මහාධිකරණය සහ කොළඹ මහේස්ත්‍රාත් අධිකරණය විසින් ඥානසාර හිමියන්ට එරෙහිව වරෙන්තු නිකුත් කර තිබූ බවයි. ඥානසාර හිමියන් වෙනුවෙන් පෙනී සිටි නීතිඥ ඉරේෂ් සෙනෙවිරත්න සහ නීතිඥ පසන් කරුණාරත්න මහත්වරුන් සඳහන් කර ඇත්තේ තම සේවාදායකයා දැඩි මානසික පීඩනයකින් පසුවීම හේතුවෙන් ආරණ්‍ය සේනාසනයකට ගොස් එහි රැඳී සිටි බවයි.
එමෙන්ම 2019 පාස්කු ඉරිදා ත්‍රස්ත ප්‍රහාර සම්බන්ධයෙන් විමර්ශනය කළ ජනාධිපති කොමිෂන් සභාව ඥානසාර හිමියන්ට විශේෂ ආරක්ෂාවක් ලබාදීමට නිර්දේශ කර තිබූ බවද නීතිඥවරයා අධිකරණයට පෙන්වා දී තිබේ. ඒ අනුව, රඳවා සිටින කාලය තුළ උන්වහන්සේගේ ආරක්ෂාව තහවුරු කිරීම සඳහා අවශ්‍ය නියෝග නිකුත් කරන ලෙසද ඉල්ලා තිබිණි.
කරුණු සලකා බැලීමෙන් අනතුරුව කොළඹ අතිරේක මහේස්ත්‍රාත්වරයා ඥානසාර හිමියන් රක්ෂිත බන්ධනාගාරගත කිරීමට නියෝග කර තිබූ අතර, අභියාචනාධිකරණයේ පවතින වරෙන්තුව සම්බන්ධයෙන් අද එම අධිකරණය හමුවට ඉදිරිපත් කරන ලෙසද නියෝග කර තිබිණි. මීට අමතරව කොළඹ මහේස්ත්‍රාත් අධිකරණයේ පවතින වරෙන්තුව සම්බන්ධයෙන් ලබන බදාදා ඥානසාර හිමියන් එම අධිකරණය හමුවට ඉදිරිපත් කරන ලෙස බන්ධනාගාර නිලධාරීන්ට නියෝග කර ඇත.
