කොළඹ වරායේ නීතිවිරෝධී මත්ද්‍රව්‍ය අඩංගු බවට සැක කෙරුණු බහාලුම් දෙකක් සම්බන්ධයෙන් ජ්‍යෙෂ්ඨ නියෝජ්‍ය පොලිස්පති රන්මල් කොඩිතුවක්කු මහතාට ලැබුණු තොරතුරු මත ක්‍රියා කිරීමේදී පොලිස් නිලධාරීන්ගෙන් සිදුවූ බව කියන අතපසු වීම් සහ නොසැලකිලිමත්කම් පිළිබඳව විමර්ශනයක් සිදුකරන ලෙස පොලිස්පතිවරයා අපරාධ පරීක්ෂණ දෙපාර්තමේන්තුවට නියෝග කර තිබේ.
පොලිසිය නිකුත් කළ නිවේදනයකට අනුව අදාළ නිලධාරීන් හෝ වෙනත් සම්බන්ධිත ආයතනවල නිලධාරීන් කිසියම් පාර්ශ්වයකට වාසියක් ලබාදීමේ අරමුණින් කටයුතු කර තිබේද යන්න සහ එම ක්‍රියාකලාපය සම්බන්ධයෙන් අපරාධ චෝදනා ගොනු කිරීමට ප්‍රමාණවත් කරුණු තිබේද යන්න අපරාද පරීක්ෂණ විමර්ශනයේදී සොයා බැලීමට නියමිතය.
2026 අගෝස්තු 31 වැනිදා කොළඹ වරායේ බහාලුමකින් මත්ද්‍රව්‍ය තොගයක් සොයාගැනීම හා ඉන් අනතුරුව සිදුකළ විමර්ශන සම්බන්ධයෙන් අසත්‍ය තොරතුරු සංසරණය වීම හේතුවෙන් පොලිසිය මෙම පැහැදිලි කිරීම නිකුත් කර ඇති අතර පොලිසිය සඳහන් කර ඇත්තේ අගෝස්තු 14 වැනිදා ජ්‍යෙෂ්ඨ නියෝජ්‍ය පොලිස්පති රන්මල් කොඩිතුවක්කු මහතාට ශ්‍රී ලංකාවට ආනයනය කර ඇති නීතිවිරෝධී මත්ද්‍රව්‍ය අඩංගු බහාලුම් දෙකක් කොළඹ වරායේ CICT පර්යන්තයේ ඇති බවට තොරතුරක් ලැබී තිබූ බවයි. එම තොරතුර එදිනම පොලිස් මත්ද්‍රව්‍ය නාශක කාර්යාංශයට දැනුම් දී තිබේ.
කෙසේ වෙතත්, එම තොරතුර සම්බන්ධයෙන් ක්‍රියා කළ ආකාරය පිළිබඳව පසුව ගැටලු මතුවී ඇති අතර, අවශ්‍ය මට්ටමේ ක්‍රියාමාර්ග ගෙන නොතිබූ බවට කරුණු අනාවරණය වී ඇතැයි පොලිසිය සඳහන් කරයි. ඒ අනුව පොලිස්පතිවරයා විසින් පොලිස් විශේෂ විමර්ශන ඒකකයට අභ්‍යන්තර විමර්ශනයක් සිදුකරන ලෙස නියෝග කර තිබේ.
එම විමර්ශනය තවදුරටත් සිදුවෙමින් පවතින අතර, මේ දක්වා සිදුකළ පරීක්ෂණ මත ඉදිරිපත් කළ අතුරු වාර්තාවෙන් අදාළ නිලධාරීන් තම රාජකාරි ඉටු කිරීමේදී අසමත් වී ඇති බවට සහ නොසැලකිලිමත් ලෙස කටයුතු කර ඇති බවට කරුණු අනාවරණය වී ඇතැයි පොලිසිය පවසයි. අභ්‍යන්තර විමර්ශනයට අමතරව අපරාධ විමර්ශනයක් ද සිදුකළ යුතු බව එම අතුරු වාර්තාවෙන් නිර්දේශ කර තිබේ.
මේ අතර අගෝස්තු 22 වැනිදා මධ්‍යම අපරාධ විමර්ශන කාර්යාංශයේ උප පොලිස් පරීක්ෂක ඒකනායක මහතාටද එම මත්ද්‍රව්‍ය තොගය සම්බන්ධයෙන් ඔහුගේ පෞද්ගලික තොරතුරුකරුවෙකුගෙන් තොරතුරක් ලැබී ඇති බව විශේෂ විමර්ශන ඒකකයේ පරීක්ෂණවලදී අනාවරණය වී තිබේ. එම තොරතුර සම්බන්ධයෙන් අවශ්‍ය ක්‍රියාමාර්ග ගෙන ඇති අතර, අගෝස්තු 31 වැනිදා මධ්‍යම අපරාධ විමර්ශන කාර්යාංශයේ අධ්‍යක්ෂවරයා ඇතුළු නිලධාරී කණ්ඩායමක් කොළඹ වරායට ගොස් ශ්‍රී ලංකා රේගු නිලධාරීන් සමඟ එක්ව අදාළ බහාලුම විවෘත කිරීමට පෙර ස්කෑන් කිරීමට පියවර ගෙන තිබේ.
ඉන් අනතුරුව පොලිස් මත්ද්‍රව්‍ය නාශක කාර්යාංශයේ නිලධාරීන් පිරිසක්ද එම ස්ථානයට පැමිණ ඇත. ඒ අනුව මත්ද්‍රව්‍ය තොගය සොයාගැනීමේ මූලික කාර්යභාරය මධ්‍යම අපරාධ විමර්ශන කාර්යාංශය විසින් ඉටුකර ඇති බව අභ්‍යන්තර විමර්ශනයෙන් අනාවරණය වී ඇතැයි පොලිසිය සඳහන් කරයි.
මෙම තත්ත්වය යටතේ, මුල් තොරතුර සම්බන්ධයෙන් ක්‍රියා කිරීමේදී සිදුවූ බව කියන අතපසු වීම්, අඩුපාඩු සහ නොසැලකිලිමත්කම් පිළිබඳව සොයා බලා, කිසියම් නිලධාරියෙකු හෝ නිලධාරීන් පිරිසක් වෙනත් පාර්ශ්වයකට වාසියක් ලබාදීමේ අරමුණින් හිතාමතා කටයුතු කළේද යන්න තීරණය කිරීම සඳහා අපරාද පරීක්ෂණ දෙපාර්තමේන්තුව විමර්ශනය සිදුකිරීමට නියමිතය.
එම විමර්ශනයේදී අනාවරණය වන කරුණු මත අදාළ නිලධාරීන්ට හෝ නිලධාරීන්ට එරෙහිව අපරාධ චෝදනා ගොනු කිරීමට ප්‍රමාණවත් සාක්ෂි තිබේද යන්නද සොයා බැලීමට නියමිතය.
