අධිකරණයට අපහාස කිරීමේ වරදට සිර දඬුවමක් ලබමින් සිටින බොදු බල සේනා සංවිධානයේ ලේකම් ගලගොඩඅත්තේ ඥානසාර හිමියන් අත්අඩංගුවට ගෙන අධිකරණයට ඉදිරිපත් කරන ලෙස අභියාචනාධිකරණය අද විවෘත වරෙන්තුවක් නිකුත් කර තිබේ.
එම වරෙන්තුව ක්‍රියාත්මක කිරීම පොලිස්පතිවරයා හරහා සිදු කරන ලෙසද අධිකරණය නියෝග කර ඇත. එමෙන්ම ඥානසාර හිමියන්ට විදේශගත වීම වළක්වාලමින් සංචාරක තහනමක් පනවා ඇති අතර, ඒ සම්බන්ධයෙන් ආගමන හා විගමන පාලක ජනරාල්වරයා දැනුවත් කරන ලෙසද නියෝග කර තිබේ.
මෙම නියෝගය නිකුත් කර ඇත්තේ ඊයේ (සැප්තැම්බර් 30) කොළඹ මහාධිකරණය විසින් ඥානසාර හිමියන් අත්අඩංගුවට ගෙන අධිකරණයට ඉදිරිපත් කරන ලෙස වරෙන්තුවක් නිකුත් කිරීමෙන් අනතුරුවය.
ඉස්ලාම් ආගමට අපහාස වන ආකාරයේ ප්‍රකාශ සිදු කළ බවට එල්ල වී ඇති චෝදනා සම්බන්ධයෙන් ඊයේ කොළඹ මහාධිකරණ විනිසුරු බුද්ධික සී. රාගල මහතා ඉදිරියේ නඩුව කැඳවනු ලැබූ අතර එහිදී ඥානසාර හිමියන් අධිකරණයේ පෙනී සිටියේ නැත.
උන්වහන්සේ අසනීප තත්ත්වයෙන් පසුවන බව සඳහන් කරමින් වෛද්‍ය වාර්තාවක් ඉදිරිපත් කර තිබූ අතර, ඇපකරුවන් ද අධිකරණය හමුවේ පෙනී සිට නොතිබිණි.
ඥානසාර හිමියන් වෙනුවෙන් පෙනී සිටි නීතිඥ අශෝක වීරසූරිය මහතා නඩුව කඩිනමින් අවසන් කර ගැනීමට තම සේවාදායකයා අපේක්ෂා කරන බවත්, ඒ සම්බන්ධයෙන් නීතිපතිවරයා වෙත කරුණු ඉදිරිපත් කර ඇති බවත් අධිකරණයට දැනුම් දී තිබේ. කෙසේ වෙතත් ඉදිරිපත් කළ වෛද්‍ය වාර්තාව සම්බන්ධයෙන් සෑහීමකට පත්විය නොහැකි බව සඳහන් කළ මහාධිකරණ විනිසුරුවරයා, ඇපකරුවන් අධිකරණයට නොපැමිණීමද සැලකිල්ලට ගනිමින් අත්අඩංගුවට ගැනීමේ වරෙන්තුව නිකුත් කර තිබිණි.
ශුද්ධ වූ කුරානය සම්බන්ධයෙන් ඥානසාර හිමියන් සිදු කළ බව කියන ප්‍රකාශ ඉස්ලාම් ආගමට අපහාස කිරීමක් බවට චෝදනා කරමින් නීතිපතිවරයා විසින් දණ්ඩ නීති සංග්‍රහයේ විධිවිධාන යටතේ මෙම නඩුව පවරා තිබේ.
