ජනාධිපති සමාව අවලංගු කර ඇති පූජ්ය ගලගොඩඅත්තේ ඥානසාර හිමියන් අත්අඩංගුවට ගෙන අධිකරණයට ඉදිරිපත් කරන ලෙස අභියාචනාධිකරණය අද (29) වරෙන්තුවක් නිකුත් කර ඇත.
එම වරෙන්තුව පොලිස්පතිවරයා මගින් ක්රියාත්මක කරන ලෙසද අභියාචනාධිකරණය නියෝග කර තිබේ. ඒ අනුව ඥානසාර හිමියන් ඔක්තෝබර් 1 වැනිදා අධිකරණය හමුවට ඉදිරිපත් කරන ලෙස නියෝග කර ඇත.
ජනාධිපති සමාව අවලංගු කිරීමෙන් අනතුරුව ඥානසාර හිමියන්ට නියම වී ඇති සිරදඬුවම ක්රියාත්මක කිරීමට නියෝගයක් නිකුත් කරන ලෙස නීතිපතිවරයා විසින් ගොනු කළ මෝසම අද අභියාචනාධිකරණය හමුවේ කැඳවා තිබුණු අතර මායාදුන්නේ කොරයා සහ ලක්මාලි කරුණානායක යන විනිසුරුවරුන්ගෙන් සමන්විත විනිසුරු මඬුල්ලක් හමුවේ මෙම මෝසම විභාගයට ගනු ලැබිණි.
මෝසම කැඳවූ අවස්ථාවේදී ඥානසාර හිමියන් අධිකරණය හමුවේ පෙනී නොසිටි අතර, උන්වහන්සේ වෙනුවෙන් පෙනී සිටි ජනාධිපති නීතිඥ අනුර මැද්දෙගොඩ මහතා සඳහන් කළේ සිය සේවාදායකයා ශෛල්ය කර්මයක් හේතුවෙන් විවේක ගනිමින් සිටින බවයි.
මෝසම සම්බන්ධයෙන් අධ්යයනය කර කරුණු දැක්වීම සඳහා දිනයක් ලබාදෙන ලෙසද ජනාධිපති නීතිඥවරයා අධිකරණයෙන් ඉල්ලා තිබුණු අතර රජයේ නීතිඥ සජිත් බණ්ඩාර මහතා සඳහන් කළේ මෙය අපරාධ නඩු කටයුත්තක් බැවින් වගඋත්තරකරු අධිකරණය හමුවේ පෙනී නොසිටින්නේ නම් ඔහුට එරෙහිව වරෙන්තුවක් නිකුත් කළ යුතු බවයි.
ඉදිරිපත් වූ කරුණු සලකා බැලීමෙන් අනතුරුව අභියාචනාධිකරණය ඥානසාර හිමියන් අත්අඩංගුවට ගෙන ඔක්තෝබර් 1 වැනිදා අධිකරණයට ඉදිරිපත් කරන ලෙස නියෝග කර තිබේ.
