ෆේස්බුක් සටහනක් හේතුවෙන් සෞදි අරාබියේදී මරණ දඬුවම නියම වූ ශ්‍රී ලාංකික අනෝජන් සිවරාසාට එරෙහි නඩු කටයුතු සහ සියලු දඬුවම්වලින් ඔහු සම්පූර්ණයෙන් නිදහස් කර ඇති බවත්, ඔහු යළි ශ්‍රී ලංකාවට ගෙන්වා ගැනීමට අවශ්‍ය කටයුතු සූදානම් කරන බවත් විදේශ කටයුතු, විදේශ රැකියා සහ සංචාරක අමාත්‍ය විජිත හේරත් මහතා පවසයි.
සෞදි අරාබියේ පවතින සියලු නීතිමය ක්‍රියාමාර්ගවලින් නිදහස් වීමෙන් අනතුරුව අනෝජන් සිවරාසා මෙරටට ගෙන්වා ගැනීම සඳහා අවශ්‍ය සියලු පහසුකම් සලසන බව අමාත්‍යවරයා සඳහන් කළේය.
අනෝජන්ගේ ඥාතීන් ඊයේ (10) විදේශ කටයුතු අමාත්‍යාංශයට පැමිණ ඔහු නිදහස් කර ගැනීමට මැදිහත් වූ ජනාධිපති අනුර කුමාර දිසානායක මහතාට, විදේශ කටයුතු අමාත්‍යාංශයට සහ ඊට දායක වූ රාජ්‍ය ආයතන හා නිලධාරීන්ට සිය ස්තූතිය පළ කර තිබේ.
ජනාධිපතිවරයාගේ මඟපෙන්වීම, විදේශ කටයුතු අමාත්‍යාංශයේ රාජ්‍යතාන්ත්‍රික මැදිහත්වීම් සහ සෞදි අරාබි රජයේ හා අධිකරණයේ සහයෝගය හේතුවෙන් අනෝජන් නිදහස් කර ගැනීමට හැකි වූ බව අමාත්‍ය විජිත හේරත් මහතා පැවසීය.
එමෙන්ම දෙරටේ රාජ්‍යතාන්ත්‍රික දූත මණ්ඩල සහ නිලධාරීන් මෙන්ම නඩුවට සහාය ලබාදීම සඳහා සෞදි අරාබියට ගිය නීතිඥ කණ්ඩායම දැක්වූ දායකත්වය ද අමාත්‍යවරයා අගය කළ අතර ෆේස්බුක් සටහනක් මගින් අපහාසාත්මක අදහස් පළ කළ බවට එල්ල වූ චෝදනා සම්බන්ධයෙන් 2026 සැප්තැම්බර් 17 වැනිදා සෞදි අරාබියේ නැගෙනහිර පළාතේ අභියාචනාධිකරණයක් විසින් අනෝජන් සිවරාසාට මරණ දඬුවම නියම කර තිබිණි.
කෙසේ වෙතත් රාජ්‍යතාන්ත්‍රික සහ වෙනත් මැදිහත්වීම්වලින් අනතුරුව ඔක්තෝබර් 14 වැනිදා එම මරණ දඬුවම අහෝසි කිරීමට අධිකරණය පියවර ගත්තේය. ඉන් අනතුරුව ඔහුට එරෙහිව ඉතිරිව තිබූ දඬුවම් සහ නීතිමය ක්‍රියාමාර්ගවලින් ද නිදහස් කර ගැනීම සඳහා තවදුරටත් රාජ්‍යතාන්ත්‍රික මැදිහත්වීම් සිදුකර තිබේ. ඒ අනුව නොවැම්බර් 9 වැනිදා සෞදි අරාබියේ මහජන නඩු පැවරීමේ දෙපාර්තමේන්තුව මෙම නඩුව තවදුරටත් ඉදිරියට ගෙන නොයෑමට තීරණය කර ඇති අතර, එම තීරණයත් සමඟ අනෝජන් සිවරාසාට සම්පූර්ණ නිදහස හිමිව තිබේ.
