2019 අප්රේල් මස 21 වැනිදා පාස්කු දින එල්ල වූ බෝම්බ ප්රහාරය සම්බන්ධයෙන් කොළඹ ත්රිපුද්ගල මහාධිකරණයේදී අසන ලද නඩුවේ තීන්දුව දුන් දවසේම, එම විනිසුරු මඬුල්ලේ සභාපති නවරත්න මාරසිංහ, අභියාචනාධිකරණ විනිසුරුවරයකු වශයෙන් නම් කර ආණ්ඩුක්රම ව්යවස්ථා සභාවට දන්වා යැවීමට ජනාධිපති අනුර කුමාර දිසානායක පියවර ගත්තේය.
2026 සැප්තැම්බර් 22 වැනිදා සවස මේ නඩුවේ තීන්දුව දුන් අතර, එදිනම ජනාධිපතිවරයා විසින් මාරසිංහ විනිසුරුවරයා අභියාචනාධිකරණ විනිසුරුවරයකු ලෙස නම් කරනු ලැබීම විශේෂ සිදුවීමකි. ඔහුට අමතරව මහාධිකරණ විනිසුරු මංජුල තිලකරත්නද අභියාචනාධිකරණ විනිසුරුවරයකු ලෙස ජනාධිපතිවරයා විසින් නම් කරනු ලැබ තිබේ. මේ දෙදෙනාගේ පත්කිරීමට ආණ්ඩුක්රම ව්යවස්ථා සභාවේ අනුමැතිය ලැබිය යුතුය.
අභියාචනාධිකරණයේ විනිසුරු ධුර 4ක් දීර්ඝ කාලයක් පුරා හිස්ව තැබීම ගැන, ශ්රී ලංකා නීතිඥ සංගමයේ නියෝජිත පිරිසක් හමුවූ අවස්ථාවේදී ජනාධිපතිවරයා කීවේ, පාස්කු නඩුව අසන සභාපති විනිසුරුවරයා අභියාචනාධිකරණ විනිසුරුවරයකු ලෙස පත්කිරීමට බලාපොරොත්තු වන බවත්, පාස්කු නඩුව අවසන් වීමට පෙර එම පත්වීම කළොත් එයින් නඩුවේ කටයුතුවලට බාධාවක් වන නිසා, තීන්දුව දෙන තෙක් පත්කිරීම ප්රමාද කරන බවත්ය.
පොරොන්දු වූ පරිදිම, පාස්කු නඩුවේ තීන්දුව දුන් දවසේම ජනාධිපතිවරයා එම උසස්වීම මහාධිකරණ විනිසුරුවරයාට පිරිනමා තිබේ.
මීට පෙර නීතිපති දෙපාර්තමේන්තුවේ අතිරේක සොලිසිටර් ජෙනරාල් ලක්මාලි කරුණානායකද අභියාචනාධිකරණ විනිසුරුධුරයකට ජනාධිපතිවරයා විසින් පත්කරනු ලැබුවාය.
පුද්ගලයන් 279 දෙනකුට ජීවිතය අහිමි කළ හා විශාල පිරිසකට තුවාල සිදුකළ 2019 අප්රේල් 21 පාස්කු ඉරිදා සිදුවූ බෝම්බ ප්රහාරයට කුමන්ත්රණය කිරීම, ආධාර අනුබල දීම, පුපුරන ද්රව්ය හා ආයුධ එක්රැස් කිරීම, මිනිමැරීමට තැත්කිරීම වැනි ත්රස්තවාදය වැළැක්වීමේ පනත යටතේ ගොනුකරන ලද චෝදනා 23,270ක් යටතේ විත්තිකරුවන් 25 දෙනකුට එරෙහිව කොළඹ ත්රිපුද්ගල මහාධිකරණය ඉදිරියේ 2021 නොවැම්බර් 22 දින මෙම නඩුව ආරම්භ විය. එක් විත්තිකරුවෙක් නඩු විභාගය අතරතුරදී මියගියේය. පැමිණිල්ලේ සාක්ෂිකරුවන් ගණන 2309කි.
ඉතිරි විත්තිකරුවන් 24 දෙනාගෙන් 14 දෙනකු චෝදනා සියල්ලටම වැරදකරුවන් කළ මහාධිකරණය, ඔවුන්ට වසර 220ක බැගින් බරපතළ වැඩ ඇති සිරදඬුවම් නියම කරන ලදි. එක් විත්තිකරුවකු එක් චෝදනාවකට හැර අනෙක් චෝදනාවලට වරදකරු කරන ලදි. විත්තිකරුවෝ 9 දෙනෙක් සියලු චෝදනාවන්ගෙන් නිfදාස් කොට නිදහස් කරනු ලැබූහ.
සභාපති විනිසුරු මාරසිංහට අමතරව රාමනාදන් කන්නන් හා සුජීව නිශ්ශංක යන මහාධිකරණ විනිසුරුවරුන්ගෙන් විනිසුරු මඬුල්ල සමන්විත විය.
