22 වැනි ආණ්ඩුක්රම ව්යවස්ථා සංශෝධනය සම්බන්ධයෙන් ශ්රේෂ්ඨාධිකරණය ඉදිරියේ පැවැත්වුණු පෙත්සම් විභාගයේදී, රජය වෙනුවෙන් සොලිසිටර් ජෙනරාල් විරාජ් දයාරත්න ඉදිරිපත් කළ කරුණුවලට හා අතරමැදි පෙත්සම්කරුවන් වෙනුවෙන් ඉදිරිපත් කළ කරුණුවලට වාචිකව පිළිතුරු දීමට පෙත්සම්කරුවන්ට ඉඩ නොදී, එම පෙත්සම් විභාගය අවසන් කිරීමට අගවිනිසුරුවරයා තීරණය කළේය.
ඒ, සැප්තැම්බර් 2 වැනිදා සවස 5.30ට පමණය. මෙම සංශෝධනයට එරෙහිව පෙත්සම් 67ක් ඉදිරිපත් වී තිබුණු අතර, සැප්තැම්බර් 1 වැනිදා එම පෙත්සම් පිළිබඳ විමසීම පංච පුද්ගල විනිසුරු මඬුල්ල ඉදිරියේ ආරම්භ විය. එදින රාත්රි 10.30 පමණ වන තෙක් පෙත්සම් විභාගය පැවැත්විණි.
1 වැනිදා, පළමුව 22ට එරෙහි පෙත්සම්කරුවන්ට කරුණු දැක්වීමට අවසර ලැබුණු අතර, 2 වැනිදා අතරමැදි පෙත්සම්කරුවන්ට කරුණු දැක්වීමට අවස්ථාව ලැබිණ. ඉන්පසු රජය නියෝජනය කරමින්, නීතිපතිවරයා වෙනුවෙන් සොලිසිටර් ජෙනරාල් විරාජ් දයාරත්න කරුණු දැක්වීය.
සාමාන්යයෙන් රජය වෙනුවෙන් නීතිපතිවරයා කරුණු දැක්වූ පසු, එම කරුණුවලට වාචිකව පිළිතුරු දීමට පෙත්සම්කරුවන්ට අවස්ථාව දෙනු ලැබේ.
ඒ අනුව යමින්, සොලිසිටර් ජෙනරාල්වරයා දේශනය අවසන් කිරීමෙන් පසුව, පෙත්සම්කරුවන් වෙනුවෙන් පෙනීසිටි නීතිඥවරු, සොලිසිටර් ජෙනරාල්වරයාගේ සහ අතරමැදි පෙත්සම්කරුවන්ගේ නීතිඥයන්ගේ කරුණු දැක්වීම්වලට ප්රතිචාර දැක්වීමට අවස්ථාව ලබා දෙන ලෙස ශ්රේෂ්ඨාධිකරණයෙන් ඉල්ලා සිටියහ.
එහෙත්, පෙත්සම්කරුවන්ගේ නීතිඥවරුන්ට ප්රතිචාර දැක්වීමට ඉඩදීම ප්රතික්ෂේප කළ අගවිනිසුරුවරයා, ඒ වෙනුවට ලිඛිත දේශන මගින් කරුණු ඉදිරිපත් කරන ලෙස දැනුම් දී පෙත්සම් විභාගය අවසන් කළේය.
සොලිසිටර් ජෙනරාල්වරයාගේ කරුණු දැක්වීම, 22 වැනි ආණ්ඩුක්රම ව්යවස්ථා සංශෝධනය සම්බන්ධයෙන් එතෙක් මෙතෙක් රජය දරන ස්ථාවරය පැහැදිලි කළ මුල්ම හා එකම අවස්ථාව වූ නමුත්, ඔහුගේ කරුණු දැක්වීම්වලට වාචිකව පිළිතුරු දීමට පෙත්සම්කරුවන්ට අවස්ථාවක් නොදී ම, මේ ආකාරයෙන් පෙත්සම් විභාගය අවසසන් කරන ලදි.
