‘ජ්‍යෙෂ්ඨයන්ගේ පළපුරුදු සේවය ලබාගැනීමේ’ ආණ්ඩුවේ බොරුව යළිත් තහවුරු වෙයි’ – අභියාචනාධිකරණයේ ජ්‍යෙෂ්ඨතම විනිසුරු ගුරුසිංහත් විශ්‍රාම යයි

අභියාචනාධිකරණ විනිසුරු රත්නප්‍රිය ගුරුසිංහ, 2026 සැප්තැම්බර් 1 වැනිදා වයස අවුරුදු 63 සම්පූර්ණ වීම නිසා අභියාචනාධිකරණ විනිසුරු ධුරයෙන් විශ්‍රාම ලැබුවේය.

ඔහු විශ්‍රාම ලැබුවේ, ශ්‍රේෂ්ඨාධිකරණයේ විනිසුරු ධුර හතරක් හිස්ව තිබියදී වීම විශේෂත්වයකි.

අභියාචනාධිකරණ විනිසුරුවරුන් ශ්‍රේෂ්ඨාධිකරණයට උසස්කිරීම සඳහා නම් කරනු ලබන්නේ ජනාධිපතිවරයා විසිනි. එහෙත්, අනුර කුමාර දිසානායක ජනාධිපතිවරයා, ගුරුසිංහ විනිසුරුවරයා ශ්‍රේෂ්ඨාධිකරණ විනිසුරු ධුරයක් සඳහා නම් කළේ නැත.

ඒ, 22 වැනි ආණ්ඩුක්‍රම ව්‍යවස්ථා සංශෝධනයෙන් ඉහළ අධිකරණවල විනිසුරුවරුන්ගේ විශ්‍රාම වයස වැඩිකිරීමෙන්, ‘ජ්‍යෙෂ්ඨ හා පළපුරුදු විනිසුරුවරුන්ගේ සේවය දීර්ඝ කාලයක් ලබාගත හැකිය’ යන ආණ්ඩුවේම තර්කය බොරුවක් බවට පත්කරමිනි.
රත්නප්‍රිය ගුරුසිංහ මහතා අධිකරණ විනිසුරු සේවයට ඇතුළු වන්නේ, 1996 මාර්තු 5 වැනිදාය. එතැන් පටන් ඔහු කොළඹ, නාවලපිටිය, ගම්පොළ, අවිස්සාවේල්ල, හලාවත, මාතර, මාතලේ සහ මහනුවර යන අධිකරණ කලාපවල මහේස්ත්‍රාත්වරයකු හා දිසා විනිසුරුවරයකු ලෙස සේවය කර ඇත.

2012දී ගුරුසිංහ මහතා මහාධිකරණ විනිසුරුවරයකු ලෙස උසස්වීම ලැබූ අතර, අම්පාර සිවිල් අභියාචනා මහාධිකරණ විනිසුරු ලෙසද සේවය කර ඇත. ඉන්පසු ඔහු බදුල්ල මහාධිකරණ විනිසුරු ලෙස සේවය කළ අතර, කොළඹ වාණිජ මහාධිකරණ විනිසුරු ලෙසද සේවය කර තිබේ.

ඔහු අභියාචනාධිකරණ විනිසුරුවරයකු හැටියට උසස් කරන ලද්දේ 2020 දෙසැම්බර් 1 වැනිදාය. ඒ අනුව, ගුරුසිංහ මහතා අභියාචනාධිකරණ විනිසුරුවරයකු හැටියට අවුරුදු 6ක පළපුරුද්දක් ඇති ජ්‍යෙෂ්ඨතම විනිසුරුවරයා ලෙස කටයුතු කළේය. ඒ නිසාම, අභියාචනාධිකරණයේ වැඩබලන සභාපති හැටියටද ඔහු වරක් පත්කරනු ලැබ තිබේ.

මහේස්ත්‍රාත්වරයකුගේ සිට අභියාචනාධිකරණ විනිසුරුවරයකු දක්වා ඔහුගේ සේවා කාලය වසර 30කි. පහළම අධිකරණයේ සිට ඉහළම අධිකරණය දක්වා විනිසුරුවරයකු ලෙස කටයුතු කිරීමට ලැබීම විනිසුරුවරයකුගේ සේවා කාලය තුළ විශේෂ අවස්ථාවක් වෙයි. එලෙසම, ඉහළ අධිකරණවලට පහළ අධිකරණවල සිට උසස්වීම් ලබා එන විනිසුරුවරුන් (කැරියර් ජජස්) පත්වීමද විශේෂ වැදගත් තත්වයක් වෙයි.

ගුරුසිංහ මහතා විශ්‍රාම ගන්නේ ඔහුට හිමිවිය යුතු එම අවසාන උසස්වීම ජනාධිපතිවරයා විසින් ලබා නොදුන් තත්වයක් යටතේය.

හිටපු අගවිනිසුරු මුර්දු ප්‍රනාන්දු, ගුරුසිංහ විනිසුරුවරයා ශ්‍රේෂ්ඨාධිකරණ විනිසුරුධුරයක් ලැබීමට සුදුසු බවට ජනාධිපතිවරයාට ලිඛිතව දන්වා තිබේ. එහෙත්, ජනාධිපති අනුර කුමාර දිසානායක, ගුරුසිංහ මහතා ශ්‍රේෂ්ඨාධිකරණයට උසස් කිරීමට පියවර ගත්තේ නැත.

මීට පෙර ජුනි මාසයේදී අභියාචනාධිකරණයේ තවත් ජ්‍යෙෂ්ඨ විනිසුරුවරයකු වූ ධම්මික ගනේපොළ මහතාටද විශ්‍රාම යන්නට සිදුවිය. ඒ, ශ්‍රේෂ්ඨාධිකරණයේ විනිසුරු ධුර තුනක් හිස්ව තිබුණු තත්වයක් යටතේ, ජනාධිපතිවරයා ඔහු ඒ සඳහා නම් නොකිරීම හේතුවෙනි.