2008 වසරේ නැගෙනහිර පළාතේ ප්රදේශ කිහිපයක සිදු වූ ඝාතන පහක් සම්බන්ධයෙන් සිදුකෙරෙන විමර්ශනවලට අදාළව හිටපු රාජ්ය අමාත්ය සිවනේසතුරෙයි චන්ද්රකාන්තන් හෙවත් ‘පිල්ලෙයාන්’ සැප්තැම්බර් 01 වැනිදා දක්වා යළි රක්ෂිත බන්ධනාගාරගත කර තිබේ.
අදාළ ඝාතන සම්බන්ධයෙන් අපරාධ පරීක්ෂණ දෙපාර්තමේන්තුව විසින් හිටපු රාජ්ය අමාත්යවරයා ඇතුළු සැකකරුවන් කිහිපදෙනෙකුට එරෙහිව මාතලේ මහේස්ත්රාත් අධිකරණය හමුවේ නඩුවක් ගොනු කර තිබේ.
2008 වසරේ මඩකලපුව දිස්ත්රික්කයේ ප්රදේශ කිහිපයක සිදු වූ ඝාතන සිද්ධීන් සම්බන්ධයෙන් චන්ද්රකාන්තන් මහතා සැකකරුවෙකු ලෙස නම් කර ඇති බව අපරාධ පරීක්ෂණ දෙපාර්තමේන්තුව සඳහන් කරයි.
ඒ අනුව 2008 වසරේ මඩකලපුව කල්ලඩි මුරුගන් කෝවිල ආසන්නයේදී හිටපු පොලිස් නිලධාරියෙකු ඇතුළු පුද්ගලයන් දෙදෙනෙකු වෙඩි තබා ඝාතනය කිරීමේ සිද්ධිය සම්බන්ධයෙන් ඔහුට චෝදනා එල්ල වී තිබේ. එමෙන්ම 2008 මැයි 22 වැනිදා කාත්තන්කුඩි ප්රධාන මාර්ගයේදී පුද්ගලයන් දෙදෙනෙකු වෙඩි තබා ඝාතනය කිරීමේ සිද්ධිය සම්බන්ධයෙන්ද ඔහු සැකකරුවෙකු ලෙස නම් කර ඇත.
මීට අමතරව 2008 අගෝස්තු 20 වැනිදා රාත්රියේ වවුනතිව්, කොතියපූලෙයි ප්රදේශයේදී සන්නද්ධ කණ්ඩායමක් විසින් තවත් පුද්ගලයෙකු වෙඩි තබා ඝාතනය කිරීමේ සිද්ධිය සම්බන්ධයෙන්ද චන්ද්රකාන්තන් මහතාට එරෙහිව විමර්ශන සිදුකර තිබේ. මෙම ඝාතන සිද්ධීන් සම්බන්ධයෙන් අපරාධ පරීක්ෂණ දෙපාර්තමේන්තුව තවදුරටත් විමර්ශන සිදුකරන අතර එම විමර්ශනවලට අදාළව චන්ද්රකාන්තන් මහතා සැප්තැම්බර් 01 වැනිදා දක්වා යළි රක්ෂිත බන්ධනාගාරගත කර තිබේ.
