22 වැනි සංශෝධනය ගැන ජනපතිගේ තර්කවල ගැඹුරක් නැහැ – දිනන දකුණ

විනිසුරුවරුන්ගේ විශ්‍රාම වයස දීර්ඝ කිරීම ඇතුළු යෝජිත 22 වැනි ආණ්ඩුක්‍රම ව්‍යවස්ථා සංශෝධනය සම්බන්ධයෙන් ජනාධිපති අනුර කුමාර දිසානායක මහතා ඉදිරිපත් කර ඇති තර්කවල ගැඹුරක් නොමැති බව දිනන දකුණ සාමූහිකය පවසා ඇත.

අධිකරණ පත්වීම්, විනිසුරුවරුන්ගේ විශ්‍රාම වයස දීර්ඝ කිරීම සහ යෝජිත 22 වැනි ආණ්ඩුක්‍රම ව්‍යවස්ථා සංශෝධනය සම්බන්ධයෙන් ජනාධිපතිවරයා පසුගියදා ඉදිරිපත් කළ ප්‍රසිද්ධ තර්ක දැඩි ලෙස ප්‍රතික්ෂේප කරමින් එම සාමූහිකය අගෝස්තු 14 දින   මාධ්‍ය නිවේදනයක් නිකුත් කරමින් මේ බව පවසා තිබිණි.

ජනාධිපතිවරයා නීතිඥ සංගමයේ නියෝජිතයන් සමඟ පැවැති සාකච්ඡාවේදී පළ කළ අදහස් ඒකපාර්ශ්විකව සමාජයට ඉදිරිපත් කර ඇති බවත්  22 වැනි සංශෝධන ක්‍රියාවලියම ඒකපාර්ශ්වික සහ අත්තනෝමතික ක්‍රියාවලියක් බවත් දිනන දකුණ සාමූහිකය පවසා ඇත.

අධිකරණ ප්‍රතිසංස්කරණ සඳහා අවදානම් ගැනීමට තමන් සූදානම් බවත් නඩු ප්‍රමාදය සහ අධිකරණ පද්ධතියේ පවතින ප්‍රමාදයන් විසඳීම සඳහා 22 වැනි සංශෝධනය ගෙන එන බවත් ජනාධිපතිවරයා ප්‍රකාශ කර ඇති බවත් මහාධිකරණය ඉදිරියේ පවතින ජාතික වැදගත්කමකින් යුතු නඩුවිභාග හේතුවෙන් ඉහළ අධිකරණ සඳහා උසස්වීම් ප්‍රමාද කිරීමට තම අභිමතය භාවිත කළ බවත්, ශ්‍රේෂ්ඨාධිකරණයේ සහ අභියාචනාධිකරණයේ පුරප්පාඩු සම්බන්ධයෙන් ලැබුණු උපදෙස් අනුව කටයුතු කළ බවත් ජනාධිපතිවරයා පවසා ඇති බවත් එහි සඳහන් කර ඇත.

කෙසේ වෙතත් අධිකරණ පද්ධතියේ කාර්යක්ෂමතාවයේ නාමයෙන්  ආණ්ඩුක්‍රම ව්‍යවස්ථා සංශෝධනයක් ගෙන ඒම සඳහා පරිපාලනමය හෝ සංවර්ධන ක්‍රියාමාර්ගයකදී ගනු ලබන අවධානමට සමාන කිරීම ජනාධිපතිවරයා පෙර කියූ පිරිචි ඉගෙන ගනිමින් වැඩ කිරීම සහ වැඩ කරමින් ඉගෙන ගැනීමෙන් ලබා ගන්නා ලද අදහසකට සමපාත වන අදහසක් බවත් නිවේදනයේ දක්වා ඇත.

අධිකරණයේ ස්වාධීනත්වය ජනතා පරමාධිපත්‍යයේ අනිවාර්ය කොටසක් වන බැවින් එය පරදුවට තබා විනිසුරුවරුන්ගේ ධුර කාලය දීර්ඝ කිරීම බරපතළ ව්‍යවස්ථාමය අවදානමක් බවද එම සාමූහිකය අවධාරණය කරයි.

යෝජිත 22 වැනි සංශෝධනය හරහා විනිසුරුවරුන්ගේ විශ්‍රාම වයස වෙනස් කිරීමට ගන්නා උත්සාහය මගින් අධිකරණය කෙරෙහි විධායකයේ බලපෑම යථාර්ථයක් වීමේ අවදානමක් පවතින බව එම සාමූහිකය සඳහන් කරයි.

විශ්‍රාම වයස සහ විශ්‍රාම යාමෙන් පසු ලැබෙන වරප්‍රසාද විධායකයේ අභිමතය පරිදි තීරණය වන තත්ත්වයක් ඇතිවුවහොත් ආයතනික බලතල අතර පවතින තුලන හා සංවරන පද්ධතිය අස්ථාවර විය හැකි බවද එහි සඳහන්ය.

මේ අතර ශ්‍රේෂ්ඨාධිකරණයේ සහ අභියාචනාධිකරණයේ පුරප්පාඩු සම්බන්ධයෙන් ජනාධිපතිවරයා සිදුකර ඇති ප්‍රකාශ පරස්පර විරෝධී බවටද එම සාමූහිකය චෝදනා කර ඇත.

ශ්‍රේෂ්ඨාධිකරණයේ සහ අභියාචනාධිකරණයේ පුරප්පාඩු පිරවීම නොකරන ලෙස තමන්ට උපදෙස් ලැබී ඇති බව ජනාධිපතිවරයා මීට පෙර පාර්ලිමේන්තුවට දැනුම් දී තිබූ බවත්, මේ වනවිට මහාධිකරණයේ පවතින නඩු විභාග සම්බන්ධයෙන් සඳහන් කරමින් එම ස්ථාවරය වෙනස් කිරීම පරස්පර විරෝධී බවත් එම සාමූහිකය පවසා ඇත.

එසේම විනිසුරුවරුන්ගේ උසස්වීම් අත්තනෝමතික ලෙස ප්‍රමාද කිරීම හෝ අත්හිටුවීම ඔවුන්ගේ සාධාරණ නීතිමය අපේක්ෂාවන්ට ගරු කිරීමට ඇති අයිතිය උල්ලංඝනය කිරීමක් බවද එම සාමූහිකය සඳහන් කර ඇත.

අභියාචනාධිකරණ විනිසුරු ගණේපොළ මහතා වැනි ජ්‍යෙෂ්ඨ විනිසුරුවරුන්ට ශ්‍රේෂ්ඨාධිකරණය තුල ඇබෑර්තු පවතිද්දී විශ්‍රාම යාමට ඉඩ හැරීම, ආණ්ඩුක්‍රම ව්‍යවස්ථාවේ 12(1) වගන්තියෙන් සහතික කර ඇති නීතිය ඉදිරියේ සමානාත්මතාවයේ අයිතිය පැහැදිලිවම උල්ලංඝනය කිරීමක් වන බවත් එවැනි අමානුෂික ක්‍රියා තුලින් අධිකරණ පද්ධතියේ කාර්යක්ෂමතාවයක් ඇති වීම කෙසේ වෙතත් එම පද්ධතියේ කඩාවැටීමට හේතු වන බවත් එම සාමුහිකය පවසා ඇත.

මහාධිකරණයේ පවතින පාස්කු ඉරිදා ප්‍රහාරයට අදාළ නඩු වැනි නඩු විභාග පදනම් කරගෙන විනිසුරුවරුන්ගේ උසස්වීම් අත්හිටුවීම මගින් උසස්වීම් සඳහා අත්තනෝමතික නිර්ණායක හඳුන්වා දීමට ජනාධිපතිවරයා කටයුතු කරන බව පෙනී යන බවටද එම සාමූහිකය චෝදනා කරයි.

අධිකරණ පද්ධතියේ කාර්යක්ෂමතාව වැඩි කිරීම සඳහා විනිසුරුවරුන්ගේ විශ්‍රාම වයස දීර්ඝ කිරීම සහ නඩු ප්‍රමාදය අඩු කිරීම අතර කිසිදු තාර්කික සම්බන්ධතාවක් ජනාධිපතිවරයා ඉදිරිපත් කර නොමැති බවද දිනන දකුණ සාමූහිකය පවසයි.

අධිකරණ කාර්යක්ෂමතාව වැඩි කිරීම සඳහා අවශ්‍ය වන්නේ ව්‍යුහාත්මක ප්‍රතිසංස්කරණ, ඩිජිටල් යටිතල පහසුකම්, පහළ අධිකරණවල විනිසුරුවරුන් සංඛ්‍යාව වැඩි කිරීම සහ ප්‍රමාණවත් කාර්ය මණ්ඩලයක් ලබාදීම මිස විනිසුරුවරුන්ගේ ධුර කාලය දීර්ඝ කිරීම නොවන බව එම සාමූහිකය පෙන්වා දී ඇත.

ඒ අනුව අධිකරණ පද්ධතිය තුළ පවතින ගැටලුකාරී තත්ත්වයන් දඩමීමා කරගෙන විනිසුරුවරුන්ගේ විශ්‍රාම වයස වෙනස් කිරීම සඳහා ආණ්ඩුක්‍රම ව්‍යවස්ථාව සංශෝධනය කිරීම, ප්‍රජාතන්ත්‍රවාදී ප්‍රතිසංස්කරණයකට වඩා කෙටි කාලීන දේශපාලන බලය තහවුරු කර ගැනීමේ උත්සාහයක් ලෙස තමන් දකින බවද එම සාමූහිකය සඳහන් කරයි.

අධිකරණයේ ස්වාධීනත්වයට බලපාන ආණ්ඩුක්‍රම ව්‍යවස්ථා සංශෝධන දේශපාලන මෙවලමක් ලෙස භාවිත කිරීම වහාම නතර කරන ලෙසත්, ශ්‍රී ලංකා අධිකරණයේ ස්වාධීනත්වය ආරක්ෂා කරන ව්‍යවස්ථාපිත සහතික කිරීම්වලට ගරු කරමින් කටයුතු කරන ලෙසත් දිනන දකුණ සාමූහිකය ජනාධිපතිවරයාගෙන් ඉල්ලා ඇත.

සම්පූර්ණ නිවේදනය පහළින්

මාධ්‍ය නිවේදනය.

2026-08-14

22 වන ආණ්ඩුක්‍රම ව්‍යවස්ථා සංශෝධනය, ගෙන ඒම සදහා අධිකරණ ස්වාධීනත්වය සහ අධිකරණ පද්ධතියේ කාර්යක්ෂමතාවය වෙනුවෙන් ජනාධිපතිතුමා ඉදිරිපත් කරන තර්කයන් තුල ගැඹුරක් නැත!

අධිකරණ පත්වීම්, විනිසුරුවන්ගේ විශ්‍රාම වයස දීර්ඝ කිරීම සහ යෝජිත 22 වන ආණ්ඩුක්‍රම ව්‍යවස්ථා සංශෝධනය සම්බන්ධයෙන් ජනාධිපතිවරයා විසින් පසුගියදා ඉදිරිපත් කරන ලද ප්‍රසිද්ධ තර්කයන් දැඩි ලෙස ප්‍රතික්ෂේප කරමින්, සහ ඒ පිලිබදව ගැඹුරින් සිතා බලන්නට සමාජයට ආරාධනා කරමින් දිනන දකුණ සාමූහිකය විසින් මෙම මාධ්‍ය නිවේදනය නිකුත් කරනු ලබයි.

ජනාධිපතිවරයා, නීතිඥ සංගමයේ නියෝජිතයින් සමග පැවති සාකච්ඡාවේදී පල කල අදහස් ඒක පාර්ශවිකව සමාජයට මුදා හරින්නට කටයුතු කොට තිබුණේ තමන්ගේ අත්තනෝමතික ක්‍රියා කලාපයේ තවත් සන්ධිස්ථානයක් සනිටුහන් කරමිනි.

ජනාධිපතිවරයාගේ කථාවේදී නීතීඥ සංගමය ඒක පාර්ශවිකව කටයුතු කරමින් තම මතය සාකච්ඡාවට පෙර සමාජයට මුදා හැරීම පිලිබදව අවලාද නගා තිබුණද, එම අවස්ථාවේදී සමස්ත 22 වන ආණ්ඩුක්‍රම ව්‍යවස්ථා සංශෝධන ක්‍රියාවලියම ඒක පාර්ශවික හා අත්තනෝමතික ක්‍රියාවලියක් බව ජනාධිපති තුමන්ට දිනන දකුණ සාමූහිකය සිහිපත් කොට සිටී.

එවැනි පසු බිමක සිට ජනාධිපතිගේ ඉහත ප්‍රකාශයන් තුල පවතින අලංකාරෝක්තීන් දිනන දකුණ සාමූහිකයේ අවධානය යොමු කොට සිටින්නේ ඒ පිලිබදව සමාජය තුල පවතින මෝහය තුරන් කිරීමට බව කිව යුතුව තිබේ. ජනාධිපතිවරයා ප්‍රකාශ කරන්නේ

1. අධිකරණ ප්‍රතිසංස්කරණ සඳහා අවදානම් ගැනීමට ජනාධිපතිවරයා දක්වන ලැදියාවක් පවතින බවය

2. නඩු ප්‍රමාදය සහ අධිකරණයේ පවතින පමාකිරීම් විසඳීම සදහා පවතින කැපවීම පෙන්නුම් කිරීමට 22 සංශෝධනය ගෙන එන බවය.

3. මහාධිකරණය ඉදිරියේ පවතින ජාතික වැදගත් කමක් සහිත නඩු විභාග හේතුවෙන් ඉහළ අධිකරණ සදහා උසස්වීම් පමා කිරීමට තම අභිමතය භාවිතා කරනු ලැබූ බවය.

4. ශ්‍රේෂ්ඨාධිකරණය සහ අභියාචනාධිකරණ පුරප්පාඩු පිළිබඳව ලැබී ඇති උපදෙස් අනුව කටයුතු කල බවය.

5 අධිකරණ පද්ධතියේ කාර්යක්ෂමතාව පිළිබඳ අභිප්‍රාය පිලිබද සද්භාවී කැපවීමක් පවතින බවය.

අප සාමූහිකය ආරම්භයේදීම කියා සිටින්නේ අධිකරණයේ කාර්යක්ෂමතාවයේ නාමයෙන් ආණ්ඩුක්‍රම ව්‍යවස්ථා සංශෝධනයක් ගෙන ඒම සදහා පරිපාලනමය හෝ සංවර්ධන ක්‍රියාමාර්ගයකදී ගනු ලබන අවධානමකට සමාන කිරීම ජනාධිපතිවරයා පෙර කියු පරිදි ඉගෙන ගනිමින් වැඩ කිරීම සහ වැඩකරමින් ඉගෙනගැනීමෙන් ලබා ගන්නා ලද අදහසකට සමපාත වන අදහසක් වන බවය.

අප අවධාරණය කරන්නේ ජනතා පරමාධිපත්‍යයේ කොටසක් වන අධිකරණයේ ස්වාධීනත්වයට අදාලව එවැනි අවධානමක් ගැනීම කිසිසේත්ම සිදු කල නොහැක්කක් බවය.

ජනතා පරමාධිපත්‍යයේ අත්‍යන්ත කොටසක් වන අධිකරණයේ ස්වාධීනත්වය පිලිබදව එවැනි අවධානමක් ගැනීම මහජනතාව සතු පරමාධිපත්‍ය බරපතල අනතුරේ හෙලීමක් පමණක් නොව එවැනි අවධානමක් ගනිමින් 22 සංශෝධනය හදුන්වා දීමට විධායකය දරන උත්සාහයම, අධිකරණයේ ස්වාධීනත්වයට, මෙන්ම ජනතා පරමාධිපත්‍යයට සිදුවිය හැකි බරපතල බලපෑමක් පිලිබදව සිදු කරන්නාවු පරදු තැබීමක් බව අප සාමූහිකය අවධාරණය කොට සිටී.

අධිකරණයේ ස්වාධීනත්වය යනු ආණ්ඩුක්‍රම ව්‍යවස්ථාවේ 3 වන වගන්තිය යටතේ ආරක්ෂා කර ඇති ජනතාවගේ පරමාධිපත්‍යයේ අනිවාර්ය කොටසකි. සමාජීය-ආර්ථික සංවර්ධන ව්‍යාපෘතිවලදී විධායකයට දේශපාලන අවදානම් ගත හැකි වුවද, අධිකරණයේ ස්වාධීනත්වය පරදුවට තබා විනිසුරුවරුන්ගේ ධුර කාලය දීර්ඝ කිරීම සම්බන්ධයෙන් එවැනි “අවදානම්” ගැනීම මුළු ආණ්ඩුක්‍රම ව්‍යවස්ථාමය රාමුවම අනතුරේ හෙළීමකි. අධිකරණ පද්ධතිය කලමණාකරනය කිරීම සදහා දේශපාලන ප්‍රතිපත්තිමය අවදානමක් ගැනීම රටක අනාගතය පරදුවට තැබීමක් ලෙසටද අප අවධාරනය කොට සිටී.

යෝජිත 22 වන සංශෝධනය හරහා විනිසුරුවරුන්ගේ විශ්‍රාම වයස වෙනස් කිරීමට ජනාධිපතිවරයා දරන උත්සාහය, අධිකරණය කෙරෙහි විධායකයේ බලපෑම යථාර්තයක් කරන බව අපගේ විශ්වාසයයි.

විශ්‍රාම වයස සහ විශ්‍රාම යෑමෙන් පසුව පවතින වරප්‍රසාදීත අවස්ථාවන් විධායකයේ අභිමතය පරිදි තීරණය වන විට, ආයතනික බලතල තුලනය සිදුවන තුලන හා සංවරන පද්ධතිය අස්ථාවර වන බව අපගේ විශ්වාසයයි.

එමගින් අවසානයේදී සිදුවන්නේ අධිකරණය විධායකයේ බලපෑමට හසුවී අධිකරණයේ ස්වාධීනත්වය අධිකරණයටම අහිමි වීම වන්නේය.

ජනාධිපති වරයා ප්‍රකාශයට පත් කරන අවධානමෙහි පිටුපස පවතින සැබෑ අරුථ වන්නේ එම ස්වාධීනත්වය අහිමිවීමයි.

ඉහත කරුණට සමාන්තරව ජනාධිපතිවරයා අධිකරණ පුරප්පාඩු පිරවීම පිළිබඳව සිදුකරන ප්‍රකාශයන්ද පරස්පර විරෝධී වන්නේය.

ශ්‍රේෂ්ඨාධිකරණයේ සහ අභියාචනාධිකරණයේ පුරප්පාඩු පිරවීම නොකරන ලෙස තමාට උපදෙස් ලැබී ඇති බව ජනාධිපතිවරයා මීට පෙර පාර්ලිමේන්තුවට දැනුම් දුන්නේය.

දැන් මහාධිකරණයේ පවතින නඩු විභාග ගැන සඳහන් කරමින් එම ස්ථාවරය වෙනස් කිරීම, විනිවිද පෙනෙන පාලනයට හානි කරන්නාවු ප්‍රකාශයක් මෙන්ම නීතිය ඉදිරියේ සාධාරණීකරණය කළ නොහැකි පරස්පර විරෝධී ප්‍රකාශයන් බව අපගේ නිරීක්ෂණය වන්නේය.

අප දකින්නේ ජනාධිපති වරයාගේ මතයට අනුව විනිසුරුවරුන්ගේ උසස්වීම් අත්තනෝමතික ලෙස ප්‍රමාද කිරීම හෝ අත්හිටුවීම එම විනිසුරු වරුන්ගේ සාධාරණ නෛතික අපේක්ෂාවන්ට (Legitimate Expectations) ගරු කිරීමට ඇති අයිතිය අමු අමුවේ උල්ලංඝනය කිරීමක් ලෙසටය.

අභියාචනාධිකරණ විනිසුරු ගණේපොළ මහතා වැනි ජ්‍යෙෂ්ඨ විනිසුරුවරුන්ට ශ්‍රේෂ්ඨාධිකරණය තුල ඇබෑර්තු පවතිද්දී විශ්‍රාම යාමට ඉඩ හැරීම, ආණ්ඩුක්‍රම ව්‍යවස්ථාවේ 12(1) වගන්තියෙන් සහතික කර ඇති නීතිය ඉදිරියේ සමානාත්මතාවයේ අයිතිය පැහැදිලිවම උල්ලංඝනය කිරීමක් වන අතර එවැනි අමානුෂික ක්‍රියා තුලින් අධිකරණ පද්ධතියේ කාර්යක්ෂමතාවයක් ඇති වීම කෙසේ වෙතත් එම පද්ධතියේ කඩාවැටීමට හේතු වන බව අපගේ මතයයි.

එසේම මහාධිකරණයේ පවතින නඩු (පාස්කු ඉරිදා ප්‍රහාරයට අදාළ නඩු වැනි) පදනම් කරගෙන උසස්වීම් අත්හිටුවීම මගින් විනිසුරුවන්ගේ උසස්වීම් සඳහා අත්තනෝමතික නිර්නායක ඇතුළත් කිරීමට ජනාධිපති වරයා කටයුතු කරමින් සිටින බව පෙනෙන්නට තිබේ.

විනිසුරුවරුන් මෙලෙස කොන්දේසි සහිතව උසස්වීම් සදහා සලකා බැලීමත්, තෝරාගත් නිර්නායක ඔස්සේ වෘත්තියක් තුල ඉහලට යාම අත්හිටුවීම්වලට ලක්කිරීමත් ජාත්‍යන්තර මානව හිමිකම් ප්‍රමිතීන් යටතේ ගැනෙන විනිසුරු වරුන්ගේ වෘත්තීය අයිතිවාසිකම් සහ ගෞරවය කෙළෙසීමක් ලෙස අප දකින්නෙමු.

කෙසේ නමුත් ජනාධිපතිවරයා ඉදිරිපත් කල එකදු හෝ තර්කයක් තුළින් අභියාචනාධිකරන සහ මහාධිකරණ විනිසුරුවරුන් මත පටවා ඇති මෙම වෘත්තීය පමාකිරීම සාධාරණීකරණය කිරීමට හැකිවුයේ නැති බව අපගේ විශ්වාසයයි.

ජනාධිපතිවරයා නැවත නැවතත් තහවුරු කරන ලද්දේ තමන්ගේ අත්තනෝමතික අවශ්‍යතාවයක් සදහා විනිසුරු වරයන්ගේ සහජ වෘත්තීය ඉදිරිගමන අත්හිටුවමින් සමස්ත අධිකරණ පද්ධතියම ව්‍යාකූල කරමින් අධිකරණ පද්ධතිය විධායකයේ අණසකට ගැනීම සදහා තමන් විසින් ඕනෑම අවධානමක් ගැනීමට පසුබට නොවන බවය.

අවසාන වශයෙන් අප සාමූහිකය නිරීක්ෂනය කරන්නේ ජනාධිපති වරයාගේ අලංකාරෝක්ති හරහා 22 වන සංශෝධනය ගෙන ඒම මගින් විනිසුරුවන්ගේ විශ්‍රාම වයස දීර්ඝ කිරීමේ යෝජනාව සමග නඩු ප්‍රමාදය අඩු කිරීමේ උත්සාහය සමග කිසිදු තාර්කික සබදතාවක් ගොඩනගන්නට හැකියාවක් ලැබී නොමැති බවය.

එසේම විශ්‍රාම වයස දීර්ඝ කිරීම අධිකරණයේ ක්‍රියාකාරී වේගය වැඩි කරන බවට කිසිදු ප්‍රායෝගික හෝ තාර්කික පදනමක් පවතින බව තහවුරු කිරීමට ජනාධිපතිවරයා සමත්ව තිබුනේ නැත.

අප කියා සිටින්නේ අධිකරණ කාර්යක්ෂමතාව සඳහා අවශ්‍ය වන්නේ ව්‍යුහාත්මක ප්‍රතිසංස්කරණ, ඩිජිටල් යටිතල පහසුකම්, පහළ අධිකරණවල විනිසුරු සංඛ්‍යාව වැඩි කිරීම සහ ප්‍රමාණවත් කාර්ය මණ්ඩලයක් ලබා දීම මිස විනිසුරන්ට තම ධුර කාල දීර්ඝ කිරීම් නොවන බවය.

එම නිසා දිනන දකුන සාමූහිකය අවධාරනය කරන්නේ ජනාධිපතිවරයා 22 වන සංශෝධනය මහජන යහපත උදෙසා ගන්නා ලද “අවදානමක්” ලෙස හඳුන්වන විට, ජනතාව මෙහි ඇති දේශපාලන යථාර්ථය තේරුම් ගත යුතුව තිබෙන බවය.

අප විශ්වාස කරන්නේ අධිකරණ පද්ධතිය තුළ පවතින ගැටළුකාරී වාතාවරණයක් දඩමීමා කරගනිමින් විනිසුරුවන්ගේ විශ්‍රාම ගන්වනු ලබන කාලය වෙනස් කිරීමට ආණ්ඩුක්‍රම ව්‍යවස්ථාව සංශෝධනය කිරීම, සැබෑ ප්‍රජාතන්ත්‍රවාදී ප්‍රතිසංස්කරණයකට වඩා කෙටිකාලීන දේශපාලන බලය තහවුරු කරගැනීමට දරන උත්සාහයක් ලෙසටය.

ජනාධිපතිවරයාගේ ප්‍රකාශයන් යහපත් චේතනාවෙන් කළ ඒවා බව පැවසුවද, දේශපාලනිකව බුද්ධිමත් ජනතාව එම ප්‍රකාශවල මතුපිට දෙස නොව එහි පිටුපස පවතින කටුක යථාර්තය සොයා බලන ලෙසට අප සමාජයට ආරාධනා කරන්නෙමු.

එම නිසා අප සාමුහිකය ජනාධිපතිවරයාට කියා සිටින්නේ අධිකරණය කෙරෙහි බලපානු ලබන වංචා සහගත ආණ්ඩුක්‍රම ව්‍යවස්ථා සංශෝධන දේශපාලන මෙවලමක් ලෙස භාවිත කිරීම වහාම නතර කරන ලෙසටය.

එසේම ශ්‍රී ලංකා අධිකරණයේ ස්වාධීනත්වය ආරක්ෂා කරන ව්‍යවස්ථාපිත සහතික කිරීම්වලට ගරු කරමින් එවැනි සංශෝධනයක් ගෙන එන ලෙසටය.

දිනන දකුණ සාමුහිකය වෙනුවෙන් නායකත්ව මණ්ඩලය සහ විධායක සභාව.