විනිසුරුවරුන්ගේ විශ්රාම වයස් සීමාව දීර්ඝ කිරීමේ යෝජනාව සම්බන්ධයෙන් සාකච්ඡා කිරීම සඳහා ජනාධිපති අනුර කුමාර දිසානායක මහතා සහ ශ්රී ලංකා නීතිඥ සංගමය අතර සාකච්ඡාවක් අගෝස්තු 12 වන දින පස්වරු 1.00ට පැවැත්වීමට නියමිතය.
විනිසුරුවරුන්ගේ විශ්රාම වයස් සීමාව දීර්ඝ කිරීම සම්බන්ධයෙන් ශ්රී ලංකා නීතිඥ සංගමය සිය ස්ථාවරය පසුගියදා ජනාධිපතිවරයා වෙත ලිඛිතව දැනුම්දී තිබූ අතර එම කරුණ පිළිබඳව ජනාධිපතිවරයා සමඟ සෘජුව සාකච්ඡා කිරීමට අවස්ථාවක් ලබාදෙන ලෙසද සංගමය ඉල්ලා තිබිණි.
22 වැනි ආණ්ඩුක්රම ව්යවස්ථා සංශෝධනය සඳහා වන පනත් කෙටුම්පත අධිකරණ සහ ජාතික ඒකාබද්ධතා අමාත්යවරයාගේ නියමය පරිදි මේ වනවිට ගැසට් කර තිබේ. එම පනත් කෙටුම්පතට අනුව ශ්රේෂ්ඨාධිකරණ විනිසුරුවරුන්ගේ විශ්රාම වයස් සීමාව අවුරුදු 67 දක්වාත් අභියාචනාධිකරණ විනිසුරුවරුන්ගේ විශ්රාම වයස් සීමාව අවුරුදු 65 දක්වාත් දීර්ඝ කිරීමට යෝජනා කර ඇත.
කෙසේ වෙතත් ශ්රී ලංකා නීතිඥ සංගමයේ ස්ථාවරය වී ඇත්තේ විනිසුරුවරුන්ගේ විශ්රාම වයස දීර්ඝ කිරීම සම්බන්ධයෙන් වන මෙම ආණ්ඩුක්රම ව්යවස්ථා සංශෝධනය මේ අවස්ථාවේදී සිදු නොකළ යුතු බවය. එම ස්ථාවරය සම්බන්ධයෙන් නීතිඥ සංගමයේ සභාපති ජනාධිපති නීතිඥ රජීව් අමරසූරිය මහතා ඇතුළු නියෝජිත පිරිසක් පසුගියදා අධිකරණ අමාත්ය හර්ෂණ නානායක්කාර මහතා සමඟද විශේෂ සාකච්ඡාවක් පවත්වා තිබේ.
එම සාකච්ඡාවෙන් අනතුරුව රජීව් අමරසූරිය මහතා සඳහන් කර තිබුණේ විනිසුරුවරුන්ගේ විශ්රාම වයස දීර්ඝ කිරීම සඳහා යෝජිත ආණ්ඩුක්රම ව්යවස්ථා සංශෝධනය සම්බන්ධයෙන් ජනාධිපතිවරයා දැනුවත් කිරීම සඳහා නීතිඥ සංගමයට අවස්ථාවක් ලබාදෙන ලෙස තමන් අධිකරණ අමාත්යවරයාගෙන් ඉල්ලා සිටි බවය. ඒ අනුව නීතිඥ සංගමය විසින් ඉදිරිපත් කර ඇති විරෝධතා සහ යෝජනා පිළිබඳව හෙට ජනාධිපතිවරයා සමඟ පැවැත්වෙන සාකච්ඡාවේදී අවධානය යොමු කිරීමට නියමිතය.
