ශ්රී ලංකා පොදුජන පෙරමුණේ මහ ලේකම් නීතිඥ සාගර කාරියවසම් මහතා අද (10) මධ්යම අපරාධ විමර්ශන කාර්යාංශය විසින් අත්අඩංගුවට ගෙන තිබේ.
පොලිස්පතිවරයා සම්බන්ධයෙන් සිදුකළ ප්රකාශයක් පිළිබඳව ප්රකාශයක් ලබාදීම සඳහා අද පෙරවරුවේ මධ්යම අපරාධ විමර්ශන කාර්යාංශය වෙත පැමිණි අවස්ථාවේදී ඔහු අත්අඩංගුවට ගෙන ඇත.
පොලිස්පතිවරයාට මරණ තර්ජන සිදුකිරීම සහ ජනාධිපතිවරයාව මහජනතාව අතර අපකීර්තියට හෝ අනාදරයට පත්වන ආකාරයේ ප්රකාශ සිදුකිරීම යන චෝදනා සම්බන්ධයෙන් සිදුකෙරෙන විමර්ශනයකට අදාළව මෙම අත්අඩංගුවට ගැනීම සිදුකර තිබේ.
මාධ්ය හමුවකදී පොලිස්පතිවරයා මහජනතාව අතරදී ඝාතනය කළ හැකි බවට කාරියවසම් මහතා විසින් සිදුකරන ලද බව කියන ප්රකාශයක් සම්බන්ධයෙන් පොලිසිය විමර්ශනයක් ආරම්භ කර තිබුණු අතර ඒ අනුව අද උදෑසන 10.00ට මධ්යම අපරාධ විමර්ශන කාර්යාංශය හමුවේ පෙනී සිටින ලෙස කාරියවසම් මහතාට දැනුම් දී තිබූ අතර එහිදී ඔහුගෙන් ප්රකාශයක් ලබාගැනීමෙන් අනතුරුව අත්අඩංගුවට ගෙන තිබේ.
