බීබීසී සිංහල සේවයේ මාධ්යවේදීන් දෙදෙනෙකු පාර්ලිමේන්තුවේ ආචාර ධර්ම සහ වරප්රසාද පිළිබඳ කාරක සභාව හමුවට කැඳවීමට ගෙන ඇති තීරණය වහාම අත්හිටුවන ලෙස ශ්රී ලංකා වෘත්තීය ජනමාධ්යවේදීන්ගේ සංගමය ඉල්ලීමක් කර ඇත.
ශ්රී ලංකා වෘත්තීය ජනමාධ්යවේදීන්ගේ සංගමය ජුලි 21 වෙනි දින මාධ්ය නිවේදනයක් නිකුත් කරමින් පවසා ඇත්තේ මෙවැනි ආකාරයේ වත්මන් ආණ්ඩුව ගනු ලබන පියවර ජනමාධ්ය මර්දනයට මෙන්ම භාෂණයේ හා ප්රකාශනයේ නිදහසට එල්ල කරන බරපතළ තර්ජනයක් බවය.
ලක්මාලි හේමචන්ද්ර පාර්ලිමේන්තු මන්ත්රීවරිය විසින් ඉදිරිපත් කළ පැමිණිල්ලක් අනුව කතානායකවරයාගේ නියෝගයෙන් බීබීසී සිංහල සේවයේ කර්තෘ ඉෂාරා ධනසේකර සහ මාධ්යවේදී සම්පත් දිසානායක එළඹෙන ජූලි 23 වැනිදා පස්වරු 2.00ට පාර්ලිමේන්තු වරප්රසාද කාරක සභාව හමුවට කැඳවා ඇති බව එම නිවේදනයේ දක්වා ඇත.
අනුරාධපුර අටමස්ථානාධිපති පල්ලේගම හේමරතන හිමියන්ට එරෙහිව එල්ල වී ඇති බාලවයස්කාර දැරියක අපයෝජනය කිරීමේ චෝදනාවට අදාළ විමර්ශන සම්බන්ධයෙන් ජාතික ළමා ආරක්ෂණ අධිකාරිය විවෘත අධිකරණයේදී පොලිසියට එරෙහිව කළ ප්රකාශ සහ ඒ සම්බන්ධයෙන් පාර්ලිමේන්තු මන්ත්රීවරියන්ගේ සංසදය ජාතික ළමා ආරක්ෂණ අධිකාරියේ නිලධාරීන් කැඳවා ප්රශ්න කළ බවට බීබීසී සිංහල සේවය වාර්තා කිරීම මෙම කැඳවීමට හේතු වී ඇති බව වෘත්තීය ජනමාධ්යවේදීන්ගේ සංගමය පෙන්වා දී ඇත.
පාර්ලිමේන්තු මන්ත්රීවරියන්ගේ සංසදය කිසිදු නීතිමය හෝ නිල බලයක් නොමැති පාර්ලිමේන්තු අභ්යන්තර සංසදයක් පමණක් බවත් එවැනි පසුබිමක එම සිදුවීම වාර්තා කළ මාධ්යවේදීන් වරප්රසාද කමිටුවට කැඳවීම ජනමාධ්යයේ ස්වාධීනත්වයට සහ ජනතාවගේ තොරතුරු දැනගැනීමේ අයිතියට බරපතළ බලපෑමක් එල්ල කරන ක්රියාවක් බවත් සඳහන් කර ඇත.
ඉතිහාසයේ අසාර්ථක ආණ්ඩු කළ ආකාරයටම වර්තමාන ආණ්ඩුවද මාධ්යවේදීන් බියගැන්වීම සඳහා නීති සහ පාර්ලිමේන්තු වරප්රසාද භාවිත කරමින් මාධ්ය මර්දනයට කටයුතු කරන බවට චෝදනා කරන ශ්රී ලංකා වෘත්තීය ජනමාධ්යවේදීන්ගේ සංගමය මෙම ක්රියාමාර්ගය ශ්රී ලංකාවේ මාධ්ය මර්දන ඉතිහාසයට එක්වන තවත් කළු පැල්ලමක් ලෙස සලකන බවද පවසා ඇත.
මෙම තර්ජනාත්මක ක්රියාමාර්ගය වහාම නතර කරන ලෙස ආණ්ඩුවෙන් සහ පාර්ලිමේන්තු බලධාරීන්ගෙන් ඉල්ලා ඇති අතර භාෂණයේ හා ප්රකාශනයේ නිදහස ආරක්ෂා කිරීම සඳහා සියලු මාධ්ය සංවිධාන, සිවිල් සංවිධාන සහ පුරවැසියන් එක්වන ලෙසද ආරාධනා කර ඇත.
