2017 වසරේ මීගමුව පොලිස් ස්ථානයේ සිදුවූ සිද්ධියකට අදාළව ශ්රේෂ්ඨාධිකරණය මූලික අයිතිවාසිකම් උල්ලංඝනය කළ බවට තීරණය කළ එවක මීගමුව මූලස්ථාන පොලිස් පරීක්ෂක ලෙස සේවය කළ සහකාර පොලිස් අධිකාරී එෆ්.යු. වුට්ලර් උදයකුමාර සහ විවිධ පැමිණිලි අංශයේ ස්ථානාධිපති මධුශංක ඩයස් සම්බන්ධයෙන් ජාතික පොලිස් කොමිෂන් සභාව වෙත කිසිදු පැමිණිල්ලක් ලැබී නොමැති බව තොරතුරු දැනගැනීමේ අයිතිය පනත යටතේ ලබාදුන් පිළිතුරකින් අනාවරණය වී තිබේ.
මෙම තොරතුරු ඉල්ලා තිබුණේ මාධ්යවේදී එච්. එම්. රේඛා නිලුක්ෂි විසින් තොරතුරු දැනගැනීමේ අයිතිය පනත යටතේ ජාතික පොලිස් කොමිෂන් සභාව වෙත යොමු කළ තොරතුරු ඉල්ලීමකට අදාල පිළිතුරු ලබා දී තිබිණි.
එම ඉල්ලීම ඉදිරිපත් කර තිබුණේ 2017 වසරේ මීගමුව පොලිස් ස්ථානයේ සිදුවූ සිද්ධියක් සම්බන්ධයෙන් නීතිඥ ප්රියලාල් චමින්ද සිරිසේන මහතා ගොනු කළ මූලික අයිතිවාසිකම් පෙත්සමකදී, වුට්ලර් උදයකුමාර සහ මධුශංක ඩයස් යන පොලිස් නිලධාරීන් විසින් පෙත්සම්කරුගේ මූලික අයිතිවාසිකම් උල්ලංඝනය කළ බවට ශ්රේෂ්ඨාධිකරණය තීරණය කිරීමෙන් අනතුරුවය.
එම තොරතුරු ඉල්ලීම මඟින් ශ්රේෂ්ඨාධිකරණ තීන්දුවෙන් පසුව අදාළ නිලධාරීන්ට එරෙහිව ජාතික පොලිස් කොමිෂන් සභාව හෝ ශ්රී ලංකා පොලිසිය විසින් විනය ක්රියාමාර්ග ගෙන තිබේද, එසේ නම් එම ක්රියාමාර්ගවල ස්වභාවය, ආරම්භ කළ දිනය සහ වර්තමාන තත්ත්වය, ඔවුන්ගේ වර්තමාන තනතුරු, සේවා ස්ථාන සහ තනතුරු උසස්වීම් පිළිබඳ විස්තර මෙන්ම, මූලික අයිතිවාසිකම් උල්ලංඝනය කළ බවට ශ්රේෂ්ඨාධිකරණය තීරණය කළ නිලධාරියෙකු පොලිස් මාධ්ය ප්රකාශක ධුරය දරන්නේ නම් ඒ සම්බන්ධයෙන් ගෙන ඇති පියවර පිළිබඳව ද විමසා තිබිණි.
ඒ සඳහා පිළිතුරු ලබාදෙමින් ජාතික පොලිස් කොමිෂන් සභාව සඳහන් කර ඇත්තේ වුට්ලර් උදයකුමාර සහ මධුශංක ඩයස් සම්බන්ධයෙන් තමන් වෙත කිසිදු පැමිණිල්ලක් ලැබී නොමැති බවයි. එමෙන්ම ඔවුන්ගේ වර්තමාන තනතුරු, සේවා ස්ථාන සහ තනතුරු උසස්වීම් සම්බන්ධයෙන් තොරතුරු පොලිස්පතිවරයාගෙන් ලබා ගන්නා ලෙස පවසා ඇත.
විනය ක්රියාමාර්ගයක් ගෙන නොමැති නම් ඒ සඳහා හේතු සහ අදාළ ප්රතිපත්ති, මාර්ගෝපදේශ මොනවාදැයි අසා තිබුණු අතර එයට පිළිතුරු ලබා දෙමින් කොමිෂන් සභාව පවසා ඇත්තේ විෂයගත කරුණුවලට ජාතික පොලිස් කොමිෂන් සභාව සම්බන්ධීකරණය වූ නොවන අතර මේ පිළිබඳ නිල දැනුවත් කිරීමක් ජාතික පොලිස් කොමිෂන් සභාව වෙත කර නොමැති බවය.
තවද මූලික අයිතිවාසිකම් උල්ලංඝනය කිරීම සම්බන්ධයෙන් ශ්රේෂ්ඨාධිකරණය විසින් වැරදිකරු කරනු ලැබූ පොලිස් නිලධාරීන් සඳහා ජාතික පොලිස් කොමිෂන් සභාව අනුගමනය කරන විනය ක්රියාමාර්ග හෝ ප්රතිපත්ති තිබේද යන්න පිළිබඳව විමසා තිබුණු අතර එයට පිළිතුරු ලබා දෙමින් පවසා ඇත්තේ ශ්රී ලංකා පොලිසියේ නිලධාරීන්ට එරෙහිව විනය ක්රියාමාර්ග සම්බන්ධයෙන් පොලිස් විනය නියෝග ඇතුළු අදාළ නීතිමය ප්රතිපාදන පවතින බවත්, එම විධිවිධානවලට අනුකූලව ජාතික පොලිස් කොමිෂන් සභාව විසින් කටයුතු කරන බවය.
