එම සිද්ධිය සම්බන්ධයෙන් කරුණු විමසීම සඳහා ජූලි 14 වැනිදා වැලිකඩ බන්ධනාගාර අධිකාරිවරයා ඇතුළු නිලධාරීන් කිහිප දෙනෙකු මානව හිමිකම් කොමිෂන් සභාව හමුවට කැඳවා සාකච්ඡාවක් පවත්වා තිබේ. එහිදී කොමිෂන් සභාව අවධාරණය කර ඇත්තේ පූර්ව දැනුම්දීමකින් තොරව ඕනෑම රැඳවුම් ස්ථානයකට ඇතුළු වී පරීක්ෂා කිරීමේ නීතිමය බලය තමන්ට පවතින බවයි.
බන්ධනාගාර නිලධාරීන් එහිදී ප්රකාශ කර ඇත්තේ ජූලි 7 වැනිදා රාත්රියේ බන්ධනාගාරය තුළ නොසන්සුන් තත්ත්වයක් පැවති අතර, රාජකාරියේ නිරතව සිටියේ නිලධාරීන් හය දෙනෙකු පමණක් වූ බැවින් කොමිෂන් සභාවේ නිලධාරීන්ගේ ආරක්ෂාව තහවුරු කළ නොහැකි වීම හේතුවෙන් ඇතුළුවීමට අවසර නොදුන් බවයි. මීගමුව බන්ධනාගාරයේ සිදුවීම්වලින් පසු එහි සිට මාරු කළ රැඳවියන්ට පහරදීමේ සැලසුම් පිළිබඳ තොරතුරු ද ලැබී තිබූ බව ඔවුන් සඳහන් කර තිබේ. එහෙත් මෙම තත්ත්වය කොමිෂන් සභාවේ නිලධාරීන්ට නිසි ලෙස දැනුම් නොදුන් බව පිළිගෙන, සන්නිවේදන දුර්වලතාව සම්බන්ධයෙන් කනගාටුව පළ කළ බවද නිවේදනයේ දැක්වේ.
කෙසේ වෙතත් එම පැහැදිලි කිරීම සෑහීමකට පත් නොවන බව සඳහන් කර ඇති මානව හිමිකම් කොමිෂන් සභාව, කුමන තත්ත්වයක් යටතේ වුවද තම නීතිමය බලතල ක්රියාත්මක කිරීමට බාධා කිරීම පිළිගත නොහැකි බව අවධාරණය කර ඇත.
කොමිෂන් සභාව වැඩිදුරටත් නිවේදනයේ පවසා ඇත්තේ මීගමුව බන්ධනාගාරය තුළ ඇති වූ ගැටුමෙන් පසුදින වැලිකඩ බන්ධනාගාරයේ සිදු කළ නිරීක්ෂණයේදී මීගමුව බන්ධනාගාරයෙන් මාරු කළ රැඳවියන් කිහිප දෙනෙකු තමන්ට වධහිංසා, අයුතු සැලකිලි සහ වෛද්ය ප්රතිකාර ප්රතික්ෂේප කිරීම සම්බන්ධයෙන් පැමිණිලි කළ බවයි. තුවාල ලබා සිටි ඇතැම් රැඳවියන්ට ඒ වන විටත් ප්රතිකාර ලබාදී නොතිබූ බවත් තවත් පහරදීම්වලට ලක්වීමේ බියෙන් ප්රතිකාර ලබා ගැනීමට පවා මැළිකමක් දක්වන බවත් කොමිෂන් සභාව නිරීක්ෂණය කර තිබේ.
මීට අමතරව මාරු කළ රැඳවියන් සිටින ස්ථානය ඔවුන්ගේ ළඟම ඥාතීන්ට දැනුම්දීම ප්රමාද වීම පිළිබඳවද කොමිෂන් සභාව කනස්සල්ල පළ කර ඇත. තවද සිරදඬුවම් කාලය අවසන් කළ ඇතැම් රැඳවියන් තවමත් නිදහස් කර නොමැති බවට තොරතුරු ලැබී ඇති අතර එවැනි පුද්ගලයන් තවදුරටත් රඳවා තබා ගැනීම නීතිවිරෝධී විය හැකි බවද එය සඳහන් කරයි.
මෙම සිද්ධීන් සම්බන්ධයෙන් සිදුකරන විමර්ශනවලට පූර්ණ සහය ලබාදෙන ලෙස වැලිකඩ බන්ධනාගාර නිලධාරීන්ට උපදෙස් ලබාදුන් කොමිෂන් සභාව ඉදිරියේදී මෙවැනි සිදුවීම් වැළැක්වීම සඳහා නිර්දේශ කිහිපයක් ද ඉදිරිපත් කර තිබේ. ඒ අනුව කොමිෂන් සභාවට ඕනෑම අවස්ථාවක රැඳවුම් ස්ථාන පරීක්ෂා කිරීමේ බලය පිළිබඳ සියලු බන්ධනාගාර නිලධාරීන් දැනුවත් කිරීම, මාරු කළ රැඳවියන්ට එරෙහි පළිගැනීම් වැළැක්වීම, ඔවුන්ගේ ස්ථානය ඥාතීන්ට දැනුම්දීම සහ සිරදඬුවම් කාලය අවසන් කළ සිරකරුවන් ප්රමාදයකින් තොරව නිදහස් කිරීම සඳහා පියවර ගන්නා ලෙස බන්ධනාගාර දෙපාර්තමේන්තුවෙන් ඉල්ලා තිබේ.
