ත්රිකුණාමලය සහීරා විද්යාලයේ මුස්ලිම් ශිෂ්යාවන් 70 දෙනෙකුගේ 2024 අධ්යයන පොදු සහතික පත්ර උසස් පෙළ විභාග ප්රතිඵල අත්හිටුවීමට එවකට විභාග දෙපාර්තමේන්තුව ගත් තීරණය ආණ්ඩුක්රම ව්යවස්ථාවෙන් සහතික කර ඇති ඔවුන්ගේ මූලික අයිතිවාසිකම් උල්ලංඝනය කිරීමක් බව ශ්රී ලංකා මානව හිමිකම් කොමිෂන් සභාව තීන්දු කර තිබේ.
මේ සම්බන්ධයෙන් HRC/SUO-MOTU/02/2024 යටතේ පැවැත්වූ විමර්ශනය අවසන් කරමින් කොමිසම සිය නිර්දේශ ජුලි 01 වන දින නිකුත් කර ඇත.
2024 ජනවාරි මාසයේ පැවති උසස් පෙළ විභාගයේදී අදාළ සිසුවියන් කන් වැසෙන ආකාරයට හිස් ආවරණ පැළඳ සිටීමෙන් ( හිජාබ්) විභාග නීති උල්ලංඝනය කළ බවට චෝදනා කරමින් එවකට විභාග කොමසාරිස් ජනරාල්වරයා ඔවුන්ගේ ප්රතිඵල අත්හිටුවීමට පියවර ගෙන තිබුණි.
ඒ අනුව මානව හිමිකම් කොමිෂන් සභාවට ලද පැමිණිල්ලකට අනුව එම කොමිසම සිදු කළ විමර්ශනයෙන් අනාවරණය වී ඇත්තේ සිසුවියන් සිය සාමාන්ය හිජාබය වෙනුවට කන් පැහැදිලිව පෙනෙන පරිදි ලිහිල් සාලුවක් පැළඳ විභාගයට පෙනී සිට ඇති බවත් එමගින් විභාග නිරීක්ෂකයන්ට කන් පරීක්ෂා කිරීමට කිසිදු බාධාවක් නොතිබූ බවත්ය.
කොමිෂන් සභාව නිකුත් කර ඇති නිවේදනයේ සඳහන් කර ඇත්තේ විභාග මධ්යස්ථානයේ රාජකාරි කළ නිරීක්ෂකයන් සහ නිලධාරීන්ගේ සාක්ෂිවලට අනුව අදාළ සිසුවියන් විභාග නීති කඩ කළ බවට කිසිදු පැමිණිල්ලක් හෝ වාර්තාවක් සටහන් වී නොතිබූ බවය. තවද ප්රතිඵල අත්හිටුවීමට පෙර විභාග දෙපාර්තමේන්තුව විසින් විධිමත් සහ විශ්වාසනීය අභ්යන්තර පරීක්ෂණයක් නොපවත්වා ඇති බවත් විමර්ෂණයේදී අනාවරණය වී ඇති බව එහි සඳහන් වේ.
කොමිසම සිය තීරණයේදී අවධාරණය කර ඇත්තේ හිස ආවරණයක් පැළඳීම මුස්ලිම් ආගමික විශ්වාසය ප්රකාශ කිරීමේ කොටසක් වන අතර එය ආණ්ඩුක්රම ව්යවස්ථාවේ 10 සහ 14(1)(e) වගන්ති යටතේ ආරක්ෂා වන ආගමික නිදහසට අයත් බවය. එමෙන්ම අදාළ සිසුවියන්ගේ ප්රතිඵල අත්හිටුවීම මගින් ඔවුන්ගේ ආගමික නිදහස මෙන්ම ආණ්ඩුක්රම ව්යවස්ථාවේ 12(1) සහ 12(2) වගන්ති යටතේ සහතික කර ඇති සමානත්වයේ සහ වෙනස් කොට සැලකීමෙන් තොර වීමේ අයිතියද උල්ලංඝනය වී ඇති බව කොමිසම නිගමනය කර ඇත.
විභාග දෙපාර්තමේන්තුව ප්රකාශ කළ පරිදි සිසුවියන්ගේ කන් පැහැදිලිව පෙනීමේ නීතියේ අරමුණ විභාග වංචා වැළැක්වීම වුවද එම අරමුණ ඉටු වන පරිදි ලිහිල් සාලුවක් භාවිත කිරීම ප්රමාණවත් බව සාක්ෂි මගින් තහවුරු වී ඇති බැවින් ප්රතිඵල අත්හිටුවීම අවශ්ය නොවූ බවත් අසමානුපාතික සහ අසාධාරණ සීමා කිරීමක් බවත් කොමිසම පෙන්වා දී ඇත.
මෙම තීරණයට හේතු වූ කරුණු සහ එයට බාහිර නිලධාරීන්ගේ බලපෑමක් හෝ වැරදි තොරතුරු සැපයීමක් සිදුවූයේද යන්න පිළිබඳව පූර්ණ හා අපක්ෂපාතී පරීක්ෂණයක් පවත්වා වගකිවයුත්තන්ට එරෙහිව අවශ්ය විනය ක්රියාමාර්ග ගන්නා ලෙසත් ආගමික ඇඳුම් සම්බන්ධයෙන් විභාග බලධාරීන්ට පැහැදිලි මාර්ගෝපදේශ නිකුත් කිරීම, කන් පැහැදිලිව පෙනෙන පරිදි පැළඳින ලිහිල් සාලු වැනි ආගමික ඇඳුම් සඳහා අවසර ලබාදීම සහ අනාගතයේ මෙවැනි ගැටලු වළක්වා ගැනීම සඳහා විභාග මධ්යස්ථානවල ප්රමාණවත් කාන්තා නිරීක්ෂකවරියන් හා දෙමළ භාෂාව දන්නා නිරීක්ෂකයන් පත් කිරීම සම්බන්ධයෙන්ද කොමිෂන් සභාව නිර්දේශ ඉදිරිපත් කර ඇත.
