අල්ලස් හා දූෂණ චෝදනා සම්බන්ධ නඩු හතරකදී වරදකරු කර වසර 16ක බරපතළ වැඩ සහිත සිරදඬුවම් නියම කළ හිටපු නියෝජ්ය අමාත්ය සරණ ගුණවර්ධන එම තීන්දුවට එරෙහිව අභියාචනාධිකරණය හමුවේ වෙන වෙනම අභියාචනා හතරක් ගොනු කර තිබේ.
පසුගිය ජූනි 9 වැනිදා කොළඹ මහාධිකරණය විසින් ලබාදුන් තීන්දුව බලරහිත කර ඉවත් කරන ලෙස ඉල්ලා ඔහු මෙම අභියාචනා ගොනු කර ඇත.
අල්ලස් හෝ දූෂණ චෝදනා විමර්ශන කොමිෂන් සභාව චෝදනා කර තිබුණේ 2006 වසරේ සංවර්ධන ලොතරැයි මණ්ඩලයේ සභාපතිවරයා ලෙස කටයුතු කළ කාලයේ ආයතනය සඳහා කුලී පදනම මත වාහන මිලදී ගැනීමේදී රජයට මූල්ය අලාභයක් සිදු කළ බවටය.
එම චෝදනා පදනම් කර ගනිමින් 2022 වසරේදී කොමිෂන් සභාව ඔහුට එරෙහිව අධිචෝදනා හතරක් ගොනු කර තිබුණි.
මෙම නඩු විභාගයෙන් අනතුරුව කොළඹ මහාධිකරණ විනිසුරු මොහොමඩ් මිහාල් විසින් සරණ ගුණවර්ධන චෝදනාවලට වරදකරු බවට තීන්දු කරමින් එක් එක් නඩුව සඳහා වසර හතර බැගින් සමස්තයක් ලෙස වසර 16ක බරපතළ වැඩ සහිත සිරදඬුවමක් නියම කළ අතර රුපියල් මිලියන 1.8ක දඩයක්ද ගෙවන ලෙස නියෝග කර තිබිණි.
