ජනාධිපති සමාව දිය යුත්තේ බෝම්බ ධනුෂ්කටද?

හිටපු පාර්ලිමේන්තු මන්ත්‍රී අමරකීර්ති අතුකෝරළ ඝාතනය සම්බන්ධයෙන් වරදකරුවන් කරනු ලැබ මරණ දණ්ඩනයට නියම වූ අයට ජනාධිපති සමාව දිය යුතුයැයි කියන අදහසක් විවිධ අයගෙන් ඉදිරිපත් වී තිබේ. මේ අදහස ඉදිරිපත් කරන අය අතර, පසුගිය කාලයේ ප්‍රජාතන්ත්‍රවාදය, මානව අයිතිවාසිකම්, මානව ගරුත්වය වැනි දේ සම්බන්ධයෙන් පෙනීසිටි කලාකරුවන්, සමාජ ක්‍රියාකාරිකයන් මෙන්ම මාධ්‍යවේදීන්ද සිටිනු දැකිය හැකිය. ඔවුන් පෙන්නා දෙන්නට හදන්නේ, මේ ද්විත්ව ඝාතනය අරගලයේ කොටසක් බවත්, එය දේශපාලනික ක්‍රියාවක් බවත්, ක්‍රියාවකට දැක්වූ ප්‍රතික්‍රියාවක් පමණක් බවත්, ඒ නිසා වරදකරුවන් අත වරදක් නැති බවත් විය හැකිය.

හිටපු මන්ත්‍රීවරයාට හා ඔහුගේ පෞද්ගලික ආරක්ෂක නිලධාරි පොලිස් සැරයන්ට පහරදී ඝාතනය කිරීම සම්බන්ධ නඩුවේ තීන්දුව, ගම්පහ ත්‍රිපුද්ගල මහාධිකරණය විසින් දෙන ලද්දේ ජනවාරි 11 වැනිදාය. එහිදී මනුෂ්‍ය ඝාතනයට වරදකරුවන් වූ විත්තිකරුවන් 12 දෙනකුට මරණීය දණ්ඩනය නියම කෙරුණු අතර, විත්තිකරුවෝ 25 දෙනෙක් නිfදාස් කොට නිදහස් කරන ලදහ. මරණීය දණ්ඩනය නියමවූ විත්තිකරුවන් 12 ඇතුළු විත්තිකරුවන් 16 දෙනෙකු වරදකරුවන් බවට තීරණය කළ අතර සෙසු විත්තිකරුවන් 4 දෙනාට අවුරුදු පහකට අත්හිටුවනු ලැබූ මාස 6 බැගින් සිරදඬුවම් නියම කෙරිණි.

ඊට අමතරව, මේ සිද්ධියෙන් ඝාතනය වූ මන්ත්‍රී අතුකෝරළගේ බිරිඳ මාලි අතුකෝරළට සහ ආරක්ෂක නිලධාරි පොලිස් සැරයන් ජයන්ත ගුණවර්ධනගේ බිරිඳ අනුෂා ඉන්දිකා ගුණවර්ධනට රුපියල් 50,000 බැගින් වන්දි ගෙවීමටද නියම කෙරිණි. වන්දි මුදල් ගෙවීමට අපොහොසත් වුවහොත් අමතර වසර දෙක බැගින් ලිහිල් වැඩ සහිත සිරදඬුවම්ය.

සභාපති විනිසුරුගේ තීන්දුව

වැදගත් කරුණක් වුණේ විනිසුරු මඬුල්ලේ සභාපති සහන් මාපා බණ්ඩාර විනිසුරුවරයා, සුළුතර තීන්දුවක් දෙමින්, සියලු විත්තිකරුවන් නිfදාස් කොට නිදහස් කිරීමය. ඔහුගේ තර්කය වුණේ, පැමිණිල්ල සාධාරණ සැකයෙන් ඔබ්බට චෝදනා ඔප්පු කර නැත යන්නයි. ඒ අනුව, ලැබුණේ බහුතර, එනම් තුනෙන් දෙකක තීන්දුවකි. රශ්මි සිංගප්පුලි හා රසන්ත ගොඩවෙල විනිසුරුවරු දෙපළ, විත්තිකරුවන් වැරදිකරුවන් බවට තීරණය කළහ.

මරණ දණ්ඩනය නියම නොකරන ලද විත්තිකරුවන් හතර දෙනා වරදකරුවන් කරනු ලැබුවේ නීති විරෝධී රැස්වීමක සාමාජිකයෙකු වශයෙන් කටයුතු කිරීමේ චෝදනාවටය.

මරණීය දණ්ඩනය නියම කරනු ලැබුවේ, නඩුවේ 1 විත්තිකරු ධනුෂ්‍ය ලක්ෂාන්ත, 4 විත්තිකරු මොහොමඩ් ඩිල්ෂාන්, 5 විත්තිකරු සාගර ප්‍රනාන්දු, 6 විත්තිකරු සුපුන් තරිඳු සුනිල්රත්න, 7 විත්තිකරු ඉන්දික කුමාර විජේසිංහ, 14 විත්තිකරු රාමයියා සත්‍ය කුමාර්, 19 විත්තිකරු චාරුක දේශාන්, 21 විත්තිකරු සනත් වීර ප්‍රසන්න, 26 විත්තිකරු යොහාන් මධුභාෂිත ජයවීර, 27 විත්තිකරු රංගන රුවන් නන්දසේන, 35 විත්තිකරු දිනුක ප්‍රභාත් ජයතිලක සහ 40 විත්තිකරු අශාන් පීරිස්ටය.
අත්හිටුවූ සිරදඬුවම් නියම කරනු ලැබුවේ, 2 විත්තිකරු ඔෂාන් දිල්ෂාන්, 23 විත්තිකරු සමිත අනුරංග සූරසිංහ, 30 විත්තිකරු සිංගා හෙවත් චාමර ප්‍රසන්න සහ 35 විත්තිකරු දිනුක ප්‍රභාත් ජයතිලකටය.

තීන්දුව ප්‍රකාශයට පත්කිරීමට ජනවාරි 14දා මුලින් කැඳවනු ලැබූ අවස්ථාවේදී, දීර්ඝ කාලයක් පුරා විභාගවූ නඩුවේ විත්තිකරුවන් 41 දෙනා සම්බන්ධයෙන් ඉදිරිපත්වූ කරුණු වෙනවෙනම සලකා බැලිය යුතු බවත්, විඩියෝද සලකා බැලිය යුතු බවත් පෙන්වා දෙමින්, ඒ සඳහා ප්‍රමාණවත් කාලයක් අවශ්‍ය බව සඳහන් කර තීන්දුව දීම පෙබරවාරි 11 දක්වා කල් තබනු ලැබිණ.

ත්‍රිපුද්ගල විනිසුරු මඬුල්ල

2022 මැයි 9 වැනිදා, නිට්ටඹුවේදී සිදුවූ මෙම ද්විත්ව ඝාතනය සම්බන්ධ නඩුව, මහත් ආන්දෝලනයකට තුඩුදී ඇති නිසා, එය ඇසීමට විනිසුරුවරුන් තිදෙනකුගෙන් සැදුම්ලත් මහාධිකරණ විනිසුරු මඬුල්ලක් නම්කරන්නැයි එවකට නීතිපති කළ ඉල්ලීම මත අගවිනිසුරු ජයන්ත ජයසූරිය විසින් මෙම විනිසුරුවරු තිදෙනා පත්කෙරුණෝය.

සාමාන්‍ය නඩුවක තීන්දුවක් සම්බන්ධයෙන් අභියාචන අවස්ථා දෙකක් ලැබෙන නමුත්, ත්‍රිපුද්ගල මහාධිකරණ විනිසුරු මඬුල්ලක් අසන නඩුවකට ඇත්තේ එක් අභියාචන අවස්ථාවක් පමණකි. ඒ ශ්‍රේෂ්ඨාධිකරණයටය. එහිදීද පස් දෙනකුගෙන් සමන්විත ශ්‍රේෂ්ඨාධිකරණ විනිසුරු මඬුල්ලක් වෙතය.

නීති විරෝධී රැස්වීමක සාමාජිකයින් වශයෙන් කටයුතු කරමින් අමරකීර්ති අතුකෝරළට සහ ඔහුගේ ආරක්‍ෂක නිලධාරි පොලිස් සැරයන් 5565 ජයන්ත ගුණවර්ධනට පහරදීම, ඔවුන් ඝාතනය කිරීම, ඔවුන් ගමන් කළ ආර්ථික සංවර්ධන අමාත්‍යාංශයෙන් නිකුත් කර තිබූ උඡ ණන්‍ 2649 රථය ගිනි තබා විනාශ කර රුපියල් මිලියන 45ක අලාභ කිරීම, ජීප් රථයේ අමතර රෝදය සහ පැතිදොරක් සොරා ගැනීම, මන්ත්‍රී අතුකෝරළ අතේ පැළඳ සිටි මුදු තුනක් සොරා ගැනීම, ඔහුගේ සාක්කුවේ තිබූ බිරිඳට අයත් ණය කාඩ්පතක් සොරාගැනීම සහ ඉන් නීති විරෝධී අන්දමින් භාණ්ඩ මිලදී ගැනීම ඇතුළු චෝදනා 14ක් යටතේ විත්තිකරුවන්ට නඩු පවරා තිබිණි. විත්තිකරුවන් 31 දෙනකුට විරුද්ධව මිනීමැරීමේ චෝදනාය. 36 දෙනකුට විරුද්ධව වාහනයට අනර්ථය කිරීමේ චෝදනාය.

නඩුවේ 13 විත්තිකරු සහ 31 විත්තිකරු නඩු විභාගය අතරතුරදී මියගොස් තිබිණි. 39 විත්තිකරු සහ 40 විත්තිකරු නඩු විභාගය අතරතුරදී අධිකරණය මගහැර විදේශගත වීම හේතුවෙන් ඔවුන් දෙදෙනා නොමැතිව නඩුව විභාග කෙරිණි. සාක්ෂිකරුවෝ 80ක් පමණ වූහ. ඒ අතර, පොලිස් නිලධාරිහු, යුද හමුදා නිලධාරිහු, ග්‍රාම නිලධාරිහු, වෛද්‍යවරු හා භික්ෂූහුද වූහ.

තීන්දුව තීන්දුවමයි

ත්‍රිපුද්ගල මහාධිකරණ විනිසුරු මඬුල්ලක තීරණය ඒකමතික හෝ 2:1 ලෙස බෙදුණු බහුතර එකක් විය හැකිය. ඒ කුමක් වුවද තීන්දුව තීන්දුවමය. සභාපති විනිසුරුවරයා වෙනස් තීන්දුවක් දුන්නාය කියා, බහුතර තීන්දුවේ වලංගුභාවයට බලපෑමක් ඇත්තේ නැත.

සිදුවීම 2022 මැයි 9 වැනිදා උදේ වරුවේ ගාලු මුවfදාර අරගල භූමියට කළ පහරදීමට පසුව සිදුවූවකි. එදින, අරලියගහ මන්දිරයට රැස්වූ පොදුජන පෙරමුණේ මැරයෝ, අතට හසුවන පොලු මුගුරු ගෙන මන්දිරයෙන් නික්මී ගෝල්ෆේස් අරගල භූමියට කඩාවැදී හිස් ලූ ලූ අත දිවයමින්, එහි සිටි අරගලකරුවන්ට, ඔවුන්ගේ කූඩාරම්වලට හා සැරසිලිවලට පහර දෙන්නට පටන්ගත්හ. ප්‍රහාරය වළක්වන්නට පොලිසිය කිසිවක් නොකළේය. ඒ ආරංචිය පැතිර ගිය විට රට පුරාම, පොදු ජන පෙරමුණේ මැරයන්ගේ එම පහරදීමට විරුද්ධව මහා විරෝධයක් පැනනැගිණ. ගෝල්ෆේස් අරගල භූමියේ හා ඒ අවට සිටි ප්‍රහාරකයන් සොයාගොස් ඔවුන්ට පෙරළා පහරදීමත්, බේරේ වැවට අතහැරීමත් සිදුවිය. ප්‍රහාරකයන් අරලියගහ මන්දිරයට ආවායැයි සැලකෙන බස්රථවලට පහරදී ගිනි තබන ලදි. ඔවුන් ආවායැයි නම්කරන ලද බස්රථවල අංක සමාජ මාධ්‍යවල ප්‍රචාරය කෙරුණු අතර, දිවයිනේ විවිධ නගරවල, මංසන්ධිවල රැඳී සිටි කෝපයට පත්වූ පිරිස්, එවැනි බස්රථවලට හා, කොළඹට ආවායැයි කියන පොදු ජන පෙරමුණේ අයගේ වාහන නවත්වා පරීක්ෂා කරමින් ඒවාටද පහර දෙන්නට සූදානම්වී සිටියහ. ඒ අතර, රට පුරා පොදු ජන පෙරමුණේ මන්ත්‍රීවරුන්, දේශපාලකයන් ඇතුළු විශාල පිරිසකගේ නිවාස හා වෙනත් ගොඩනැගිලි ගිනිබත් කරන ලදි.

අරගලයේ කොටසක්ද?

සාමකාමීව පවත්වාගෙන ගිය අරගල භූමියට පොදුජන පෙරමුණේ මැරයන් පහරදීමෙන් කුපිත වූ සාමාන්‍ය ජනතාව නිට්ටඹුව නගරයේ ඒකරාශිවී සිටියෝය. ගොල්ෆේස් ප්‍රහාරයට කොළඹ ගොස් නැවත ගම්බිම් බලායන පොදු ජන පෙරමුණේ මැරයන් අල්ලාගැනීමටය. අතුකෝරල මන්ත්‍රීවරයා මැදිවන්නේ එැනි පිරිසකටය.

අරගලයට කොහොමටත් විරුද්ධ පොදු ජන පෙරමුණේ අනුගාමිකයන්, අරගලයෙන් බලයට ආ රනිල් වික්‍රමසිංහගේ එක්සත් ජාතික පක්ෂ අනුගාමිකයන් හා අරගලය හේතුවෙන් බලයට ආ ජාතික ජන බලවේගයට විරුද්ධ සියලු දෙනා, මේ සිදුවීම ඉදිරියට ගන්නේ අරගලයේ ‘ම්ලේච්ඡත්වය’ක් සංකේතවත් කරන්නටය. එහෙත් කතාව අනෙකකි.

නිට්ටඹුවේ රැස්වී සිටි පිරිස අතරට මන්ත්‍රීවරයා පැමිණි වාහනය ළඟාවූ විට එය නවත්වා කොහි සිට එන්නේදැයි අසන ලදි. මන්ත්‍රීවරයා අරලියගහ මන්දිරයේ රැස්වීමට සහභාගිවී, කොළඹ පිහිටි සිරිපාල ගම්ලත් මන්ත්‍රීවරයාගේ නිවෙසින් දහවල් ආහාරද ගෙන (ඒ අනුව ඔහු අරගලයට පහරදීමට සම්බන්ධ නැති බව සිතිය හැකිය.) නැවත පොලොන්නරුවේ ගම බලා යමින් සිටියේය. අනතුරක සේයාවක් දුටු මන්ත්‍රීවරයා, තමන් මඟුල් ගෙදරකට ගොස් නැවත ගෙදර යන බව කීවේය. ඒ පිළිතුරෙන් සෑහීමට පත්නොවුණු පිරිස, වාහනය තුළ තිබෙන දේවල් අවුස්සද්දී, ‘පාර්ලිමේන්තුව’ යන හිසින් යුත් ලිපිශීර්ෂයක් හමුවී තිබේ. එයින් කෝපය ඇවිසුණු පිරිස මන්ත්‍රීවරයා වටකරගෙන පහර දෙන්නට සූදානම් වූහ. එවිට, ආරක්ෂක නිලධාරි සැරයන්වරයා මන්ත්‍රීවරයාගේ ආරක්ෂාවට පිස්තෝලය පත්තුකර තිබේ. එයින් එතැන සිටි පුද්ගලයකුට වෙඩි වැදුණි. පිරිසේ කෝපය වැඩි වූ අතර, දෙදෙනාට එරෙහි ප්‍රහාරය වැඩිවත්ම, දෙදෙනාම ආරක්ෂාව පතා දිව ගියහ. ඒ දිනවල රූපවාහිනි ප්‍රවෘත්තිවල විකාශය වූ දර්ශන දකින විට දෙදෙනා ජීවිතාරක්ෂාව පතා පලායන ආකාරය හොඳින් නිරීක්ෂණය කළ හැකිය.
ඔවුන් ඇතුළුවන්නේ නිට්ටඹුවේ නිහාල් ෆැෂන් රෙදි සාප්පුවටයි. මන්ත්‍රීවරයාත් ආරක්ෂක නිලධාරියාත් එහි ලිෆ්ට් එකට නැග ඉහළට ගොස් නතරවුණේ තුන්වැනි තට්ටුවේය. ඔවුන් පසුපස පහර දෙන්නට ආ පිරිසද ලිෆ්ට් එක මගින් මෙන්ම පියගැට පෙළ හරහාද තුන්වැනි තට්ටුවට දිවගියහ. තුන්වැනි තට්ටුවේ තිබුණේ සාරි අලෙවි කරන ස්ථානයයි. ඒ තුළ සැඟවෙන්නට තැන් තිබුණත් දෙදෙනාටම ඒ බවක් ඒත්තු ගිය බව නොපෙනිණි. පොලු හා ගල් ආදිය රැගත් ප්‍රහාරකයෝ මේ දෙදෙනා හඹාගෙන තුන්වැනි තට්ටුවට ආහ.

පඩියෙන් පඩිය හිස වැදීම

නිහාල් ෆැෂන් සාප්පුවේ සීසීටීවී කැමරා තිබුණේ පළවැනි දෙවැනි තට්ටුවල පමණකි. තුන්වැනි තට්ටුවේ නොතිබිණ. ඒ නිසා ප්‍රහාරය සිදුවුණු ආකාරය රූපමය ලෙස සටහන් වී නැත. එහෙත් මන්ත්‍රීවරයාත් සැරයන්වරයාත් තුන්වැනි තට්ටුවට දිවගොස් විනාඩි 15කට පමණ පසු, දෙදෙනාගේ කකුල්වලින් අල්ලාගෙන පඩිපෙළ දිගේ පහළට, ප්‍රහාරකයන් විසින් ඇදගෙන එනු ලබන දර්ශනය, 1 හා 2 තට්ටුවල සීසීටීවී කැමරාවල සටහන් වී තිබිණ. ප්‍රහාරකයන් ඔවුන්ගේ කකුල්වලින් අල්ලාගෙන පඩිපෙළින් පහලට ඇදගෙන එද්දී පඩියෙන් පඩියට හිස වැදීම නියතයකි. අධිකරණ වෛද්‍යවරයාගේ නිගමනය වී තිබුණේ, පහරදීම්වලට අමතරව, හිස එක දිගටම පඩිවල වැදීම නිසා ඝාතනය සිදුවූ බවයි. තුන්වැනි තට්ටුවේ සිට පඩිපෙළ දිගේ සාප්පුවේ fදාරකඩ දක්වා අඩපණ වූ සිරුරු දෙක එසේ ඇදගෙන ආ දුර මීටර් 97කි. ඒ මුළු දිගටම දෙදෙනාගේ හිස්වලින් ගලාගිය ලේ පැල්ලම් දකින්නට ලැබුණු බව සාක්ෂිවලින් හෙළිවිය.

ජනාධිපති සමාව

මේ ද්විත්ව මනුෂ්‍ය ඝාතනය කළෝ කවුරුද? ඔවුහු අරගලයේ අරමුණු වෙනුවෙන් පෙනීසිටි අයද?
මරණ දණ්ඩනය නියමවූ පළමුවැනි විත්තිකරු වන ධනුෂ්‍ය ලක්ශාන්ත නිට්ටඹුව හන්දියේදී හැඳින්වෙන නම ‘බෝම්බ ධනුෂ්ක’ය. ඔහු ඒ නගරයේ ප්‍රසිද්ධ චරිතයකි. පටබැඳි නමෙන්ම ඒ ප්‍රසිද්ධිය පැහැදිලි වෙයි. ඒ හැර මරණ දණ්ඩනයට ලක්වූ අනෙක් විත්තිකරුවන් අතර සිටින්නේ, වඩේ විකුණන්නන්, නගරයේ නිකරුණේ හැසිරෙන්නන්, ත්‍රීවීල් පදවන්නන්, සමාජ විරෝධී ක්‍රියාවල යෙදෙන්නන් වැනි අයය. මේ පිරිස කවුද? ඕනෑම තැනක, කුමක් හෝ සිදුවීමකදී, මැදට පැන අයුතු වාසි ගන්නා, සාමාන්‍ය භාෂාවෙන් කියනවා නම්, ‘අපරාධවලට පහසුවෙන් නැඹුරුවීමේ විභවයෙන් යුත්’ පිරිසය. එම යෙදුමේ දිග පළල, දන්නා අය දන්නවා ඇත. ඔවුන් අතර විශ්වවිද්‍යාල ශිෂ්‍යයන් සිටියේ යැයි සමහරුන් කීවත් එවැන්නන් සිටියේ නැත.

මේ පිරිසේ හැටි සොබාව, නඩුවේ අධිචෝදනා පත්‍රයේ ඇති සමහර චෝදනාවලින්ද පෙනේ. ‘ ජීප් රථයේ අමතර රෝදය සහ පැතිදොරක් සොරා ගැනීම, මන්ත්‍රී අතුකෝරළ අතේ පැළඳ සිටි මුදු තුනක් සොරා ගැනීම, ඔහුගේ සාක්කුවේ තිබූ බිරිඳට අයත් ණය කාඩ්පතක් සොරාගැනීම සහ ඉන් නීති විරෝධී අන්දමින් භාණ්ඩ මිලදී ගැනීම’ එවැනි චෝදනාය. මේවා අරගලකරුවන්ගේ ගිණුමට බැර කළ හැකි දේවල්ද?

සමහරුන්, ජනාධිපති සමාව දෙන්නට යැයි කියන්නේ මෙවැනි අපරාධකාරයන් පිරිසකටද? මෙයින් අරගලයේ ම්ලේච්ඡත්වය පෙන්නුම් කරනවා යැයි තවත් සමහරුන් කියන්නේ, අරගලයට මෙලෝ සම්බන්ධයක් නැති මෙවැනි අපරාධකාරයන්ගේ අපරාධකාරී ක්‍රියාව පදනම් කරගෙනද?

ඝාතනයට බලපත්‍ර නැත

අමරසිරි අතුකෝරළ මන්ත්‍රීවරයාගේ ආරක්ෂක නිලධාරියා මුලින් වෙඩි තැබූ බව ඇත්තය. එහෙත්, මෙවැනි ම්ලේච්ඡ තිරශ්චීන ඝාතනයකට එය සාධාරණ වන හේතුවක් නොවේ. මහ පාර මැද මුල් වෙඩිතැබීමේ සිදුවීම වූ පසුව, ඇමතිවරයාත් සැරයන්වරයාත් දිව යන්නේ ජීවිතාරක්ෂාව පතා බව පැහැදිලිය. ඔවුන්ගෙන් ප්‍රහාරකයන්ට තවදුරටත් අනතුරක් නැත. තවදුරටත් අවි භාවිත කිරීමක්ද නැත. අවදානමක් තිබුණි නම් එයද අවසන් වී තිබිණ. එහෙත් ප්‍රහාරකයන් කළේ කුමක්ද? ජීවිතය බේරාගන්නට තට්ටු තුනක් නැගී ඉහළට ගිය දෙදෙනාට වටකරගෙන පහරදී (ගල්වලින්ද ඇතුළුව) ඔවුන් අඩපණ කර, මැරෙන තුරු ඔළු බිම වද්දාගෙන පඩිපෙළින් පහළට ඇදගෙන ඒමයි. පලායන දෙදෙනකුගෙන් මේ ප්‍රහාරකයන් පිරිසට ආත්මාරක්ෂාව පිළිබඳ අවදානමක් පැහැදිලිවම නොතිබුණි. මේ ඝාතන හදිසි කෝපයක් නිසා සිදුවූවක් බව කියන්නේ නොදන්නාවුන්ය. පැහැදිලිවම එය සිතාමතා හඹාගෙන ගොස් කළ, සාමූහික මනුෂ්‍ය ඝාතනයකි. පඩිපෙළින් පහලට කකුල්වලින් ඇදගෙන ඒමෙන්ම ඔවුන්ගේ තිරිසන් චේතනාවේ දිග පළල මැනැවින් පෙනේ.

නීති විරෝධී රැස්වීම

සිව්දෙනකු නීති විරෝධී රැස්වීමක සාමාජිකයන් වීම නිසා අත්හිටුවූ සිරදඬුවම් ලද්දාහ. ලංකාව වැනි රටක අපරාධයක් වන විට එය නරඹන්නට පිරිසක් පැමිණීම සාමාන්‍යයකි. අපරාධය ගමන්කරන විට ඔවුහුද ඒ අනුව යති. බිඳුණුවැව සමූහ ඝාතනය පිළිබඳ නඩු තීන්දුවේදී කියන ආකාරයට, එවැනි අය අපරාධය කිරීමේ පොදු අරමුණෙහි පිහිටා නැත. එහෙත් නීති විරෝධී රැස්වීමක සාමාජිකයෝය.

නීතිපතිවරයාගේ මුල් ස්ථාවරය වී තිබුණේ, නිට්ටඹුව නගරයේ මේ පිරිස එකතු වීමම නීති විරෝධී රැස්වීමක් බවයි. එහෙත් විනිසුරුවරුන් දෙදෙනා තීන්දුවෙන් කියන්නේ, මේ නීති විරෝධී රැස්වීමේ ඝාතනය කිරීමේ පොදු අරමුණ හටගන්නේ මුල් වෙඩි තැබීමෙන් පසුව බවයි. එය මුල සිටම මන්ත්‍රීවරයා ඝාතනය කිරීමේ වුවමනාවෙන් සිදුවූ රැස්වීමක් නොවේ. මන්ත්‍රී එහි පැමිණීම අහම්බයකි. මේ නිසා, එම පොදු අරමුණට සහභාගි නොවූ නමුත් නීති විරෝධී රැස්වීමට එකතුවූ හතර දෙනකුට වසර 5කට අත්හිටුවූ මාස 6ක සිරදඬුවම් නියම විය.මේ සිදුවීමට සම්බන්ධයක් නැතැයි පැහැදිලි වුණු අනෙක් සියලුම විත්තිකරුවෝ නිfදාස් කර නිදහස් කරන ලදහ.

රෙදි සාප්පුවේ සේවකයා

මරණීය දණ්ඩනය ලද අපරාධකරුවන් 12 දෙනාගෙන් එක් අයෙක් නිහාල් ෆැෂන් රෙදි සාප්පුවේ සේවකයෙකි. ඔහු කළේ මන්ත්‍රීවරයාත් ආරක්ෂකයාත් පරාණ බයේ උඩට දිව ගිය පසු, ඔවුන් උඩට ගිය බව ගල් පොලු අතින් ගත් ප්‍රහාරකයන්ට පෙන්වාදෙමින්, තුන්වැනි තට්ටුවට යන්නට එම අපරාධකාරයන්ට මගපෙන්වීමයි. මහ පාරේ රැස්ව සිටි අය අතර මේ විත්තිකරු නොසිටියත්, මේ අවස්ථාවේදී සාප්පුව තුළ සිටිමින් ඔහු අපරාධකරුවන්ට අපරාධය කිරීම සඳහා අවශ්‍ය මගපෙන්වීම පැහැදිලිවම කර තිබේ. අපරාධකරුවන් ඉහළට ගිය පසු, ලිෆ්ට් එකේ fදාරකඩ පෙට්ටි තබා වසාදමන ලද අතර, ඉහළින් පහළට එන්නටවත් පහලින් ඉහළට යන්නටවත් ඉඩ නැති තත්වයක් ඇතිවී තිබිණ. එය අපරාධකාරයන්ට මහත් පහසුවක් වූවාට සැක නැති.

ප්‍රහාරය තුන්වැනි මහලේ සිදුවුවත් එහි සීසීටීවී නොතිබුණ නිසා, පහරදීම පිළිබඳ රූප නැත. එහෙත් ඉහළට යන අපරාධකරුවන්, නැවත මරණකරුවන් දෙදෙනාගේ කකුල් දෙකෙන් අල්ලාගෙන පහළට ඇදගෙන එන අපරාධකරුවන්, පළමු දෙවැනි තට්ටුවල සීසීටීවී කැමරාවල මැනැවින් සටහන් වී තිබිණි.

වෝහාරික මුහුණු විශ්ලේෂණය

එහෙත්, ඒ රූපවල සිටින අය සහ විත්තිකූඩුවේ සිටින අය සමානද? වෙනස්ද? එය තහවුරු කිරීම මේ නඩුවේ වැදගත් කාරණයකි. එවැනි තහවුරු කිරීමකට ‘විද්‍යාවක්’ අවශ්‍ය වේ. පරීක්ෂණය, නිරීක්ෂණය හා නිගමනය යන මූලික සාධකවලින් තෘප්ත වන විද්‍යාවක් පමණි සාක්ෂි ආඥා පනතේ 45 වන වගන්තිය අනුව නඩුකරයකදී අදාළ කරගත හැක්කේ.

නීතිය දියුණු වත්ම, අලුත් නඩු තීන්දු නිකුත් වත්ම, මෙවැනි අලුත් ‘විද්‍යාවන්’ පිළිගත හැකි තත්වයකට පත්වෙයි. එක් උදාහරණයක් වන්නේ ඇඟිලි සලකුණුය. කාලයකට පෙර සිට, එය නඩුවකදී පැහැදිලි විද්‍යාත්මක සාක්ෂියක් ලෙස පිළිගැනෙයි. මෛත්‍රීපාල සිරිසේන ජනාධිපතිවරයාගේ කාර්ය මණ්ඩල ප්‍රධානියා විත්තිකරුවකු වුණු අල්ලස් නඩුවේදී චම්පා රාජරත්න, සම්පත් අබේකෝන් හා සම්පත් අබේරත්න යන විනිසුරු මඬුල්ල විසින්, පටිගත වුණු කටහඬක් විද්‍යාත්මක සාක්ෂියක් ලෙස පිළිගන්නා ලදි.

මේ නඩුවේදී සිදුවුණේ සීසීටීවී දර්ශනවල ඇතුළත් මුහුණු හා විත්තිකරුවන්ගේ මුහුණු සමාන වන බවට විශේෂඥ සාක්ෂි පැමිණිල්ලෙන් කැඳවීමයි. ඒ සඳහා පදනම් කරගත්තේ පළමු දෙවැනි මහල්වල සීසීටීවී කැමරා දර්ශනත්, මාධ්‍යවේදියකු විසින් පටිගත කරගන්නා ලද රංචු ප්‍රහාරයේ රූපමය දර්ශනත්ය. ඒවායේ සඳහන් මුහුණු හා විත්තිකරුවන්ගේ මුහුණු සංසන්දනය කර, ඒ මේ විත්තිකරුවන්ම බව විද්‍යාත්මකව තහවුරු කිරීම, සාක්ෂි දුන් විශේෂඥයා අතින් සිදුවිය. මේ වන විට, ෆේස් රෙකග්නිෂන් හෙවත් මුහුණු හඳුනාගැනීම, විසා නිකුත් කිරීම ආදි බොහෝ තැන්වල සිදුවුණත්, එය විද්‍යාත්මක සාක්ෂියක් ලෙස මුල්වරට ලංකාවේ නඩුවකදී පිළිගත්තේ මේ අවස්ථාවේදීය.

අඩි 4ක් උස නඩුවක්

අවුරුදු දෙකකටත් වැඩි කාලයක් ඇසුණු මේ නඩුවේ සාක්ෂි සටහන් පමණක් පිටු 10,000කින් සමන්විතය. එක උඩ තැබුවොත් සාක්ෂි සටහන්වල උස අඩි 4ක් පමණ වෙයි. පැමිණිලි-විත්ති පාර්ශ්වවල ලිඛිත සැලකිරීම් පිටු 600කට වැඩිය.
සුළුතර තීන්දුව දුන් විනිසුරුවරයා අවධාරණය කළ එක් කාරණයක් වන්නේ, සීසීටීවී කැමරා දර්ශන වෙනස් කරන්නට ඉඩ තිබුණේය යන්නයි. එම දර්ශන කොපි කරන විට පැය 9කට වැඩි කාලයක් ගතවී තිබීමද ඔහුගේ සැලකිල්ලට භාජනය වී තිබේ. සාමාන්‍යයෙන් මෙවැනි විශේෂ අවස්ථාවල මුල් සීසීටීවී දර්ශන (ඩීවීආර්) ලද වහාම හෑෂ් කිරීම හෙවත් සීල් තැබීම වැන්නක් විශේෂඥයන් අතින් සිදුවෙයි. එයින් පසු, එම මුල් දර්ශනවල දත්ත වෙනසක් කළ නොහැකිය. ඒවා ආරක්ෂිතය.

මරණ දඬුවම නියම කිරීමට පෙර කියන්නට දෙයක් තිබෙනවාදැයි විත්තිකරුවන්ගෙන් අසන ලද විට, ඔවුන් කී හැඟීම්බර කතාවලට ජනමාධ්‍යවල විශාල ඉඩක් වෙන්කර තිබිණ. විත්තිකරුවන් උසාවි බිමෙන් පිටතට ගෙන යන විට, පොළවේ හැපෙමින්, සිහි නැති කරගනිමින්, විලාප දෙමින් තමන්ගේ ඥාතීන්ගේ නිර්දෝෂිභාවය ගැන කතාකළ සමීපතමයන්ගේ ශෝකාලාපවලටද ජනමාධ්‍ය වැඩි ඉඩක් දී තිබිණ. එහෙත් ඒ කිසි දෙයකින් මේ ද්විත්ව ඝාතනයේ තිරිසන් ස්වභාවයත්, එහි නීතිමය වගකීමත් අඩු නොවේ. කොටින්ම, 2022 මැයි 9 වැනිදා මේ අපරාධකරුවන් පිරිස නිට්ටඹුවේදී හැසිරී තිබුණේ ඒ කියන තරම් අහිංසක ලෙස නොවේ.

නීතිපතිගේ අභියාචනාව

තමන් විසින් විත්තිකරුවන් 31 දෙනකුට විරුද්ධව මිනීමැරීමේ චෝදනා ඉදිරිපත් කරනු ලැබුවත්, එම චෝදනාවට වරදකරු කර තිබෙන්නේ 12 දෙනකු පමණක් බවත්, සමහර විට නීතිපතිවරයා මේ තීන්දුව පිළිබඳව අභියාචනා කරන්නට ඉඩ ඇති බවත්, අවසානයේදී උසාවිය ඇමතූ නියෝජ්‍ය සොලිසිටර් ජෙනරාල් ජනක බණ්ඩාර කියා තිබේ. එවැනි අභියාචනයක තවත් වැදගත්කමක් වන්නේ මහාධිකරණ තීන්දුවේ තිබෙන නීතිමය පිළිගැනීම් ගැන රටේ ඉහළම උසාවියෙන් විමර්ශනයක් කරනු ලැබීමය. එය, රටේ නීතියේ වපසරිය පුළුල් කිරීමට අනිවාර්යයෙන් හේතුවනු ඇත.

අතුකෝරළ ඝාතන නඩුව, ෆොරෙන්සික් ෆේස් රෙකග්නිෂන් හෙවත් වෝහාරික මුහුණු විශ්ලේෂණය මුල් වරට සිදුවූ නඩුව වනවා පමණක් නොව, ජීවිතය රැකගැනීමට පලාගොස් සැඟවුණු මිනිසුන් දෙදෙනකු හඹාගොස් තිරිසන් ලෙස පහර දී ඝාතනය කිරීමේ අපරාධය කළ අපරාධකරුවන් හා අරගලය අතර වෙනස සටහන් කළ නඩුවක්ද වන්නේය.
ජනාධිපති සමාව? ඔව්, එය ඔහේ තිබිච්චාවේ.