යාපනයේ යන්න බැහැ
කොළඹ සාක්ෂි දෙන්නම් ගෝඨා කියයි
2011 වර්ෂයේ දෙසැම්බර් 09 වන දින අතුරුදහන් කළ මානව හිමිකම් ක්‍රියාධරයන් දෙදෙනෙකු වන ලලිත් වීරරාජ් සහ කූගන් මුර්ගානන්දන් සම්බන්ධයෙන් ඔවුන්ගේ ඥාතීන් යාපනය මහේස්ත්‍රාත් අධිකරණය ඉදිරියේ ගොනු කර තිබෙන හබයාස් කෝපුස් නඩුකරයට අදාළව සාක්ෂි ලබාදීමට තමන් සූදානම් බව හිටපු ජනාධිපති ගෝඨාභය රාජපක්ෂ මහතා තම නීතිඥවරුන් මාර්ගයෙන් ශ්‍රේෂ්ඨාධිකරණයට ජුලි 30 දින දැනුම් දී ඇත.
එම නඩුකරයට අදාළව අභියාචනා පෙත්සමක් ශ්‍රේෂ්ඨාධිකරණයේ හමුවේ කඳවූ අවස්ථාවේ දී, හිටපු ජනාධිපති ගෝඨාභය රාජපක්ෂ වෙනුවෙන් පෙනී සිටි, ජනාධිපති නීතිඥ රොමේෂ් ද සිල්වා අධිකරණය හමුවේ මේ බව දැනුම් දී තිබිණි.
ආරක්ෂක හේතූන් මත ගෝඨාභය රාජපක්ෂ මහතාට යාපනය ප්‍රදේශයට යෑමට නොහැකි බවත්, යාපනය අධිකරණය හමුවට ගොස් සාක්ෂි ලබා දීමට තම සේවාදායකයාට නොහැකි බවත් කොළඹ ඕනෑම අධිකරණයකට තම සේවාදායකයාට පැමිණ සාක්ෂි ලබා දිය හැති බවත් නීතිඥ රොමේෂ් ද සිල්වා අධිකරණය හමුවේ පවසා තිබිණි.
ඒ අනුව ශ්‍රේෂ්ඨාධිකරණ විනිසුරු මඬුල්ල ජනාධිපති නීතිඥ රොමේෂ් ද සිල්වා මහතාට පවසා ඇත්තේ ජුලි 30 දින සිට සති හතරක ඇතුළත කාලය තුළ යාපනය මහේස්ත්‍රාත් අධිකරණය වෙත කරුණු ඉදිරිපත් කර සුදුසු නියෝග ලබාගැනීමට කටයුතු කරන ලෙසය.
ජනාධිපති නීතිඥ රොමේෂ් ද සිල්වා පවසා ඇත්තේ තම සේවාදායකයා අධිකරණය හමුවට පැමිණ ලලිත් කූගන් පිළිබඳව සාක්ෂි ලබා දීමට සූදානම් බැවින් මෙම අභියාචනා නඩු විභාගය අවසන් කරන ලෙසය. එම ඉල්ලීමට පෙත්සම්කාර පාර්ශ්වය වෙනුවෙන් පෙනී සිටින නීතිඥ නුවන් බෝපගේ එකඟතාව පළ කර ඇති අතර ඒ අනුව අභියාචනා පෙත්සම් විභාගය අවසන් කිරීමට අධිකරණය තීන්දු කර තිබිණි.
යසන්ත කෝදාගොඩ, කුමුදුනී වික්‍රමසිංහ සහ ශිරාන් ගුණරත්න යන මහත්ම මහත්මීන්ගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඬුල්ල ඉදිරියේ මෙම නඩුව කැඳවා තිබිණි.
2011 වර්ෂයේ අතුරුදහන් කර තිබුණු ලලිත් වීරරාජ් සහ කුගන් මුරුගානන්දන් වෙනුවෙන් ඔවුන්ගේ ඥාතීන් විසින් ගොනු කර තිබෙන නඩුකරයට අදාළව සාක්ෂි ලබාදීම සඳහා අධිකරණයේ හමුවේ පෙනී සිටින ලෙස 2019 වසරේ දී එවක හිටපු ආරක්ෂක ලේකම්වරයා වශයෙන් කටයුතු කළ ගෝඨාභය රාජපක්ෂ මහතා වෙත සිතාසි නිකුත් කර තිබිණි.
ආරක්ෂක හේතුන් මත තමන්ට යාපනය අධිකරණයට ගොස් සාක්ෂි දීමට නොහැකි බව සඳහන් කරමින් එම සිතාසි නිකුත් කිරීමේ තීරණයට එරෙහිව ගෝඨාභය රාජපක්ෂ මහතා අභියාචනාධිකරණය හමුවේ පෙත්සමක් ගොනු කර තිබුණු අතර එම පෙත්සම විභාග කළ අභියාචනාධිකරණය ගෝඨාභය රාජපක්ෂ මහතාට සාක්ෂි දීම සඳහා යාපනය මහේස්ත්‍රාත් අධිකරණය හමුවේ පෙනී සිටින ලෙස දන්වා නිකුත් කළ සිතාසිය බල රහිත කරමින් රිට් ආඥාවක් නිකුත් කර තිබුණි.
අභියාචනාධිකරණයේ එම තීන්දුව අහෝසි කරන ලෙස ඉල්ලා අතුරුදන්වූවන්ගේ ඥාතීන් විසින් ශ්‍රේෂ්ඨාධිකරණය හමුවේ මෙම අභියාචනා පෙත්සම ඉදිරිපත් කර තිබිණි.
කෙහෙළියගේ ප්‍රකාශය
ලලිත් කුමාර් වීරරාජ් සහ කූගන් මුරුදානන්දන් අතුරුදන් කරන ලද්දේ 2011 දෙසැම්බර් 09 වැනිදා යාපනයේදීය. බලහත්කාරයෙන් අතුරුදහන් කිරීම සාමාන්‍ය වූ කාලයක ලලිත්-කූගන් දෙදෙනාගේ අතුරුදහන් වීම ගැන කතාබහට ලක් වුණේ ඔවුන් දෙදෙනාද අතුරුදහන්වූවන් පිළිබඳව කරුණු එකතු කරමින් සිටි නිසාවෙනි. ඔවුන් සිටියේ අතුරුදන්වූවන් ගැන කරුණු රැසක් හෙළිදරව් කිරීමේ බලාපොරොත්තුවෙනි. ලලිත්ලා දේශපාලන සිරකරුවන් 117 දෙනෙකු ගැන තොරතුරු එකතු කර තිබුණි.
දෙසැම්බර් 15 වැනිදා කෙහෙළිය රඹුක්වැල්ල ඇමතිවරයා කීවේ, ලලිත් කූගන් මැරී නැති බවත්, ජීවතුන් අතර සිටින බවත් ඔවුන් දෙන්නා මහේස්ත්‍රාත් අධිකරණයකට ඉදිරිපත් කරන බවත්ය.
කූගන් මුරුගානන්දන් යනු යාපනයේ සිටි කෙනෙකි. දෙමළ විමුක්ති කොටි සංවිධානයේ සාමාජිකයෙකුව සිටි ඔහු පසුකාලීනව එයින් ඉවත් වී යාපන සමාජය තුළ මානව හිමිකම් ක්‍රියාකාරිකයෙකු ලෙස ක්‍රියාත්මක විය.
2016 මැයි 13 වැනිදා කෙහෙළිය රඹුක්වැල්ල යාපනය මහේස්ත්‍රාත් අධිකරණයට කැඳවූ මොහොතේදී කියා තිබුණේ, නිශ්චිත වශයෙන්ම 2011 දෙසැම්බර් 15 වන විට ඔවුන් රජයේ ආරක්ෂක අංශ භාරයේ සිටි බවත්, එයින් පසු සිදු වූ දේවල් ගැන තමන්ට වගකීමක් නැති බවත්, ඒ වෙද්දී ආරක්ෂක අංශවල ප්‍රධානීන් ලලිත් කුමාර් සහ කූගන් අත්අඩංගුවට ගැනීමක් ගැන දැනුම් දුන් බවත්ය.
ඔහු සමඟ වැඩ කළ ලලිත්, දකුණෙන් ගිය කෙනෙකි. අවිස්සාවේල්ලේ සිටි කෙනෙකි. ඔහු ජයවර්ධනපුර විශ්වවිද්‍යාලයේ අනධ්‍යයන සේවකයෙකු ලෙස සිටියදී ජනතා විමුක්ති පෙරමුණ සමඟ එකතු වූවෙකි. එයින් පසු, 2011 අතුරුදන්වීමට මාස කිහිපයකට පෙර පක්ෂයෙන් ඉවත් වූ කණ්ඩායමට අයිති වූවෙකි. ජන අරගල ව්‍යාපාරය නමින් එකල ක්‍රියාත්මක වූ කණ්ඩායමේ සිටි කෙනෙකි.
ලලිත් හා කුගන් පැහැරගැනීම සිදු වී ඇත්තේ දෙසැම්බර් 09 වැනිදා පස්වරු 5.30 පසු වී කෙටි කාලයක් තුළ බවට අධිකරණයට සාක්ෂි ඉදිරිපත් වී තිබිණි. යාපනය, අවරන්ගල්හි කුගන්ගේ නිවසේ සිට ඔවුන් දෙදෙනා යාපනය බලා පිටත්ව ගොස් තිබුණේ පස්වරු 5ට පමණ බව අසල්වැසියන් සාක්ෂි දී තිබේ. පසු දින, එනම් දෙසැම්බර් 10 වැනිදා ලෝක මානව හිමිකම් දිනය වෙනුවෙන් පැවැත්වීමට නියමිතව තිබූ වැඩසටහනක් සංවිධානය කිරිමට බව අනාවරණය වී තිබිණි.
නිවසින් පිටව ගිය ලලිත් සහ කූගන් පිළිබඳව කිසිදු තොරතුරක් ලැබී නැත. කෙසේ වෙතත් ඔවුන් ගමන් ගත්, කුගන්ගේ යතුරු පැදිය දෙසැම්බර් 14 වැනිදා අච්චුවේලි පොලිසියේ තිබෙනු දැක ඇත්තේ කුගන්ගේ බිරිඳ විසිනි.
කුගන්ගේ බිරිඳ අච්චුවේලි පොලිසියෙන් යතුරුපැදිය පිළිබඳව විමසූ නමුත් පොලිසිය ඇයට පවසා ඇත්තේ දෙසැම්බර් 13 වැනිදා කෝපායි පොලිසිය විසින් කෝපායි කෝවිල අසල තිබී මෙම යතුරු පැදිය තමන් භාරයට ගෙන තිබුණු බවයි. මෙම යතුරුපැදිය සම්බන්ධයෙන් නිර්වේලි ප්‍රදේශවාසීන් විසින් ෂන්මුගන් වඩිවේල් නම් එවකට එම ප්‍රදේශයේ රාජකාරි කළ ග්‍රාම නිලධාරියාට දැනුම් දී ඇත්තේ 09 වැනිදාය.
යාපනය – පේදුරුතුඩුව මාර්ගයේ නිර්වේලි ප්‍රදේශයේදී ලලිත් සහ කුගන් දෙදෙනා ගමන් කළ යතුරුපැදිය වෑන් රථයකින් සහ යතුරු පැදි දෙකකින් පැමිණි පිරිසක් නතර කළ බවට සාක්ෂි ඉදිරිපත් වී තිබිණි.
ගෝඨා සාක්ෂිකරුවෙක්
2019 වර්ෂයේ ආරම්භයේදී ලලිත් කූගන් නඩුව සම්බන්ධයෙන් සාක්ෂිකරුවෙකු ලෙස ගෝඨාභය රාජපක්ෂ මහතා අධිකරණයට කැඳවීමට අධිකරණයෙන් නීතිඥ නුවන් බෝපගේ සිතාසි ලබා ගෙන තිබිණි. එහෙත් ගෝඨාභය මහතා වෙනුවෙන් අධීකරණය වෙත ඉදිරිපත් වූ නීතිඥවරයෙකු පවසා තිබුණේ තම සේවාදායකයාට සැත්කමක් කර ඇති නිසා අධිකරණයට ඉදිරිපත් වීමට නොහැකි බවත්, ඔහු සුව වූ පසුව අධිකරණයට ඉදිරිපත් කළ හැකි බවත්ය.
ඉන්පසුව 2019 වර්ෂයේ පැවැත්වූ ජනාධිපතිවරණයට මාස 4ක් තිබියදී, ගෝඨාභය රාජපක්ෂ මහතා අභියාචනාධිකරණය හමුවේ පෙත්සමක් ඉදිරිපත් කර, අගතියට පත් පාර්ශ්වයන් නොකැඳවාම නියෝගයක් ගෙන තිබිණි. ඉන්පසුව පැමිණි ජනාධිපතිවරණයෙන් ගෝඨාභය රාජපක්ෂ විධායක ජනාධිපතිවරයා ලෙස පත් වූ අතර උක්ත අභියාචනා නඩුව සම්බන්ධයෙන් තීන්දුවක් ලබා දී තිබිණී. ඒ ගෝඨාභය රාජපක්ෂ මහතා එවක ජනාධිපතිවරයා බැවින්, ඔහුට ජනාධිපති මුක්තිය තිබෙන බවය. එහෙත් ගෝඨාභය මහතා නඩුවේ සාක්ෂිකරුවෙකු පමණය.
2022 වර්ෂයේ හිටපු ජනාධිපතිවරයා ඔහුගේ ධුරයෙන් ඉල්ලා අස්වූ පසු 2022 වර්ෂයේ ඔක්තෝබර් 19 දින නීතිඥ නුවන් බෝපගේ අදාල නඩුව ශ්‍රේෂ්ඨාධිකරණය තුළ අභියාචනයට ලක් කර තිබිණි. එහිදී පෙත්සම්කාර පාර්ශ්වය වෙනුවෙන් පෙනී සිටි නීතිඥ නුවන් බෝපගේ අධිකරණය හමුවේ කරුණු දක්වමින් එම පෙත්සමේ වගඋත්තරකරු වශයෙන් නම් කර සිටින හිටපු ජනාධිපති ගෝඨාභය රාජපක්ෂ වෙත නොතීසි යවා තිබෙන බව අධිකරණයට දන්වා තිබිණි. එහෙත් රාජපක්ෂ මහතා වෙනුවෙන් කිසිදු නීතිඥවරයකු පෙනී සිට නොමැති නිසා ගෝඨාභය රාජපක්ෂ මහතා වෙත යළි නොතිසි නිකුත් කරන මෙන් පෙත්සම්කාර පාර්ශ්වයේ නීතිඥවරයාට දැනුම් දුන් ශ්‍රේෂ්ඨාධිකරණය පෙත්සම යළි දෙසැම්බර් මස 15 වනදා කැඳවන ලෙස නියෝග කර තිබිණි.
