‘ධර්ම චක්‍රයක්’ සහිත ඇඳුමක් ඇඳ සිටියේ යැයි පවසමින් 2019 වර්ෂයේදී හසලක පොලිසිය කාන්තාවක අත්අඩංගුවට ගෙන රඳවා තබාගැනීම තුළින් ඇගේ මූලික අයිතිවාසිකම් හසලක පොලිස් ස්ථානාධිපතිවරයා උල්ලංඝනය කර ඇති බවට ශ්‍රේෂ්ඨාධිකරණය ජුලි 30 දින තීන්දු කර තිබිණි.
මෙසේ මූලික අයිතිවාසිකම් උල්ලංඝනය වී ඇති බව තීන්දු වී තිබුණේ කොලොන්ගොඩ ප්‍රදේශයේ පදිංචි අබ්දුල් රහීම් මසහීනා මහත්මිය 2019 වර්ෂයේ ජුනි 14 දින ශ්‍රේෂ්ඨාධිකරණයට ඉදිරිපත් කළ මූලික අයිතිවාසිකම් පෙත්සමක් විභාග කිරීමෙන් අනතුරුව කුමුදුනී වික්‍රමසිංහ, ශිරාන් ගුණරත්න යන විනිසුරුවරුන්ගේ එකඟත්වය මත ශ්‍රේෂ්ඨාධිකරණ විනිසුරු යසන්ත කෝදාගොඩ මෙම තීන්දුව ප්‍රකාශයට පත් කර තිබිණි.
2019 වර්ෂයේ මැයි 17 වන දින හසලක පොලිසියේ නිලධාරීන් පිරිසක් විසින් “ධර්ම චක්‍රය” සහිත ඇඳුමක් හැඳ සිටියේ යැයි මසහීනා මහත්මිය අත්අඩංගුවට ගෙන රඳවා තබාගෙන සිටිමට කටයුතු කර තිබිණි.
මෙම අත්අඩංගුව පිළිබඳව එවක සමාජ මාධ්‍ය හරහා බොහෝ වශයෙන් කතාබහට ලක් වුණු අතර අත්අඩංගුවට පත්වූ කාන්තාව ඇඳසිටින්නේ ධර්ම චක්‍රයක් සහිත රුව නොවන බවත් නැවක සුක්කානමක රුවක් බවත් කතාබහට ලක්විය.
කොළොන්ගොඩ, පුදලු‍ගස්යාය ප්‍රදේශයේ පදිංචි අබ්දුල් රහීම් මසහීනා මහත්මිය ගොනු කළ අදාළ පෙත්සමේ වගඋත්තරකරුවන් ලෙස නීතිපතිවරයා, හසලක පොලිස් ස්ථානාධිපති චන්දන නිශාන්ත සහ පොලිස්පතිවරයා නම් කර තිබිණි.
පෙත්සම්කාරිය එක්දරු මවක වන අතර කලක් සෞදි අරාබියේ ගෘහ සේවයේ නියුතුව පසුව වෘත්තීය වශයෙන් ඇඳුම් මසන්නියක ලෙස කටයුතු කර ඇත. පෙත්සම්කාරිය හසලක පොලිසිය අත්අඩංගුවට ගත් අවස්ථාවේදී ඇය ඇඳ සිටි මැක්සි ගවුම ධර්ම චක්‍රයක රුව බව පවසා තමන්ව අත්අඩංගුවට ගත්තද එම රුව සුක්කානමක රුවක් බවත් තම අත්අඩංගුවට ගැනීම නීතියට පටහැනි බවත් ඇය තම පෙත්සමේ සඳහන් කර තිබිණි.
එබැවින් මෙම පෙත්සම විභාගයට ගැනීමට අවසර ලබා දෙන ලෙසත්, තමන්ගේ මූලික අයිතිවාසිකම් කඩවී ඇති බව ප්‍රකාශ කරන ලෙසත් තමන් අත්අඩංගුවට ගැනිම සම්බන්ධයෙන් වන්දි ලබා දෙන ලෙසත් අත්අඩංගුවට ගත් නිලධාරීන්ට පරීක්ෂණයක් පවත්වා දඬුවම් ලබා දෙන ලෙසත් පෙත්සම්කාරිය තම පෙත්සම මඟින් ඉල්ලා තිබිණි.
ඒ අනුව මසහීනා මහත්මිය අත්අඩංගුවට ගත් හසලක පොලිසිය සහ එම පොලිස් ස්ථානයේ ස්ථානාධිපතිවරයා ලෙස කටයුතු කළ පොලිස් පරීක්ෂක චන්දන නිශාන්ත ඇගේ මූලික අයිතිවාසිකම් උල්ලංඝනය කර ඇති බවත් පොලිස් පරීක්ෂක චන්දන නිශාන්ත විසින් ඔහුගේ පෞද්ගලික මුදල් වලින් රුපියල් 30,000 ක මුදලක් පෙත්සම්කාරියට ගෙවිය යුතු බවත් විනිසුරු මඬුල්ල විසින් නියෝග කර තිබිණි.
වන්දි මුදල් ගෙවීම සඳහා පොලිස් දෙපාර්තමේන්තුවේ අරමුදල් හෝ පොලිස් සාමූහිකයේ අරමුදල් භාවිත නොකළ යුතු බවත් ඒ බව පොලිස්පතිවරයා විසින් ලිඛිතව සහතිකයක් අධිකරණයට ලබා දිය යුතු බවත් අධිකරණය ලබා දුන් නියෝගයේ සඳහන් කර ඇත.
තවද එක්සත් ජාතීන්ගේ සිවිල් හා දේශපාලන අයිතිවාසිකම් පිළිබඳ සම්මුති පනතේ 3(1) වගන්තිය යටතේ සැකකරුවන් අත්අඩංගුවට ගැනීමේදී, අනුගමනය කළ යුතු ක්‍රියාමාර්ග ගැන පැහැදිලි කිරීම් දැක්වෙන චක්‍රලේඛයක් නීතිපතිවරයාගේ අනුමැතියට යටත්ව පොලිස් ස්ථානවලට නිකුත් කිරීමට පියවර ගන්නා ලෙසත් ශ්‍රේෂ්ඨාධිකරණය පොලිස්පතිවරයාට නියෝග කර තිබිණි.
