‘අම්මේ, මට වුණ දේ වෙන ළමයෙක්ට වෙන්න එපා”‍ කියලා ඇය මුල ඉඳලාම කිව්වා

දුව මැරුණේ ගුරුවරයා නිසා – අම්ෂිකාගේ මව කියයි

පාසල් ගුරුවරයා ගැන පැමිණිල්ලක් ලැබිලා නැහැ – පොලිසිය

අප්‍රේල් 29 දින කොටහේන, ගල්පොත්ත වීදියේ මහල් නිවාස සංකීර්ණයක 7 වන මහලෙන් පැන අවුරුදු 16 හැවිරිදි සිසුවියක මියගොස් තිබිණි. ඇය එම මහල් නිවාස සංකීර්ණයෙන් බිමට පනින ආකාරය දැක්වෙන සීසීටීවී දර්ශන සමාජ මාධ්‍ය ජාලා තුළ ඇගේ මරණයත් සමඟ සංසරණය වීමට පටන්ගෙන තිබුණු අතර සිසුවිය සියදිවි නසා ගත්තේ ඇයි දැයි විවිධ අදහස් පළවිය.

දිල්ෂි අම්ෂිකා නැමැති මෙම සිසුවිය උඩු මහලේ සිට බිමට පැන ඇති අතර මහල් නිවාසය අසළින් ගමන් කරන මාර්ගයට පතිත වී බරපතළ තුවාල ලැබූ ඇය කොළඹ ජාතික රෝහලට ඇතුළත් කිරීමෙන් පසුව මිය ගොස් තිබිණි.

තම දියණියගේ දිවිනසා ගැනීමට හේතුව කුමක්දැයි අදහස් දක්වමින් දිල්ෂි අම්ෂිකාගේ මව මෙසේ පැවසීය.
“මගේ දුව දක්ෂ ළමයෙක්. දුව කලින් ඉගෙන ගත්ත පාසලේ ගුරුවරයා දුවට කරදරයක් කළ නිසා ඇය සියදිවි හානි කර ගත්තේ. ඇය මේ අවුරුද්දේ සාමාන්‍ය පෙළ විභාගය ලියන්න හිටිය දරුවෙක්. මගේ දුව කලින් ඉගෙන ගත්තේ බම්බලපිටිය රාමනාදන් හින්දු බාලිකා විද්‍යාලයේ. ඒ විද්‍යාලයේ ගුරුවරයෙක් මගේ දුව ලිංගික අතවරයකට ලක් කළා. දුව ඒ ගැන අපිට කිව්වා. අපි ඒ ගැන කියද්දි ඒ ගුරුවරයා අපිට චෝදනා කළා මගේ දුව බොරු කියනවා කියලා.”

සිසුවිය රාමනාදන් හින්දු බාලිකා විද්‍යාලයේ අධ්‍යාපනය ලබමින් සිටි අතර, ඇයට ලිංගික හිංසනයක් සිදුවී ඇති බව දෙමව්පියන්ට දැනුම් දීමෙන් පසුව, වෛද්‍ය වාර්තා ලබා ගැනීමෙන් අනතුරුව බම්බලපිටිය පොලිසිය ගුරුවරයා අත්අඩංගුවට ගෙන පසුව ඇප මත නිදහස් කර තිබුණි.

“ඉස්කෝලේ ගුරුවරු මගේ දුවව මානසික රෝගියෙක් බවට පත් කළා. ඒ ඉස්කෝලෙට දුවව ආපහු යවන්න බැරි නිසා දුවව මම ඉස්කෝලෙන් අස්කරගත්තා. මගේ දරුවා රෝහල් ගත කරලා ඇයට ප්‍රතිකාර ලබා දීලා, නැවත යථා තත්වයට ගෙන ආවා”

“මගේ දුවව වෛද්‍යවරයකු වෙත ගෙනගියා. ඇය ලිංගික අතවරයකට ලක් වෙලා තිබෙන බව වෛද්‍යවරයා තහවුරු කළා. ඉන්පස්සේ වෛද්‍යවරයා පොලිසියට දන්වා දුවට අපරාධය කළ ගුරුවරයාව අත්අඩංගුවට ගත්තත් ඔහුට ඇප ලබාදුන්නා. පොලිසිය අපෙන් ප්‍රකාශයක් සටහන් කරගත්තා. නමුත් අපි දන්නේ එපමණයි. මට ඕනෑ වුණේ මගේ දරුවාව ආරක්ෂා කරගන්න. ඒ නිසා ගුරුවරයාට නීතිය ක්‍රියාත්මක වුණාද කියා මම ආපහු සොයා බැලු‍වේ නැහැ”

තම දියණියගේ සිද්ධිය සම්බන්ධයෙන් චෝදනාවට ලක්වූ ගුරුවරයාට ඇප ලබා, දැරියගේ පැරණි පාසලේ ඔහු දිගටම ඉගැන්වීමේ කටයුතු කරන බව ඇය පැවසීය. මුල් පාසලෙන් ඉවත් කර ගැනීමෙන් අනතුරුව තම දියණිය කොටහේන ප්‍රදේශයේ වෙනත් පාසලකට ඇතුළත් කළ බවත්, එහිදී ගුරුවරුන් ඇයව හොඳින් රැකබලා ගත් බවත් මව පැවසීය.

කෙසේවෙතත් තම දියණිය ඉගෙනුම ලැබීමට ගිය පෞද්ගලික උපකාරක පන්තියකදී ගුරුවරයකු සෙසු සිසුන් ඉදිරියේ දැරියට ප්‍රසිද්ධියේ අවමන් කර ඇගේ දියණියට සිදු වූ අතවරයේ සිද්ධියේ තොරතුරු හෙළිකරමින් ඇය පොලිස් විමර්ශනයකට සම්බන්ධ බව පවසමින්, පන්තිවලට නොඑන ලෙස පැවසීම දියණියට මානසිකව බලපෑ බවද මව පවසයි.

“මගේ දුව ඉගෙන ගන්න ගිය කොටහේනේ රාජේෂ්වරී කියන උපකාරක පංති පැවැත්වෙන ආයතනයේ ශිවනන්දන් කියන ගුරුවරයා පෙබරවාරි 15 වෙනිදා අනෙක් ළමයි ඉස්සරහා දුවව නැගිට්ටවලා, දුව අතවරයට ලක්වුණ සිද්ධිය කියලා ඇයට නින්දා කර තිබුණා. ඔයා පොලිස් කේස් එකක් තියෙන දරුවෙක්. ඒ නිසා ආපහු පංතියට එන්න එපා කියලා ඒ ගුරුවරයා ප්‍රසිද්ධියේ මගේ දුවව උපහාසයට ලක්කරලා තිබුණ. ඒ සිද්ධියෙන් පස්සේ දුව ගෙදර ඇවිත් හොඳටම ඇඬුවා.”

“ඇය මට කිව්වේ හැමෝම ඉස්සරහ උපකාරක පංතියේ ගුරුවරයා තමන්ව නැඟිට්ටවලා නින්දා කළා කියලා.”

“දුවගේ උපකාරක පංතියේ ඒ ගුරුවරයා පසුගිය පාර්ලිමේන්තු ඡන්දයට ඉදිරිපත් වෙලා පැරදුණ කෙනෙක්. මේ සැරේ නගර සභා ඡන්දයෙන් ඔහු ඡන්දය ඉල්ලනවා.”

“ඒ සිද්ධියෙන් පස්සේ මගේ දුව ආපහු හොඳටම මානසිකව වැටුණා. ඉන්පස්සේ දුවගේ විශාදය ආපහු වැඩි වුණා. උපකාරක පංතියේ සිද්ධියෙන් පස්සේ, දුවගේ අලු‍ත් ඉස්කෝලේ ළමයි හැමෝම මගේ දුව අපයෝජනයට ලක්වුණු සිදුවීම දැනගෙන තිබුණා. ඒ නිසා පංතියේ ඇතුළේදී ළමයි දුව එකක් කතා කරන එක නවත්වලා තිබුණා.”

“ළමයි මගේ දුවව තනිකලා. මගේ දුව හැම තැනකදිම තනිවුණා. ඒ සිද්ධියෙන් පස්සේ දුවගේ හොඳම යාළු‍වන්ගෙන් පවා ඇය වෙන්වුණා. දුවට පාසල ඇතුළේ ළමයින්ගෙන් වුණ කොන්කිරීම් දරාගන්න බැරි වුණා. මගේ දරුවාට කොහේවත් යන්න බැරි තත්ත්වයක් පෞද්ගලික පංතියේ ගුරුවරයා ඇති කළා.”

“මේ සිද්ධිය ගැන හැමෝම දුවගෙන් ප්‍රශ්න කළා. මගේ දුව කිසිම වැරැද්දක් කළේ නැති දරුවෙක්. වැරැද්දක් වුණේ ඇයට. ඒත් අනෙක් අය හැමෝම වැරදිකාරයෙක් කළේ මගේ දුවව. දුවගේ චරිතය හොඳ නැහැ කියා තොරතුරු ප්‍රචාරය කළා. මගේ දුව වින්ද වේදනාව දන්නේ මම විතරයි. මගේ දරුවා සියදිවි හානි කර ගන්න තීරණය කළේ මේ සමාජයේ එයාට ජීවත් වෙන්න බැහැ කියලා. මගේ දරුවාට වුණ මේ දේ වෙන කිසි දරුවෙකුට වෙන්න හොඳ නැහැ” මව පැවසීය.

“ මගේ දුවට කරදර කරපු අය අදටත් හොඳින් සතුටින් ඉන්නවා, ඒත් කරදරයට ලක් වුණු මගේ දුවව සමාජය පිළිකුල් කළා, ඒ නිසා පාසල් යන්නේ නැහැ කියලා ඇය කිව්වා. අපිට පුළුවන් දේ අපි ඇයට කළා. ඇයව ඒ තත්ත්වයෙන් ගොඩ ගන්න අපි මහන්සි වුණා. මගේ දරුවාට උදව් කරන්න කවුරුත් ඉදිරිපත් වුණේ නැහැ. කවුරුවත් කතා කළේත් නැහැ. දුවගේ මරණයට හේතුවු කාරණාව තවත් දරුවෙකුට වෙන්න එපා කියා මම දෙවියන්ගෙන් ඉල්ලනවා. අම්මේ, මට වුණ දේ වෙන ළමයෙක්ට වෙන්න එපා කියලා ඇය මුල ඉඳලම කිව්වා.

පෞද්ගලික පන්ති කාමරයක දී ඇයව නැගිට්ටවලා සියලු‍ දෙනා ඉදිරියේ අවමන් කළා. ඒ නිසා තමයි ඇය වැරදි තීරණයක් අරගෙන දිවි හානි කර ගත්තේ. මගේ දරුවාගේ මරණයට හේතු වූ අයට දඬුවම් කරලා නීතියෙන් අපිට සාධාරණයක් ලැබෙන්න ඕනෑ.”

පාසල් තුළ කිසියම් සිදුවීමක් සිදුවුවහොත් අධ්‍යාපන අමාත්‍යාංශය මැදිහත් වී විමර්ශනය කිරීම අනිවාර්ය වන නමුත්, මෙම අවස්ථාවේ දී එය සිදුකිරීමට අමාත්‍යාංශය අපොහොසත් වූ බව ලංකා ගුරු සංගමයේ ලේකම් ජෝසප් ස්ටාලීන් මහතා පෙන්වා දුන් අතර අම්ෂිකාගේ මරණය සම්බන්ධයෙන් ඔහු මෙසේ අදහස් දැක්වීය.

“සිසුවිය අපයෝජනය වුණ සිද්ධිය 2023 ඔක්තෝබර් 10 දිනට පෙර වුණ සිදුවීමක්. මේ දරුවට වුණ අසාධාරණය ගැන පාසලේ බලධාරීන් කිසිදු ක්‍රියාමාර්ගයක් අරගෙන නැහැ. අදාළ ගුරුවරයා සම්බන්ධයෙන් කිසිදු විනය පියවරක් ගෙන නැහැ. ඒ වෙනුවට, දැරිය මානසික ආබාධයකින් පෙළෙනවා කියා සමාජ මතයක් ගොඩනංවලා. ඉන්පස්සේ දරුවාගේ දෙමව්පියෝ ඇයව කොටහේන වෙත අධ්‍යාපනය සඳහා යොමු කරලා.

මේ සිද්ධිය වෙලා තියෙන්නේ රජයේ පාසලක. දෙමළ කතාකරන නිලධාරීන් ඉන්නවා. රජයේ පාසල් කීපයකම ළමයින්ගේ පැමිණිලි වාර්තා වුණත් මේවා විභාග කරන්නේ නැහැ. ඒ අය කරන්නේ නැහැ. දරුවකුගේ ජීවිතය නැතිවෙනකම් බලාගෙන ඉන්නවා. දිල්ෂි අම්ෂිකාගේ මරණය කනගාටුදායක සිද්ධියක්. ඇයට සිදුවූ සිද්ධිය සම්බන්ධයෙන් දෙමාපියන් යුක්තිය ඉල්ලා සටන් කළා. ඒත් තමන්ගේ දරුවා ගැන හිතලා අවසානයේ දී දෙමව්පියන් ඒ දරුවාව පාසලෙන් ඉවත් කර වෙනත් පාසලකට මාරු කළා. සංඛ්‍යා ලේඛන අරගෙන බැලු‍වාම, පාසල් වයසේ දරුවන් සිය දිවි හානි කරගැනීම්, ඒ සඳහා උත්සාහ කළ අවස්ථාවන්, උත්සාහ කර දිවි ගලවා ගත් දරුවන් ගණනාවක් සිටිනවා. මේ ගැන අධ්‍යාපන අමාත්‍යාංශය පියවර ගන්නේ නැද්ද?” ඒ මහතා අසයි.

සිසුවියගේ මරණය සම්බන්ධයෙන් කොටහේන පොලිසියෙන් කරගෙන යනු ලබන විමර්ශනය සම්බන්ධයෙන් අනිද්දා කළ විමසීමේදී පොලිස් මාධ්‍ය කොට්ඨාසයේ නිලධාරියෙකු පැවසූවේ අම්ෂිකාගේ සියදිවිනසා ගැනීම සම්බන්ධයෙන් නඩුවිභාගයක් අධිකරණය හමුවේ විභාග වෙන බවය. සිසුවිය අපයෝජනයට ලක් කළ ගුරුවරයා සම්බන්ධයෙන් විමර්ශනයක් ආරම්භ කර ඇති දැයි අප කළ විමසීමේදී ඒ නිලධාරියා පැවසූවේ බම්බලපිටියේ අදාල විද්‍යාලයේ ගුරුවරයා ගැන මේ වන තෙක් කිසිදු පැමිණිල්ලක් ලැබී නොමැති නිසා ඔහු සම්බන්ධයෙන් විමර්ශනයක් සිදු නොවන බවත් මැයි 04 වන දින ලංකා ගුරු සංගමයේ කාර්යාලයේ මිය ගිය සිසුවියගේ මාපියන් කැඳවා සිදු කළ මාධ්‍ය සාකච්ඡාව සහ සමාජ මාධ්‍ය තුළ අම්ෂිකාගේ සියදිවිනසා ගැනීම සම්බන්ධයෙන් හුවමාරු වන පුවත් සම්බන්ධයෙන් විමර්ශනයක් ආරම්භ කර ඇති බවත්ය. කොටහේන පොලිසිය පවසන්නේ සිසුවිය විශාදය නිසා සියදිවි හානි කරගත් බවය.