No menu items!
27 C
Sri Lanka
16 November,2026

කාවන්තිස්ස හස්තියාගේ මරණය ගැන කාරක සභා යෝජනාවට තීරණයක් නොගැනීමෙන් විපක්ෂයේ වරප්‍රසාද උල්ලංඝනය වෙලා – විපක්ෂ නායක

Must read

කාවන්තිස්ස හස්තියාගේ මරණය සම්බන්ධයෙන් විශේෂ පාර්ලිමේන්තු තේරීම් කාරක සභාවක් පත් කරන ලෙස විපක්ෂය ඉදිරිපත් කළ යෝජනාව සම්බන්ධයෙන් මෙතෙක් තීරණයක් නොගැනීම හේතුවෙන් සිය පාර්ලිමේන්තු වරප්‍රසාද උල්ලංඝනය වී ඇති බවට විපක්ෂ නායක සජිත් ප්‍රේමදාස මහතා චෝදනා කරයි.

ඒ සම්බන්ධයෙන් විධිමත් පරීක්ෂණයක් පවත්වන ලෙස ඉල්ලා විපක්ෂ නායකවරයා අද (16) කථානායකවරයා වෙත ලිපියක් භාර දී තිබේ.

2026 ඔක්තෝබර් 16 වැනිදා කාවන්තිස්ස හස්තියාගේ මරණය සිදුවීම සම්බන්ධයෙන් සත්‍ය තොරතුරු අනාවරණය කර ගැනීම, අදාළ පාර්ශ්වයන් සිය වගකීම් නිසි පරිදි ඉටු කළේද යන්න විමර්ශනය කිරීම සහ මෙවැනි ඛේදජනක සිදුවීම් අනාගතයේදී වළක්වා ගැනීමට ගත යුතු ක්‍රියාමාර්ග හඳුනා ගැනීම සඳහා විශේෂ පාර්ලිමේන්තු තේරීම් කාරක සභාවක් පත් කරන ලෙස විපක්ෂය ඉල්ලා තිබිණි.

ඒ සඳහා තමන් ඇතුළු විපක්ෂයේ පාර්ලිමේන්තු මන්ත්‍රීවරුන් සකස් කළ යෝජනාව 2026 ඔක්තෝබර් 23 වැනිදා කථානායකවරයා වෙත නිල වශයෙන් භාර දුන් බව සජිත් ප්‍රේමදාස මහතා සිය ලිපියේ සඳහන් කර තිබේ.

එම යෝජනාව ඉදිරිපත් කිරීමෙන් පසුව පාර්ලිමේන්තු කටයුතු පිළිබඳ කාරක සභාව අවස්ථා තුනකදී රැස්වී තිබුණ ද, අදාළ යෝජනාව සම්බන්ධයෙන් කිසිදු තීරණයක් ගෙන නොමැති බව ඔහු පෙන්වා දෙයි. එසේ තිබියදී පසුව ඉදිරිපත් කළ වෙනත් යෝජනා සඳහා ප්‍රමුඛතාව ලබා දෙමින් කටයුතු කර ඇති බව ද ලිපියේ සඳහන් වේ.

කාවන්තිස්ස හස්තියාගේ මරණය ඇතුළු වනජීවී සම්පත් සම්බන්ධයෙන් පවතින ජාතික වැදගත්කම සහ හදිසි අවශ්‍යතාව පිළිබඳව ආණ්ඩුව ප්‍රමාණවත් අවධානයක් යොමු කර නොමැති බවට මෙම තත්ත්වය තුළ සාධාරණ සැකයක් මතුවන බව ද විපක්ෂ නායකවරයා පවසයි.

එමෙන්ම, මෙම ජාතික වැදගත්කමකින් යුත් කරුණ සම්බන්ධයෙන් පාර්ලිමේන්තුව තුළ සිය දායකත්වය ලබාදීමට විපක්ෂයට තිබූ අවස්ථාව අහිමි වීම කනගාටුදායක තත්ත්වයක් බව ඔහු සඳහන් කරයි.

මෙම ක්‍රියාකලාපය හේතුවෙන් විපක්ෂ නායකවරයා ලෙස තමන් වෙත පැවරී ඇති ව්‍යවස්ථානුකූල හා පාර්ලිමේන්තුමය වගකීම් ඉටු කිරීමටත්, පාර්ලිමේන්තු කටයුතු සඳහා අර්ථවත් හා ඵලදායී ලෙස සහභාගී වීමටත් බාධා සිදුව ඇති බව ද සජිත් ප්‍රේමදාස මහතා සිය ලිපියෙන් පෙන්වා දී තිබේ.

ඒ අනුව, අදාළ ක්‍රියාකලාපය පාර්ලිමේන්තු වරප්‍රසාද හා බලතල පනත යටතේ සලකා බලා, එම පැමිණිල්ල ආචාරධර්ම හා වරප්‍රසාද පිළිබඳ කාරක සභාව වෙත යොමු කර අවශ්‍ය ඉදිරි ක්‍රියාමාර්ග ගන්නා ලෙස විපක්ෂ නායකවරයා කථානායකවරයාගෙන් ඉල්ලා තිබේ.

- Advertisement -spot_img

පුවත්

LEAVE A REPLY

Please enter your comment!
Please enter your name here

- Advertisement -spot_img

අලුත් ලිපි