ඥානසාර හිමියන්ගේ සිරදඬුවමෙන් පසු ප්‍රචණ්ඩත්වයට අනුබල දෙන ප්‍රචාරණයක් – ඇගේ ආරක්ෂාව තහවුරු කරන්නැයි බලධාරීන්ට ඉල්ලීමක්
ගලගොඩඅත්තේ ඥානසාර හිමියන් නැවත බන්ධනාගාරගත කිරීමෙන් පසුව සන්ධ්‍යා එක්නැලිගොඩ මහත්මිය ඉලක්ක කර ගනිමින් සිදු කෙරෙන අපහාසාත්මක සහ ප්‍රචණ්ඩත්වයට අනුබල දෙන ප්‍රකාශන මාධ්‍ය සංවිධාන එකතුව දැඩි ලෙස හෙළා දැක තිබේ.
නිවේදනයක් නිකුත් කරමින් එම සංවිධාන පවසන්නේ, මෙම ප්‍රචාරණය එක්නැලිගොඩ මහත්මියගේ පෞද්ගලික ආරක්ෂාවට පමණක් නොව, රට තුළ දැනටමත් වර්ධනය වෙමින් පවතින වෛරී දේශපාලන සංස්කෘතිය තවදුරටත් උග්‍ර කිරීමට ද හේතු වන බවයි. එමෙන්ම, මෙය මාධ්‍ය අවකාශයන් අවභාවිත කිරීමක් සහ යහපත් මාධ්‍ය සංස්කෘතියක් ගොඩනැගීමට බාධාවක් බව ද ඔවුහු පෙන්වා දෙති.
ප්‍රගීත් එක්නැලිගොඩ අතුරුදන් කිරීම සම්බන්ධ නඩුවේ සැකකරුවන්ට ඇප ලබා දෙන ලෙස හෝමාගම මහේස්ත්‍රාත්වරයාට බලපෑම් කිරීම සම්බන්ධයෙන් ඥානසාර හිමියන්ට එරෙහිව පැවති නඩුවේ චෝදනා ඔප්පු වීමෙන් පසු 2018 අගෝස්තු මාසයේදී වසර හයක බරපතළ වැඩ සහිත සිරදඬුවමක් නියම වූ බව නිවේදනයේ සඳහන් වේ. පසුව 2019 මැයි මාසයේදී ජනාධිපති සමාව යටතේ උන්වහන්සේ නිදහස් කරනු ලැබූ බවත්, එම සමාව සම්බන්ධයෙන් ශ්‍රේෂ්ඨාධිකරණය ලබා දුන් තීන්දුවෙන් අනතුරුව යළි සිරදඬුවම විඳීම සඳහා බන්ධනාගාරගත කළ බවත් එහි දැක්වේ.
මෙම නීතිමය ක්‍රියාවලියේදී සන්ධ්‍යා එක්නැලිගොඩ මහත්මිය පෙනී සිටියේ අතුරුදන් වූ සිය සැමියාගේ අයිතිවාසිකම් වෙනුවෙන් බව අවධාරණය කරන මාධ්‍ය සංවිධාන, අධිකරණ ක්‍රියාවලියකින් ගත් තීරණයක් හේතුවෙන් ඇය වෛරයට ලක් කිරීම හෝ ඇගේ ආරක්ෂාව අවදානමට ලක් කිරීම කිසිසේත් සාධාරණීකරණය කළ නොහැකි බව පවසයි.
අදහස් ප්‍රකාශ කිරීමේ නිදහස වෙනුවෙන් තමන් අඛණ්ඩව පෙනී සිටින නමුත්, එම නිදහස පුද්ගලයන්ට හෝ ප්‍රජාවන්ට එරෙහිව තර්ජනය කිරීමට, වෛරය පැතිරවීමට හෝ ප්‍රචණ්ඩත්වයට උසිගැන්වීමට භාවිත කළ නොහැකි බව ද නිවේදනයේ සඳහන් වේ. සිවිල් හා දේශපාලන අයිතිවාසිකම් පිළිබඳ ජාත්‍යන්තර සම්මුතියේ 20(2) වගන්තිය ද උපුටා දක්වමින්, වෛරය ප්‍රචාරය කරමින් වෙනස්කම් කිරීම, සතුරුකම හෝ ප්‍රචණ්ඩත්වය සඳහා පෙළඹවීම් ඇති කිරීම නීතියෙන් තහනම් කළ යුතු බව ඔවුහු පෙන්වා දෙති.
වසර 16කට වැඩි කාලයක් අතුරුදන් වූ සිය සැමියා වෙනුවෙන් සත්‍යය සහ යුක්තිය ඉල්ලා සිටින සන්ධ්‍යා එක්නැලිගොඩ මහත්මියගේ ආරක්ෂාව තහවුරු කිරීමටත්, නීතියේ ආධිපත්‍යය සුරැකීමටත්, තත්ත්වය තවදුරටත් උග්‍ර වීම වැළැක්වීමටත් බලධාරීන් වහාම පියවර ගත යුතු බව මාධ්‍ය සංවිධාන අවධාරණය කරයි.
දේශපාලන හෝ වෙනත් වාසි ලබා ගැනීම සඳහා ආගමික හා ජාතික සංවේදීතාවන් සූරාකෑමෙන් වළකින ලෙස දේශපාලන හා ආගමික නායකයන්ගෙන් ඉල්ලා සිටින එම නිවේදනයට නිදහස් මාධ්‍ය ව්‍යාපාරය, ශ්‍රී ලංකා වෘත්තීය ජනමාධ්‍යවේදීන්ගේ සංගමය, මාධ්‍ය සේවක වෘත්තීය සමිති සම්මේලනය, දකුණු ආසියානු මාධ්‍ය කාන්තාවෝ, ශ්‍රී ලංකා මුස්ලිම් මාධ්‍ය සංසදය සහ ශ්‍රී ලංකා දෙමළ මාධ්‍ය සංසදය යන සංවිධානවල නියෝජිතයෝ අත්සන් තබා තිබේ.
