ශ්‍රී ලංකා පොදුජන පෙරමුණ නියෝජනය කළ හිටපු කොළඹ මහ නගර සභා මන්ත්‍රී මහින්ද කහඳගම මහතා ඔක්තෝබර් 26 වැනිදා දක්වා රක්ෂිත බන්ධනාගාරගත කිරීමට නුගේගොඩ මහේස්ත්‍රාත් අධිකරණය නියෝග කර තිබේ.
මධ්‍යම අපරාධ විමර්ශන කාර්යාංශය විසින් ඔහු අද අධිකරණයට ඉදිරිපත් කරනු ලැබීමෙන් අනතුරුව මෙම නියෝගය ලබා දී ඇත. මීට පෙර කහඳගම මහතා රඳවාගෙන ප්‍රශ්න කිරීමට එම කාර්යාංශයට අවසර ලබා දී තිබිණි.
මත්ද්‍රව්‍ය ජාවාරම්වලට සම්බන්ධ බවට එල්ල වූ චෝදනා මත මහින්ද කහඳගම මහතා සහ තවත් පුද්ගලයකු ඔක්තෝබර් 5 වැනිදා මධ්‍යම අපරාධ විමර්ශන කාර්යාංශය විසින් අත්අඩංගුවට ගනු ලැබූ බව පොලිසිය සඳහන් කරයි.
මිරිහාන ප්‍රදේශයේ අවන්හලක් ආසන්නයේදී කහඳගම මහතා අත්අඩංගුවට ගත් අවස්ථාවේ සැකකරුවන් සතුව තිබී ක්‍රිස්ටල් මෙතම්ෆෙටමින් හෙවත් ‘අයිස්’ මත්ද්‍රව්‍ය ප්‍රමාණයක් ද සොයාගෙන තිබේ.
මූලික විමර්ශනවලදී කහඳගම මහතා කලක සිට මත්ද්‍රව්‍ය ජාවාරමට සම්බන්ධ වී ඇති බවට තොරතුරු අනාවරණය වී ඇතැයි වාර්තා වේ. අත්අඩංගුවට ගත් අනෙක් පුද්ගලයා ද එම ක්‍රියාකාරකම්වලට සම්බන්ධ බවට චෝදනා එල්ල වී තිබේ.
