සිරිලිය සවිය ගිණුම සම්බන්ධයෙන් මූල්‍ය අපරාධ විමර්ශන කොට්ඨාසය විසින් අත්අඩංගුවට ගැනීමට ඇති හැකියාව සලකා පූර්ව ඇප ලබාදෙන ලෙස හිටපු ජනාධිපති ආර්යා ශිරන්ති රාජපක්ෂ මහත්මිය ඉදිරිපත් කළ අයදුම්පත මාලිගාකන්ද මහේස්ත්‍රාත් අධිකරණය විසින් ප්‍රතික්ෂේප කර තිබේ.
අදාළ පූර්ව ඇප අයදුම්පත ඔක්තෝබර් 6 වැනිදා මාලිගාකන්ද මහේස්ත්‍රාත් අධිකරණය හමුවේ කැඳවනු ලැබූ අතර, එහිදී මෙම සිද්ධියට අදාළ කරුණු වාර්තා කිරීම සඳහා අද (12) අධිකරණය හමුවේ පෙනී සිටින ලෙස මූල්‍ය අපරාධ විමර්ශන කොට්ඨාසයේ ස්ථානාධිපතිවරයාට ද අධිකරණය නොතීසි නිකුත් කර තිබිණි. සිරිලිය සවිය ගිණුම සම්බන්ධයෙන් සිදු කෙරෙන විමර්ශනයට අදාළව මෙම පූර්ව ඇප අයදුම්පත ඉදිරිපත් කර තිබේ.
