පාර්ලිමේන්තු කථානායක ආචාර්ය ජගත් වික්‍රමරත්න මහතාට එරෙහි විශ්වාසභංග යෝජනාව අද (09) පාර්ලිමේන්තුවේ මහලේකම්වරයා වෙත භාරදීමට විපක්ෂය සැලසුම් කර තිබේ.
කථානායකවරයාට එරෙහිව චෝදනා 49ක් පදනම් කරගෙන මෙම යෝජනාව සකස් කර ඇත.
පාර්ලිමේන්තු කටයුතු මෙහෙයවීමේදී කථානායකවරයා පක්ෂග්‍රාහී හා ප්‍රජාතන්ත්‍රවාදී නොවන ආකාරයෙන් කටයුතු කර ඇති බවට විපක්ෂය චෝදනා කරයි. එම හැසිරීම ඔහු එම තනතුරේ කටයුතු කිරීමට සුදුසුද යන්න පිළිබඳ ගැටලු මතු කරන බවද විපක්ෂයේ අදහස වී තිබේ.
සමගි ජන බලවේගය චෝදනා කරන්නේ තම පක්ෂය මීට පෙර ඉදිරිපත් කළ වරප්‍රසාද ප්‍රශ්න සහ යෝජනා සඳහා සාධාරණ හේතු දැක්වීමකින් තොරව කථානායකවරයා අවසර ලබා නොදුන් බවයි.
විශ්වාසභංග යෝජනාවට අත්සන් තැබීම ඊයේ (08) විපක්ෂ නායක සජිත් ප්‍රේමදාස මහතාගේ ප්‍රධානත්වයෙන් පාර්ලිමේන්තුවේ විපක්ෂ නායක කාර්යාලයේදී ආරම්භ වූ අතර, පළමු අත්සන විපක්ෂ නායකවරයා විසින් තබනු ලැබීය.
විපක්ෂ මන්ත්‍රීවරුන්ගේ අත්සන් සහිත යෝජනාව අද පාර්ලිමේන්තුවේ මහලේකම්වරයා වෙත භාරදෙන බව සමගි ජන බලවේගයේ පාර්ලිමේන්තු මන්ත්‍රී අජිත් පී. පෙරේරා ප්‍රකාශ කර තිබේ.
