සේවය අත්හිටුවා සිටි කොළඹ කොටුව මහේස්ත්‍රාත් කොසල සේනාධීර මහතා වහාම ක්‍රියාත්මක වන පරිදි යළි සේවයේ පිහිටුවීමට අධිකරණ සේවා කොමිෂන් සභාව පියවර ගෙන ඇති බව වාර්තා වේ.
විධිමත් විමර්ශනයකින් අනතුරුව සේනාධීර මහතාට එල්ල වූ සියලු චෝදනාවලින් නිදහස් කර ඇති බවත් ඔහු කොළඹ මහේස්ත්‍රාත් අධිකරණයට අනුයුක්ත කිරීමටද තීරණය කර ඇති බවත් වාර්තා වේ.
අත්හිටුවා සිටි කාලය සඳහා ඔහුට හිමි වැටුප් සහ අනෙකුත් වරප්‍රසාද ද යළි ලබාදීමට අධිකරණ සේවා කොමිෂන් සභාව තීරණය කර ඇත. සේනාධීර මහතාට එරෙහිව චෝදනා එල්ල වී තිබුණේ ඔහුගේ නිල නිවස සඳහා විදුලිය සහ ජලය නීති විරෝධී ලෙස ලබාගෙන ඇති බවය. ඒ අනුව 2024 ජූලි 10 වැනිදා සිට ඔහුගේ සේවය අත්හිටුවා තිබිණි.
අගවිනිසුරුවරයාගේ ප්‍රධානත්වයෙන් ක්‍රියාත්මක වන අධිකරණ සේවා කොමිෂන් සභාව විසින් සිදුකළ විමර්ශනය මාස 27ක කාලයක් පවත්වා ඇති අතර එම විමර්ශණය සම්බන්ධයෙන් සාක්ෂිකරුවන් 20කට වැඩි පිරිසකගෙන් සාක්ෂි ලබාගෙන ඇත.
