ඔක්තෝබර් 13 වැනිදා දක්වා රක්ෂිත බන්ධනාගාරගත කර සිටින හිටපු ජනාධිපති මහින්ද රාජපක්ෂ මහතාගේ බිරිඳ වන ශිරන්ති රාජපක්ෂ මහත්මිය වැලිකඩ මැගසින් බන්ධනාගාරයේ විශේෂ ආරක්ෂාව යටතේ රඳවා සිටින බව බන්ධනාගාර දෙපාර්තමේන්තුව මාධ්‍ය වෙත පවසා ඇත.
බන්ධනාගාර කොමසාරිස් සහ මාධ්‍ය ප්‍රකාශක සෙනක පල්ලියගුරුගේ මහතා මාධ්‍ය වෙත පවසා ඇත්තේ කාන්තා අංශය තුළ ආරක්ෂිත ස්ථානයක ඇය රඳවා තැබීමට අවශ්‍ය කටයුතු සලසා ඇති බවයි.
අධිකරණ නියෝගයට අනුව ඇයට අවශ්‍ය වෛද්‍ය ප්‍රතිකාර ලබාදීමටද කටයුතු සූදානම් කරමින් පවතින බව ඔහු සඳහන් කර ඇත.
රාජ්‍ය බැංකුවකින් ලබාගත් රුපියල් මිලියන 10ක මුදලක් අවභාවිත කළ බවට එල්ල වී ඇති චෝදනා සම්බන්ධයෙන් අල්ලස් හෝ දූෂණ චෝදනා විමර්ශන කොමිෂන් සභාව විසින් ඔක්තෝබර් 7 වැනිදා ශිරන්ති රාජපක්ෂ මහත්මිය අත්අඩංගුවට ගෙන තිබිණි. අනතුරුව කොළඹ ප්‍රධාන මහේස්ත්‍රාත් අධිකරණය ඇය ඔක්තෝබර් 13 වැනිදා දක්වා රක්ෂිත බන්ධනාගාරගත කිරීමට නියෝග කළේය.
එමෙන්ම වෛද්‍ය ප්‍රතිකාර සඳහා ඇයව කොළඹ නවලෝක රෝහලට ඇතුළත් කිරීමට අවශ්‍ය පියවර ගන්නා ලෙසද අධිකරණය නියෝග කර තිබේ.
