ත්‍රෛනිකායික මහානායක හිමිවරු සහ ජනාධිපති අනුර කුමාර දිසානායක මහතා අතර විශේෂ සාකච්ඡාවක් අද (08) පස්වරු 1.00ට ජනාධිපති ලේකම් කාර්යාලයේදී පැවැත්වීමටය.
පූජ්‍ය ගලගොඩඅත්තේ ඥානසාර හිමියන් බන්ධනාගාරගත කිරීමෙන් පසු ගිහි ඇඳුමින් අධිකරණය හමුවට ඉදිරිපත් කිරීම සම්බන්ධයෙන් මහානායක හිමිවරුන් විසින් බන්ධනාගාර කොමසාරිස් ජනරාල්වරයා වෙත යොමු කළ ලිපියක් සම්බන්ධයෙන් මෙම සාකච්ඡාව පැවැත්වීමට නියමිත බව රජයේ ප්‍රවෘත්ති දෙපාර්තමේන්තුව සඳහන් කරයි.
මල්වතු පාර්ශ්වයේ මහානායක තිබ්බටුවාවේ ශ්‍රී සිද්ධාර්ථ සුමංගල, අස්ගිරි පාර්ශ්වයේ මහානායක වරකාගොඩ ශ්‍රී ඥානරතන, අමරපුර මහා නිකායේ මහානායක කරගොඩ උයන්ගොඩ මෛත්‍රී මූර්ති සහ රාමඤ්ඤ මහා නිකායේ මහානායක මකුලෑවේ ශ්‍රී විමල යන ස්වාමීන් වහන්සේලාගේ අත්සනින් එම ලිපිය යොමු කර තිබේ.
එම ලිපිය මගින් මහානායක හිමිවරුන් පෙන්වා දී ඇත්තේ ඥානසාර හිමියන්ගේ චීවරය ඉවත් කර ගිහි ඇඳුමින් අධිකරණයට ඉදිරිපත් කිරීමට බන්ධනාගාර බලධාරීන් කටයුතු කිරීම සම්බන්ධයෙන් තමන් විමතියට සහ දැඩි කනස්සල්ලට පත්වන බවයි.
අධිකරණ ක්‍රියාවලියට සහ ආණ්ඩුක්‍රම ව්‍යවස්ථාවට ගරු කරන බව අවධාරණය කරන මහානායක හිමිවරුන් පෙන්වා දෙන්නේ භික්ෂුවකගේ චීවරය ඉවත් කිරීම හෝ පැවිදිභාවය අවසන් කිරීම හුදෙක් බන්ධනාගාර පරිපාලනය විසින් තීරණය කළ හැකි කරුණක් නොවන බවයි.
එය ශාසනික කරුණක් වන බවත් ඒ සම්බන්ධයෙන් තීරණය කිරීම මහා සංඝරත්නයට අයත් බව ඔවුන් පෙන්වා දී තිබේ. ඥානසාර හිමියන් පාරාජිකා වරදකට පත්ව ඇති බවට හෝ උන්වහන්සේ භික්ෂු ශාසනයෙන් ඉවත් කළ යුතු බවට අදාළ සංඝ සභාව විසින් කිසිදු තීරණයක් ගෙන නොමැති බවද ලිපියේ සඳහන් කර ඇත.
එමෙන්ම බන්ධනාගාර ස්ථාවර නියෝගවල 550 වැනි රෙගුලාසියද මහානායක හිමිවරුන්ගේ අවධානයට ලක්කර තිබේ. එම රෙගුලාසිය අනුව වරදකරුවන් වූ සිරකරුවන් අධිකරණයට රැගෙන යන අවස්ථාවේ බන්ධනාගාර නිල ඇඳුමෙන් නොව, වරදකරු වීමට පෙර සාමාන්‍යයෙන් භාවිත කළ ඇඳුමින් පෙනී සිටීමට අවස්ථාව ලබාදිය යුතු බව ඔවුන් පෙන්වා දී තිබේ.
භික්ෂුවක් සම්බන්ධයෙන් එය ඔහු සාමාන්‍යයෙන් පළඳින චීවරය විය යුතු බවද මහානායක හිමිවරුන් සඳහන් කර තිබේ. එමෙන්ම සිරකරුවන් බන්ධනාගාරයෙන් පිටතට රැගෙන යන අවස්ථාවලදී තමන්ගේ සාමාන්‍ය ඇඳුම් භාවිත කිරීමට අවසර දිය හැකි බවට එක්සත් ජාතීන්ගේ සිරකරුවන්ට සැලකීම පිළිබඳ අවම ප්‍රමිතීන්හි සඳහන් කරුණුද ලිපියේ දක්වා ඇත.
ඒ අනුව ඥානසාර හිමියන් අධිකරණයට ඉදිරිපත් කිරීමේදී චීවරයෙන් පෙනී සිටීමට අවස්ථාව ලබාදෙන ලෙසත්, බන්ධනාගාරගතව සිටින කාලය තුළ උන්වහන්සේගේ භික්ෂුභාවය අඛණ්ඩව පවත්වාගෙන යාමට අවශ්‍ය පහසුකම් සලසන ලෙසත් මහානායක හිමිවරුන් බන්ධනාගාර කොමසාරිස් ජනරාල්වරයාගෙන් ඉල්ලා තිබේ.
මෙම කරුණු සම්බන්ධයෙන් අද ජනාධිපතිවරයා සහ ත්‍රෛනිකායික මහානායක හිමිවරුන් අතර පැවැත්වෙන සාකච්ඡාවේදී වැඩිදුරටත් අවධානය යොමු කිරීමට නියමිතය
