“ආගමට අපහාස කිරීම” සම්බන්ධ චෝදනා මත සෞදි අරාබියේ මරණ දඬුවමට ලක්ව සිටින ශ්‍රී ලාංකික සංක්‍රමණික සේවක අනෝජන් සිවරාසා සම්බන්ධ මරණ දඬුවම වහා අවලංගු කර ඔහු නිදහස් කරන ලෙස ඇම්නෙස්ටි ඉන්ටර්නැෂනල් සංවිධානය සෞදි බලධාරීන්ගෙන් ඉල්ලා තිබේ.
24 හැවිරිදි අනෝජන් සිවරාසා 2026 ජූලි 1 වැනිදා අත්අඩංගුවට ගෙන ඇත්තේ මුහම්මද් නබිතුමාට අපහාසයක් ලෙස සැලකුණු ප්‍රකාශයක් ෆේස්බුක් වෙත පළ කළ බවට චෝදනා කරමිනි. ඇම්නෙස්ටි ඉන්ටර්නැෂනල් පවසන්නේ අනෝජන් අධිකරණයට පවසා ඇත්තේ කෝපයට පත්වූ අවස්ථාවක එම ප්‍රකාශය පළ කළ බවත් පසුව එය මකා දමා සමාව ඉල්ලා වීඩියෝවක්ද නිකුත් කළ බවත්ය.
එම සංවිධානයට අනුව, අත්අඩංගුවට ගත් අවස්ථාවේ සිට පළමු නඩු තීන්දුව ලබාදෙන තෙක් ඔහුට නීතිඥ සහාය ලබාගැනීමට අවස්ථාවක් ලැබී නොමැත. අනෝජන්ට එරෙහි නඩු විභාගය වේගයෙන් අවසන් කර ජූලි 27 වැනිදා වසර පහක සිරදඬුවමක් සහ සෞදි රියාල් මිලියන 3ක දඩයක් නියම කර තිබූ බව ඇම්නෙස්ටි සඳහන් කරයි. එහෙත් අභියාචනයකින් එම දඬුවම සැප්තැම්බර් 17 වැනිදා මරණ දඬුවමක් දක්වා වැඩි කර ඇති බවද එම සංවිධානය පවසයි.
ඇම්නෙස්ටි ඉන්ටර්නැෂනල් මැදපෙරදිග සහ උතුරු අප්‍රිකානු කලාපීය අධ්‍යක්ෂිකා හෙබා මොරයෙෆ් සඳහන් කර ඇත්තේ අදහස් ප්‍රකාශ කිරීම සම්බන්ධයෙන් කිසිවකු සිරගත කිරීම හෝ මරණ දඬුවමට ලක් කිරීම නොකළ යුතු බවයි. මරණ දඬුවම “බරපතළම අපරාධ” සඳහා පමණක් සීමා විය යුතු බවට ජාත්‍යන්තර මානව හිමිකම් නීතියේ සඳහන් වන නමුත් ප්‍රචණ්ඩකාරී නොවන ක්‍රියා සම්බන්ධයෙන්ද සෞදි අරාබිය මරණ දඬුවම් පනවන බව ඇම්නෙස්ටි චෝදනා කරයි.
ඇම්නෙස්ටි ඉන්ටර්නැෂනල්ට අනුව 2026 ඔක්තෝබර් 5 වනවිට මෙම වසර තුළ සෞදි අරාබියේ අවම වශයෙන් පුද්ගලයන් 175 දෙනෙකු මරණ දඬුවමට ලක්කර තිබේ. ඉන් බහුතරයක් විදේශිකයන් වන අතර රටවල් 20කට වැඩි සංඛ්‍යාවක විදේශිකයන් අවම වශයෙන් 94 දෙනෙකු මේ වසරේදී මරණ දඬුවමට ලක්කර ඇති බව එම සංවිධානය පවසයි.
සමාජ මාධ්‍ය ඔස්සේ පළ කරන ලද ප්‍රකාශ සම්බන්ධයෙන් සෞදි අධිකරණ මෑත වසරවලදී දීර්ඝ කාලීන සිරදඬුවම් නියම කර ඇති බවත් අභියාචනා අවස්ථාවලදී එම දඬුවම් සැලකිය යුතු ලෙස වෙනස් වී ඇති බවත් ඇම්නෙස්ටි පෙන්වා දෙයි. අනෝජන් සිවරාසා සම්බන්ධ මරණ දඬුවම වහා අවලංගු කර, ඔහුගේ වරදකරු කිරීම ඉවත් කර කොන්දේසි විරහිතව නිදහස් කරන ලෙස ඇම්නෙස්ටි ඉන්ටර්නැෂනල් සෞදි බලධාරීන්ගෙන් ඉල්ලා තිබේ.
