මත්ද්‍රව්‍ය ජාවාරම් සම්බන්ධයෙන් අත්අඩංගුවට ගත් ශ්‍රී ලංකා පොදුජන පෙරමුණේ කොළඹ මහනගර සභාවේ හිටපු නාගරික මන්ත්‍රී මහින්ද කහඳගම මහතා ඔක්තෝබර් 12 දක්වා රඳවාගෙන ප්‍රශ්න කිරීමට නුගේගොඩ මහේස්ත්‍රාත් අධිකරණය මධ්‍යම අපරාධ විමර්ශන කාර්යාංශයට (CCIB) අවසර ලබා දී තිබේ.
කහඳගම මහතා සහ තවත් පුද්ගලයෙකු මත්ද්‍රව්‍ය ජාවාරම් සම්බන්ධයෙන් ඊයේ (05) මධ්‍යම අපරාධ විමර්ශන කාර්යාංශය විසින් අත්අඩංගුවට ගෙන තිබුණි.
පොලිසිය සඳහන් කළේ කහඳගම මහතා මිරිහාන ප්‍රදේශයේ අවන්හලක් ආසන්නයේදී අත්අඩංගුවට ගත් බවයි. සැකකරුවන් සන්තකයේ තිබී ‘අයිස්’ මත්ද්‍රව්‍ය ප්‍රමාණයක් ද සොයාගෙන තිබේ. මූලික විමර්ශනවලදී කහඳගම මහතා කලක සිට මත්ද්‍රව්‍ය ජාවාරමට සම්බන්ධ වී ඇති බවට තොරතුරු අනාවරණය වී ඇතැයි පොලිසිය සඳහන් කරයි. අනෙක් සැකකරු ද ඔහුගේ එම ක්‍රියාකාරකම්වලට සම්බන්ධ බවට සැක කෙරේ.
සිද්ධිය සම්බන්ධයෙන් මධ්‍යම අපරාධ විමර්ශන කාර්යාංශය වැඩිදුර විමර්ශන සිදුකරමින් පවතී.
