හිටපු ජනාධිපති රනිල් වික්‍රමසිංහ මහතා සහ හිටපු ජනාධිපති ලේකම් සමන් ඒකනායක මහතාට එරෙහිව පොදු දේපළ පනත යටතේ පවරා ඇති නඩුව අද (30) කොළඹ කොටුව මහේස්ත්‍රාත් අධිකරණය හමුවේ කැඳවීමට නියමිතය.
රාජ්‍ය මුදල් අවභාවිත කිරීම හෝ අයථා ලෙස පරිහරණය කිරීම සම්බන්ධ චෝදනා මෙම නඩුව පවරා ඇති අතර මෙම සිද්ධිය සම්බන්ධයෙන් විමර්ශන අවසන් කර ඇති බවත්, විමර්ශනවලට අදාළ උපුටාගත් ලේඛන නීතිපතිවරයාගේ උපදෙස් සඳහා යොමු කර ඇති බවත් අපරාධ පරීක්ෂණ දෙපාර්තමේන්තුව මීට පෙර අධිකරණයට දැනුම් දී තිබිණි.
එම දැනුම්දීමෙන් අනතුරුව කොළඹ කොටුව මහේස්ත්‍රාත් පසන් අමරසේන මහතා, නීතිපතිවරයාගේ ස්ථාවරය සහ ඉදිරි උපදෙස් ලබාගැනීම සඳහා නඩුව අද කැඳවීමට නියෝග කර තිබුණු අතර ඒ අනුව හිටපු ජනාධිපති රනිල් වික්‍රමසිංහ මහතා අද පෙරවරුවේ කොළඹ කොටුව මහේස්ත්‍රාත් අධිකරණයට පැමිණ තිබේ.
