වියළි කාලගුණික තත්ත්වය හේතුවෙන් දිස්ත්‍රික්ක 7ක පවුල් 35,169කට අයත් පුද්ගලයින් 115,586 දෙනෙකු පීඩාවට පත්ව ඇති බව ආපදා කළමනාකරණ මධ්‍යස්ථානයේ සැප්තැම්බර් 08 වැනිදා පෙරවරු 10.00ට නිකුත් කළ ආපදා තත්ත්ව වාර්තාවේ දැක්වේ.
මෙම තත්ත්වය හේතුවෙන් ප්‍රාදේශීය ලේකම් කොට්ඨාස 35ක ජනතාව පීඩාවට පත්ව සිටින බව එම වාර්තාව සඳහන් කරයි.
වැඩිම පිරිසක් පීඩාවට පත්ව ඇත්තේ මොනරාගල දිස්ත්‍රික්කයේ වන අතර, එහි ප්‍රාදේශීය ලේකම් කොට්ඨාස 8ක පවුල් 12,732කට අයත් පුද්ගලයින් 41,360 දෙනෙකු පීඩාවට පත්ව තිබේ.
මඩකලපුව දිස්ත්‍රික්කයේ ප්‍රාදේශීය ලේකම් කොට්ඨාස 8ක පවුල් 11,142කට අයත් පුද්ගලයින් 33,394 දෙනෙකුද, බදුල්ල දිස්ත්‍රික්කයේ ප්‍රාදේශීය ලේකම් කොට්ඨාස 10ක පවුල් 5,435කට අයත් පුද්ගලයින් 20,418 දෙනෙකුද වියළි කාලගුණයෙන් පීඩාවට පත්ව සිටී.
අම්පාර දිස්ත්‍රික්කයේ ප්‍රාදේශීය ලේකම් කොට්ඨාස 3ක පවුල් 3,794කට අයත් පුද්ගලයින් 12,047 දෙනෙකුද, පොළොන්නරුව දිස්ත්‍රික්කයේ ප්‍රාදේශීය ලේකම් කොට්ඨාස 3ක පවුල් 1,688කට අයත් පුද්ගලයින් 6,842 දෙනෙකුද පීඩාවට පත්ව තිබේ.
රත්නපුර දිස්ත්‍රික්කයේ ප්‍රාදේශීය ලේකම් කොට්ඨාස 2ක පවුල් 348කට අයත් පුද්ගලයින් 1,374 දෙනෙකුටද වියළි කාලගුණයෙන් බලපෑම් එල්ල වී ඇති අතර, අනුරාධපුර දිස්ත්‍රික්කයේ එක් ප්‍රාදේශීය ලේකම් කොට්ඨාසයක පවුල් 30කට අයත් පුද්ගලයින් 151 දෙනෙකුද පීඩාවට පත්ව ඇත.
මේ අතර, වියළි කාලගුණයෙන් පීඩාවට පත් ජනතාව සඳහා සහන කටයුතු අඛණ්ඩව ක්‍රියාත්මක වන අතර, විශේෂයෙන් පානීය ජලය සැපයීම සඳහා අදාළ බලධාරීන් පියවර ගනිමින් සිටින බව ආපදා කළමනාකරණ මධ්‍යස්ථානය සඳහන් කරයි.
ඒ අනුව, පීඩාවට පත් ජනතාවගේ පානීය ජල අවශ්‍යතා සපුරාලීම සඳහා අදාළ ප්‍රදේශවල සහන කටයුතු අඛණ්ඩව සිදුකෙරෙමින් පවතී.
