වියළි කාලගුණික තත්ත්වය හේතුවෙන් දිවයිනේ ජලාශවල සමස්ත ජල ධාරිතාව මේ වන විට සියයට 47.3කට ආසන්න මට්ටමකට පහළ බැස ඇති බව වාරිමාර්ග දෙපාර්තමේන්තුව පවසයි.
වාරිමාර්ග දෙපාර්තමේන්තුවේ ජල කළමනාකරණ අධ්යක්ෂ එච්.එම්.පී.එස්.ඩී. හේරත් මහතා පවසා ඇත්තේ එම දෙපාර්තමේන්තුව යටතේ පාලනය වන ප්රධාන ජලාශවල වත්මන් ජල මට්ටම සියයට 34.4ක් පමණ වන බවයි.විශේෂයෙන් අම්පාර, මඩකලපුව සහ ත්රිකුණාමලය දිස්ත්රික්කවල පිහිටි ජලාශවල ජල මට්ටම සියයට 20ක් පමණ දක්වා පහළ බැස ඇති බවද ඔහු පවසා ඇත.
කෙසේ වෙතත් යල කන්නයේ වගා කටයුතු මේ වන විට අවසන් අදියරට පැමිණ ඇති බැවින් ඉතිරි කාලය සඳහා අවශ්ය ජලය පවතින ජල සංචිතවලින් සපයාගත හැකි බව වාරිමාර්ග දෙපාර්තමේන්තුව පවසයි.
එමෙන්ම මෙම ජලාශ මත යැපෙන ප්රදේශවල ජනතාවගේ පානීය ජල අවශ්යතාද මීළඟ වර්ෂාපතනය ලැබෙන තෙක් පවතින ජල සංචිත මගින් සපුරාගත හැකි බව හේරත් මහතා පැවසීය.
පවතින උණුසුම් කාලගුණික තත්ත්වය හේතුවෙන් ජලාශවලින් වාෂ්පීකරණය වන ජල ප්රමාණයද ඉහළ ගොස් ඇති බැවින්, කෘෂිකාර්මික කටයුතු සහ පානීය ජල අවශ්යතා සඳහා ජලය අරපිරිමැස්මෙන් භාවිත කරන ලෙසද ඔහු ජනතාවගෙන් ඉල්ලා ඇත. ඉදිරි මහ කන්නයේ වගා කටයුතු සඳහා අවශ්ය සැලසුම් මේ වන විට සකස් කරමින් පවතින බවද වාරිමාර්ග දෙපාර්තමේන්තුව සඳහන් කර ඇත.
මහ කන්නය ආරම්භ වන අවස්ථාවේ පවතින ජල ප්රමාණය සහ අදාළ වගා රැස්වීම්වලදී ගනු ලබන තීරණ මත මෙවර මහ කන්නයේ වගා කටයුතු හැකි ඉක්මනින් ආරම්භ කිරීමට සැලසුම් කර ඇති බව හේරත් මහතා සඳහන් කර ඇත.
