වියළි කාලගුණික තත්ත්වය හේතුවෙන් දිස්ත්රික්ක හතක ප්රාදේශීය ලේකම් කොට්ඨාස 35ක පවුල් 35,149කට අයත් පුද්ගලයන් පානීය ජලය සපයා ගැනීමේ ගැටලුවලට මුහුණ දී සිටින බව ජාතික ආපදා සහන සේවා මධ්යස්ථානය පවසයි.
මොනරාගල, මඩකලපුව, අම්පාර සහ බදුල්ල යන දිස්ත්රික්කවලට වියළි කාලගුණයෙන් වැඩිම බලපෑමක් එල්ල වී ඇති අතර, පොළොන්නරුව, අනුරාධපුර සහ රත්නපුර දිස්ත්රික්කවලින්ද පානීය ජල හිඟය සම්බන්ධයෙන් තොරතුරු වාර්තා වී තිබේ.
වියළි කාලගුණයෙන් බලපෑමට ලක්වූ ජනතාව සඳහා පානීය ජලය බෙදාදීමේ වැඩසටහන අඛණ්ඩව ක්රියාත්මක වන බව ජාතික ආපදා සහන සේවා මධ්යස්ථානයේ ජ්යෙෂ්ඨ සහකාර ලේකම් ප්රගීත් දනන්සූරිය මහතා පැවසීය. ඒ අනුව ජාතික ආපදා සහන සේවා මධ්යස්ථානය, දිස්ත්රික් ලේකම් කාර්යාල, ප්රාදේශීය ලේකම් කාර්යාල සහ පළාත් පාලන ආයතන එක්ව පීඩාවට පත් පවුල් වෙත අඛණ්ඩව පානීය ජලය සැපයීමේ කටයුතු සිදුකරන බව ඔහු සඳහන් කළේය.
මොනරාගල, මඩකලපුව, පොළොන්නරුව, අම්පාර, බදුල්ල සහ රත්නපුර යන දිස්ත්රික්කවල පානීය ජලය බෙදාදීම මේ වන විටත් සිදුකරමින් පවතින බවද දනන්සූරිය මහතා පැවසීය. ප්රමාණවත් වර්ෂාපතනයක් තවමත් අදාළ ප්රදේශවලින් වාර්තා නොවීම හේතුවෙන් පසුගිය සතියට සාපේක්ෂව ජල හිඟයෙන් පීඩාවට පත්වන පුද්ගලයන්ගේ සංඛ්යාවේ යම් වැඩිවීමක් සිදුව ඇති බවත්, මෙම මාසය අවසන් වන තෙක් එම සංඛ්යාව තවදුරටත් ඉහළ යා හැකි බවත් ඔහු සඳහන් කළේය.
මේ අතර ජල මූලාශ්ර පිරිසිදු කිරීම සහ පානීය ජලය පිරිසිදු කිරීම සඳහා අවශ්ය උපදෙස් අදාළ බලධාරීන් වෙත ලබාදී ඇති අතර, ඒ සඳහා අවශ්ය ප්රතිපාදන දිස්ත්රික් ලේකම්වරුන් වෙත මුදාහැර ඇති බවද ජාතික ආපදා සහන සේවා මධ්යස්ථානය පවසයි. වියළි කාලගුණික තත්ත්වය හේතුවෙන් ජලාශවල ජල මට්ටම්ද පහළ යමින් පවතින බව වාරිමාර්ග දෙපාර්තමේන්තුව සඳහන් කරයි.
මේ අතර වියළි කාලගුණයෙන් බලපෑමට ලක්ව ඇති ප්රදේශවල පානීය ජලය සපයා ගැනීමේ ගැටලුවලට මුහුණ දෙන ජනතාවට ඒ පිළිබඳව තම ප්රදේශයේ ග්රාම නිලධාරීවරයා හෝ ප්රාදේශීය ලේකම් කාර්යාලය දැනුවත් කරන ලෙස ජාතික ආපදා සහන සේවා මධ්යස්ථානය ඉල්ලා සිටින අතර අදාළ පළාත් පාලන ආයතනය දැනුවත් කිරීමෙන්ද අවශ්ය ජල සැපයුම් කටයුතු සම්බන්ධයෙන් පියවර ගත හැකි බව එම මධ්යස්ථානය පවසයි.
පානීය ජල සැපයුම සම්බන්ධයෙන් පවතින ගැටලු ජාතික ආපදා සහන සේවා මධ්යස්ථානයේ 071 680 7807 දුරකථන අංකයට දැනුම් දෙන ලෙසද දනන්සූරිය මහතා ජනතාවගෙන් ඉල්ලා ඇති අතර එම තොරතුරු අදාළ බලධාරීන් වෙත යොමු කිරීමෙන් ජල සැපයුම් අවශ්යතා සම්බන්ධයෙන් කඩිනම් පියවර ගැනීමට හැකි වන බවද ඔහු වැඩිදුරටත් සඳහන් කළේය.
