දූෂණ විරෝධී පනතට ඉදිරිපත් කර ඇති සංශෝධන පනත් කෙටුම්පත සම්බන්ධයෙන් ඉදිරිපත් කර තිබූ පෙත්සම් 15ක් පිළිබඳ ශ්රේෂ්ඨාධිකරණයේ විභාගය අවසන් කර තිබේ.
අදාළ පනත් කෙටුම්පතේ ව්යවස්ථානුකූලභාවය සම්බන්ධයෙන් ශ්රේෂ්ඨාධිකරණයේ රහසිගත තීරණය ඉදිරියේදී පාර්ලිමේන්තුවේ කථානායකවරයා වෙත සහ ජනාධිපතිවරයා වෙත දැනුම් දෙන බව අධිකරණය ප්රකාශ කර ඇත.
අගවිනිසුරු මඩුල්ලේ විනිසුරුවරුන් වන ශිරාන් ගුණරත්න, මහින්ද සමයවර්ධන සහ සම්පත් විජේරත්න යන මහත්වරුන්ගෙන් සමන්විත ත්රිපුද්ගල විනිසුරු මඩුල්ලක් හමුවේ මෙම පෙත්සම් දින දෙකක් පුරා විභාගයට ගෙන තිබේ. අද දින වාචික කරුණු දැක්වීම් අවසන් කිරීමෙන් අනතුරුව අදාළ පාර්ශ්වයන්ට සිය ලිඛිත කරුණු ඉදිරිපත් කිරීමට ලබන සඳුදා දහවල් 12.00 දක්වා අවස්ථාව ලබා දී ඇත.
ඉන් අනතුරුව ශ්රේෂ්ඨාධිකරණය සඳහන් කර ඇත්තේ පනත් කෙටුම්පතේ ව්යවස්ථානුකූලභාවය සම්බන්ධයෙන් අධිකරණයේ තීරණය නියමිත පරිදි පාර්ලිමේන්තුවේ කථානායකවරයා වෙත යොමු කරන බවයි. හිටපු අමාත්ය මහාචාර්ය ජී. එල්. පීරිස්, මීඩියා ලෝ ෆෝරම් සහ ට්රාන්ස්පේරන්සි ඉන්ටර්නැෂනල් ශ්රී ලංකා ඇතුළු පාර්ශ්ව කිහිපයක් විසින් මෙම පෙත්සම් 15 ඉදිරිපත් කර තිබේ.
පෙත්සම්කරුවන්ගේ තර්කය වී ඇත්තේ යෝජිත සංශෝධන මගින් අධිකරණ බලයට සීමා පැනවීමක් සිදුවන අතර මූලික අයිතිවාසිකම් ද උල්ලංඝනය විය හැකි බවයි. ඒ අනුව මෙම පනත් කෙටුම්පත සම්මත කර ගැනීම සඳහා පාර්ලිමේන්තුවේ තුනෙන් දෙකක බහුතරයට අමතරව ජනමත විචාරණයකදී ජනතා අනුමැතිය ලබා ගැනීම ද අවශ්ය බවට තීරණය කරන ලෙස පෙත්සම්කරුවන් ශ්රේෂ්ඨාධිකරණයෙන් ඉල්ලා තිබේ.
