වේරිටේ රිසර්ච් (Verité Research) ආයතනය විසින් වැන්ගාඩ් සර්වේ (Vanguard Survey) සමඟ එක්ව පවත්වන ලද නවතම “රට හිතන හැටි” (Mood of the Nation) මත විමසුමට අනුව වත්මන් රජයේ ජනතා අනුමැතිය සහ ආර්ථිකය පිළිබඳ ජනතා විශ්වාසය සැලකිය යුතු ලෙස පහළ ගොස් ඇති බව එම එම ආයතනය මාධ්ය නිවේදනයක් නිකුත් කරමින් පවසා ඇත.
2026 අගෝස්තු 16 දින මාධ්ය නිවේදනයක් නිකුත් කරමින් වෙරිටේ ආයතනය පවසා ඇත්තේ ආණ්ඩුවේ ක්රියාකාරීත්වය සඳහා ජනතා අනුමැතිය පෙබරවාරි මාසයේදී සියයට 65ක්ව පැවැති බවත් එය මැතිවරණයෙන් පසු වාර්තා වූ ඉහළම අගය බවත්ය.
2026 පෙබරවාරි මාසයේ 65%ක් ලෙස පැවති රජයේ අනුමැතිය මේ වන විට 50% දක්වා පහළ ගොස් ඇති අතර එය ප්රතිශත ඒකක 15ක පහළ යෑමක් බවත් පවසා ඇත. එමෙන්ම රජයේ ක්රියාකාරීත්වය අනුමත නොකරන බව ප්රකාශ කළ පිරිසද පෙර වටයේ පැවති 15%ක පමණ මට්ටමේ සිට 31.40% දක්වා ඉහළ ගොස් තිබෙනවා.
රටේ වත්මන් ආර්ථික තත්ත්වය සම්බන්ධයෙන්ද ජනතා මතය සැලකිය යුතු ලෙස වෙනස් වී ඇත. මීට පෙර 57%ක් ලෙස පැවති ආර්ථික තත්ත්වය “යහපත්” හෝ “විශිෂ්ට” බවට පැවති දැක්ම මේ වන විට 38% දක්වා පහළ ගොස් තිබෙනවා. ඒ අතර, රටේ වත්මන් ආර්ථික තත්ත්වය “දුර්වල” බව පවසන පිරිස 55.59%ක් දක්වා ඉහළ ගොස් ඇත.
එසේම ආර්ථිකය ඉදිරියේදී යහපත් අතට හැරෙනු ඇතැයි විශ්වාස කළ පිරිසගේ ප්රතිශතය මීට පෙර 64%ක්ව පැවති අතර එය මේ වන විට 41.63%ක් දක්වා පහළ ගොස් ඇත. ඒ අනුව ආර්ථිකයේ ඉදිරි දැක්ම සම්බන්ධයෙන් ජනතා විශ්වාසයේ සැලකිය යුතු පහළ යෑමක් දක්නට ඇත. ආර්ථිකය වඩාත් නරක අතට හැරෙමින් පවතින බව පවසන පිරිසද 40.29%ක් දක්වා ඉහළ ගොස් ඇත.
මේ අතර සමස්ත තෘප්තිමත්භාවයද පෙර පැවති 59%ක මට්ටමේ සිට 38% දක්වා පහළ ගොස් ඇති බව සමීක්ෂණයේ දත්ත මඟින් පෙන්වා දී ඇත.
ආර්ථිකයේ ඉදිරි දැක්ම සහ වත්මන් ආර්ථික තත්ත්වය පිළිබඳ ජනතා ප්රතිචාර මත සකස් කරන ආර්ථික විශ්වාස දර්ශකයද නැවතත් සෘණ අගයකට පැමිණ ඇති අතර 2025 පෙබරවාරි මාසයෙන් පසු ධන කලාපයේ පැවති එම දර්ශකය නවතම සමීක්ෂණ වටයේදී සෘණ 8ක් දක්වා පහළ ගොස් ඇත.
නවතම සමීක්ෂණය සඳහා දිවයින පුරා විසිරී සිටින ශ්රී ලාංකික වැඩිහිටියන් 2,013 දෙනෙකුගෙන් සමන්විත බහු-පියවර නියැදියක් භාවිත කර ඇති බවත් දත්ත 2026 ජූලි 11 සිට 30 දක්වා කාලය තුළ රැස්කර ඇති බවත් නිවේදනයේ දක්වා ඇත. සමීක්ෂණයේ ප්රතිඵල අනුව ආණ්ඩුවේ ජනතා අනුමැතිය පහළ යාමත් සමඟ ආර්ථිකය පිළිබඳ ජනතා විශ්වාසයද නැවතත් සෘණ දිශාවකට ගමන් කර ඇති බව සමීක්ෂණ දත්ත පෙන්වා දෙයි.
