ශ්රේෂ්ඨාධිකරණයේ සහ අභියාචනාධිකරණයේ විනිසුරුවරුන්ගේ විශ්රාම වයස ඉහළ නැංවීම සඳහා යෝජිත ආණ්ඩුක්රම ව්යවස්ථා සංශෝධනය (22 වැනි සංශෝධනය) සම්පූර්ණයෙන් හා විධිමත්ව අධ්යයනය කිරීම හා වාර්තාවක් ඉදිරිපත් කිරීම සඳහා සියලු පාර්ශ්වයන් නියෝජනය වන සුදුසු කමිටුවක් පත් කරන ලෙස ශ්රී ලංකා නීතිඥ සංගමය අධිකරණ අමාත්ය හර්ෂණ නානායක්කාරගෙන් ඉල්ලා සිටියි. ඒ, ජුලි 16 වැනි දින, නීතිඥ සංගමයේ සභාපති රජීව් අමරසූරියගේ හා ලේකම් නලින් ද සිල්වාගේ අත්සනින් ඇමතිවරයා වෙත යවන ලද ලිපියක් මගිනි.
ශ්රී ලංකා නීතිඥ සංගමයේ විධායක කමිටු සාමාජිකයන්, ජ්යෙෂ්ඨ ජනාධිපති නීතිඥවරුන් සහ නීති වෘත්තියේ ජ්යෙෂ්ඨ සාමාජිකයන්ගෙන් සමන්විත නියෝජිත පිරිසකට මෙම කරුණ සම්බන්ධයෙන් අමාත්යවරයා හමුවී සාකච්ඡා කිරීම සඳහා අවස්ථාවක් ලබා දෙන ලෙසද එම ලිපියෙන් වැඩිදුරටත් ඉල්ලා තිබේ. ප්රධාන පාර්ශ්වකරුවන් සමඟ පුළුල් ලෙස සාකච්ඡා කිරීමෙන් තොරව ඉහළ අධිකරණ විනිසුරුවරුන්ගේ විශ්රාම යාමේ වයස දීර්ඝ කිරීම සඳහා යෝජිත ආණ්ඩුක්රම ව්යවස්ථා සංශෝධනය, ඉදිරියට නොගන්නා ලෙසද සංගමය ඉල්ලා සිටියි.
වයස දීර්ඝ කිරීමේ යෝජනාව සුවිශේෂ ආණ්ඩුක්රම ව්යවස්ථාමය වැදගත්කමක් පිළිබඳව වන කරුණත් බවත්, එයින් අධිකරණයේ ස්වාධීනත්වයට, යුක්තිය පසිඳලීමේ ක්රියාවලියට හා නීතියේ පාලනයට ප්රබල බලපෑම් ඇතිකරන බවත් සංගමය කියයි. පුළුල් නීති වෘත්තික ප්රජාව, අධිකරණයේ සාමාජිකයන් මෙන්ම දෙස් විදෙස් ප්රකට නීතිවේදීන් හා ප්රමුඛ නීතිඥ සංවිධාන මේ පිළිබඳව දක්වා ඇති බරපතළ අවධානය ගැන සැලකිල්ල යොමුකරන ලෙසද එම ලිපියෙන් ඉල්ලා සිටියි.
මෙවැනි සංශෝධනයක් ගෙනෙන්නේදැයි තහවුරු කරගැනීමට පැහැදිලි කිරීමක් ඉල්ලා මාර්තු 30 වැනිදා තම සංගමය අධිකරණ අමාත්යවරයා වෙත ලිපියක් යොමු කළ බවත්, ඊට කිසි ප්රතිචාරයක් නොලැබුණු නිසා, මැයි 25 වැනිදා ජනාධිපති අනුර කුමාර දිසානායක වෙතද ලිපියක් යොමු කරමින් එවැනි ඕනෑම යෝජනාවකට එරෙහිව නීතිඥ ප්රජාවගේ ස්ථාවරය පැහැදිලි කළ බවත් නීතිඥ සංගමය පෙන්වා දෙයි. එම ලිපි දෙකටම මෙතෙක් කිසිදු ප්රතිචාරයක් හෝ නිල නිරීක්ෂණයක් රජයෙන් ලැබී නොමැති බවද එහි සඳහන් වේ.
මෑතකදී අධිකරණ දෙකෙහිම අනුමත විනිශ්චය මණ්ඩලය වැඩිකිරීම හරහා අධිකරණයේ හැකියාව හා වැඩ ප්රමාණයට අදාළ ගැටලුවලට ප්රමාණවත් විසඳුම් ලැබී ඇත. එනිසා, විනිසුරුවරුන්ගේ විශ්රාම වයස වෙනස් කිරීම සඳහා පෙනීයන ආකාරයේ ආයතනික අවශ්යතාවක් නොමැති බව නීතිඥ සංගමය තර්ක කරයි.
නීතිඥ සංගමය තවදුරටත් කියන්නේ, ඉහළ අධිකරණවල දැනට සේවයේ නියුතු විනිසුරුවරුන්ගේ ධුර කාලය දීර්ඝ කිරීම පමණක් අරමුණු කරගත් ඕනෑම ආණ්ඩුක්රම ව්යවස්ථා සංශෝධනයක අරමුණ හා පෙළඹවීම පිළිබඳව අනිවාර්යයෙන්ම ප්රශ්න මතුවනු ඇති බවයි. එමඟින් අධිකරණයේ ස්වාධීනත්වය පිළිබඳ මහජන විශ්වාසය හෑල්ලුවනු ඇති බවයි. එම මහජන විශ්වාසය ගොඩනැගී ඇත්තේ, සැබැවින්ම අධිකරණය ස්වාධීන වන නිසා මෙන්ම, එය කිසි බලපෑමක්, අනුග්රහයක් හෝ අනුගතවීමකින් තොරව සම්පූර්ණයෙන්ම නිදහස්ව පවතින්නේය යන විශ්වාසය මතය.
‘ඉහළ අධිකරණවලට බලපාන ව්යවස්ථා සංශෝධන තාවකාලික තත්ත්වවලට ප්රතිචාරයක් වශයෙන් (ad-hoc) හෝ හදිසි ක්රියාමාර්ගයක් හැටියට හෝ නොකළ යුතුය. එවැනි වැදගත් සංශෝධන හඳුන්වා දිය යුත්තේ ආයතනික වශයෙන් පෙන්වා දිය හැකි අවශ්යතාව, විනිවිද පෙනෙන මහජන සාධාරණීකරණයක් හා පාර්ශ්වකරුවන්ගේ පුළුල් මෙන්ම යුක්තියුක්ත උපදෙස් විමසීමක් සහිතව පමණි. ආණ්ඩුක්රම ව්යවස්ථාව අනුව පාලනය වීම පිළිබඳ මහජන විශ්වාසය රඳා පවතින්නේ, සංශෝධනයේ අන්තර්ගතය මත පමණක් නොවේ. ඒ සඳහා අනුගමනය කරන ක්රියාවලියද මතය.
මෙම යෝජනාවට පෙර නොවූ විරූ විරෝධයක් එල්ලවී තිබේ. එම අවධානය නීතිඥ සංගමයටත් එහා විහිද ගිය එකකි. අධිකරණයේ සාමාජිකයන්, හිටපු විනිසුරුවරුන්, ජ්යෙෂ්ඨ නීතිඥයන්, ප්රකට විද්වතුන් සහ පිළිගත් ජාත්යන්තර නීති සංවිධානවලින් විරෝධය එල්ල වී ඇත.’ නීතිඥ සංගමයේ ලිපියෙහි සඳහන් වේ.
ජූලි 14 වැනිදා පැවැති කැබිනට් මණ්ඩල රැස්වීමේදී මෙම යෝජනාව සම්බන්ධයෙන් අවසන් තීරණයක් ගැනීමට පෙර අධිකරණ අමාත්යාංශයේ නිරීක්ෂණ ඇතුළත් වාර්තාවක් ඉදිරිපත් කරන ලෙස කැබිනට් මණ්ඩලය අධිකරණ ඇමතිවරයාට දැනුම් දී ඇත. එසේ නම් එම ක්රියාවලිය තුළ සියලුම ප්රධාන පාර්ශ්වකරුවන්ගේ අදහස් පිළිබිඹු වන බව සහතික කරන ලෙස නීතිඥ සංගමය අමාත්යාංශයෙන් ඉල්ලා සිටී.
‘දශක ගණනාවක් අනුප්රාප්තික රජයන් යටතේ යුක්තිය පසිඳලීමේ ක්රියාවලියට බලපාන ව්යවස්ථාදායක හා ප්රතිපත්තිමය ක්රියා ගැන ශ්රී ලංකා නීතිඥ සංගමයෙන් උපදෙස් විමසීම අධිකරණ අමාත්යාංශයේ ස්ථාපිත පිළිවෙතයි. නීතියේ ආධිපත්යය, අධිකරණයේ ස්වාධීනත්වය හා යුක්තිය පසිඳලීමේ නිසි ක්රියාවලිය තහවුරු කිරීම වෙනුවෙන් නීතිඥ සංගමයට ඇති අඛණ්ඩ වගකීම එයින් පෙන්නුම් කෙරේ.’ සංගමය කියයි.
ඉදිරි පියවර ගැනීමට පෙර, මෙම යෝජනාව පුළුල් ලෙස අධ්යයනය කිරීම සඳහා අධිකරණ අමාත්යාංශය, අධිකරණය, ශ්රී ලංකා නීතිඥ සංගමය සහ අනෙකුත් අදාළ පාර්ශ්වකරුවන්ගේ නියෝජිතයන්ගෙන් සමන්විත කමිටුවක් පත් කරන ලෙස ශ්රී ලංකා නීතිඥ සංගමය ඉල්ලා ඇත. මෙම කරුණ සාකච්ඡා කිරීම සඳහා අධිකරණ අමාත්යවරයා සමඟ සාකච්ඡාවක්ද ඔවුන් ඉල්ලා ඇති අතර, අර්ථවත් සාකච්ඡා නිම වන තෙක් ඉදිරි පියවර නොගත යුතු බවද සඳහන් කර ඇත.
