මේ වන විට විපක්ෂයේ දේශපාලන කණ්ඩායම් ඉදිරි මැතිවරණ ඉලක්ක කර ගනිමින් සන්ධාන ගොඩනගමින් ඉන්නවා. ඒ වගේම ආණ්ඩුවේ දේශපාලන පක්ෂ අතර වගේම පක්ෂ අභ්‍යන්තරයේත් යම් යම් බෙදීම් ඇතිවෙලා තියෙනවා. මෙන්න මේ දේශපාලන සංකීර්ණ බව ඔබ කොහොමද විග්‍රහ කර ගන්නේ.
රටේ ඇතිවෙලා තියෙන ආර්ථික අර්බුදයත් එක්ක දේශපාලන ව්‍යාකූලත්වයක් ඇතිවෙලා තියෙනවා. ඒකට විසඳුම් සොයන්න වැඩපිළිවෙළවල් එක් එක් පක්ෂ ඉදිරිපත් කරනවා. ඔවුන් ඒ විදියට වැඩපිළිවෙළවල් ඉදිරිපත් කළාට කවුරුත් අමාරු වෙලාවේ භාර ගත්තේ නැහැ. ඒ නිසා දේශපාලන න්‍යාය පත්‍රවලට ඕනෑ විදියට සන්ධාන හැදෙනවා. නමුත් රටේ න්‍යාය පත්‍රයට අනුව හැදෙන දේශපාලන සන්ධානය හැදෙන්නේ වර්තමාන ජනාධිපතිතුමා එක්ක.
වර්තමාන ජනාධිපතිතුමා එක්ක සන්ධාන හැදෙනවා කිව්වාට වර්තමාන ජනාධිපතිව පත් කරවපු ශ්‍රී ලංකා පොදු ජන පෙරමුණේම ඉන්න, ආණ්ඩු පක්ෂයේ අසුන් ගන්න මන්ත්‍රීවරු පවා එකඟ නැහැ.
පහුගිය පාර්ලිමේන්තු මැතිවරණයේ දී අනෙකුත් දේශපාලන පක්ෂ ඒ වෙලාවේ තිබුණ වාතාවරණය මත පොහොට්ටුවෙන් තමයි ඡන්දය ඉල්ලුවේ. ඒ නිසා තමයි පොහොට්ටුවට වෙනත් දේශපාලන පක්ෂ හා ස්වාධීන කණ්ඩායම් සම්බන්ධ වෙන්නේ. උදය ගම්මන්පිල, විමල් වීරවංශ වගේ අය හිටියේ වෙනත් දේශපාලන ධාරාවක. ඒ වෙලාවේ තිබුණ රටේ වාතාවරණය තුළ ඒ අය ඒකරාශි වුණේ පොහොට්ටුවත් එක්ක. ඒ නිසා සන්ධානයේ ලකුණ වුණේ පොහොට්ටුව. හැබැයි පොහොට්ටුව කියන්නේ තනි පක්ෂයක්. ඒ නිසා වෙන වෙන කණ්ඩායම් කැඩිලා ගියත් පොහොට්ටුවේ තියෙන දේශපාලන ශක්තිය තවම ගම් මට්ටමේ තියෙනවා.
නාමල් රාජපක්ෂ මන්ත්‍රීවරයා කියන්නේ ඔබ කිව්ව ශ්‍රී ලංකා පොදු ජන පෙරමුණ කියන පක්ෂයේම මන්ත්‍රී කෙනෙක්. ඔහු ඉතාමත් පැහැදිලිව මාධ්‍යයට කියනවා රනිල් වික්‍රමසිංහ ජනාධිපති ගෙන යන වැඩපිළිවෙළ අනුව රටේ ජනතාවට බදු ගැසීම නිසා පීඩාවට පත් කිරීම, රාජ්‍ය සම්පත් විකිණීම වැනි කාරණාවලට විරුද්ධයි කියලා.
පොහොට්ටුවෙන් 69 ලක්ෂයක ඡන්ද ප්‍රමාණයක් අරගෙන දීලා අපි ජනාධිපතිවරයෙක් පත් කර ගත්තා. 64 ලක්ෂයක ඡන්දයක් අරගෙන පාර්ලිමේන්තුවේ තුනෙන් දෙකක බලයක් අරගත්තා. නමුත් ඒ වෙලාවේ තිබුණ වාතාවරණය උඩ මිනිස්සු අපි කෙරෙහි තියලා තිබුණ විශ්වාසය නැති වුණා. අපි ගත්ත සමහර තීන්දු වැරදියි. ගත්ත තීන්දු මිනිසුන්ට ප්‍රායෝගික වුණේ නැහැ. කොවිඩ් වසංගතයෙන් පස්සේ ආව තත්වයට විකල්ප වැඩසටහන් නොකිරීමේ ප්‍රතිඵලයක් හැටියට මිනිස්සු අපිව ප්‍රතික්ෂේප කළ නිසා ජනාධිපති අගමැති ඇතුළු සියලු දෙනාම ඉවත්වෙලා ගියා.
ඊට පස්සේ අපි යෝජනා කළා ඕනෑම කෙනෙකුට ඇවිත් රට භාර ගන්න කියලා. ඒ වෙලාවෙදි මේ රට භාර ගත්තේ රනිල් වික්‍රමසිංහ මහත්තයා. එතුමා අගමැති කළේ, ජනාධිපති කළේ අපි පක්ෂයක් විදියට නායකයෝ එකතුවෙලා ගත්ත තීන්දුවක් හැටියට. එතුමා එක කොන්දේසියයි අපිට දැම්මේ, රට හදන වැඩපිළිවෙළ තුළ දී කකුලෙන් අදින්නේ නැතිව උදව් කරන්න කියලා. ඒක තමයි තිබිච්ච කොන්දේසිය.
අපි ගත්ත සමහර තීන්දු ජනප්‍රිය තීන්දු නෙමෙයි. හැබැයි අපි ඒ තීන්දු අරගෙන රටේ ජනතාව ගැන හිතලා, ඒ තීන්දු අනුව අපි ජනාධිපතිතුමා එක්ක කටයුතු කරගෙන ගියා. ඒකේ ප්‍රතිඵලයක් හැටියට මේ අවුරුදු දෙක තුළ අපි කෙරෙහි අවිශ්වාසයෙන් හිටපු මිනිස්සු තේරුම් ගත්තා මොනව වුණත් අපේ කණ්ඩායමට මේ දේ කරන්න පුළුවන් කියලා. අගමැතිකම්, ජනාධිපතිකම් භාරගන්න කවුරුත් ඉදිරිපත් වුණේ නැති වෙලාවක එතුමා අපිත් එක්ක එකතුවෙලා, රටේ ආර්ථිකය හදලා, ඩොලර් එක ස්ථාවර කරලා අත්‍යවශ්‍ය භාණ්ඩටික ගෙන්වලා, රට යම් තැනකට ගෙනල්ලා තියෙනවා. අයිඑම්එෆ් ණය ටික ගත්තාම අපි විශ්වාස කරනවා රට මීටත් වැඩිය හොඳ තැනකට ඒවි කියලා. මේ දේවල් එක්ක අපිට එතුමා සමග දේශපාලන ගමනක් යාමට පුළුවන්කම තියෙනවා. එහෙම තත්ත්වයකට ගෙන ආවාට පස්සේ එතුමාගේ කකුලෙන් ඇදීම වැරදියි කියලා මම විශ්වාස කරනවා. දැන් ඔය ජනතාව ගැන කතා කරන අය තේරුම් ගන්න ඕනෑ අපි මීට වඩා නරක තැනක හිටියේ කියන දේ.
පෞද්ගලීකරණය රනිල් වික්‍රමසිංහ ජනාධිපතිතුමා විතරක් නෙමෙයි අපේ ආණ්ඩුව කාලෙත් මහින්ද රාජපක්ෂ හිටපු ජනාධිපතිතුමාත් කරලා තියෙනවා. ගෝල්ෆේස් එකේ හමුදා කඳවුර කාටද දුන්නේ? ඒවා පෞද්ගලීකරණය කිරීමක් නෙමෙයිද? ඕනෑම රජයක් හොඳ දෙයක් කරනවා නම් ඒක හොඳයි කියන්න ඕනෑ. ඒ කාලේ හොඳවෙලා දැන් නරක් වෙන්න බැහැනේ. බදු පනවන කාරණයේදී අපිත් කැමතියි ජනතාවට බදු පනවන්නේ නැත්නම්. හැබැයි එහෙමනම් ඒකට විකල්පයක් ඒ අය කියන්න ඕනෑ. විවේචන කරන්න ලේසියි වැඩ කරන්න අමාරුයි. නායකයෝ කියන්නේ අභියෝග භාර අරගෙන අභියෝගවලට මුහුණදීලා ජනතාව වෙනුවෙන් සේවය කරන මිනිස්සු. ඔය කයිය ගහන අය අභියෝග භාර ගන්නෙත් නැහැ, ඒ වෙනුවෙන් කටයුතු කරන්නෙත් නැහැ. ප්‍රතිපත්තිමය වශයෙන් අපි විරුද්ධයි තමයි, ඒකනේ අපි 27 ත් පාරක් රනිල් වික්‍රමසිංහ මහත්තයාව පැරැද්දුවේ. හැබැයි එහෙම පරද්දවපු අපිම ඉල්ලන් කෑවානේ. බදු ප්‍රතිපත්තිය වැරදියි නම් බදු අඩු කරලා අපිට වුණ සෙත මොකද්ද?
පොහොට්ටුවේ ජනාධිපති අපේක්ෂකයා හැටියට රනිල් වික්‍රමසිංහ ඉදිරිපත් කිරීම සුදුසුයි කියලා ඔබ කිව්වාට. පොහොට්ටුවේම අපේක්ෂකයෙක් තමයි ජනාධිපතිවරණය සඳහා ඉදිරිපත් කරන්න ඕනෑ කියලා තව පිරිසක් කියනවා.
පොහොට්ටුවට අයිතියක් තියෙනවා ජනාධිපතිවරණ අපේක්ෂකයෙක් පත් කරන්න. ඒක පක්ෂයේ අයිතියක්. ඒ නිසා පොහොට්ටුවෙන් අපේක්ෂකයෙක් ඉදිරිපත් කරනවානම්, මාධ්‍ය කියන විදියට එතුමා ජනාධිපතිවරණ අපේක්ෂකයා විදියට ඉදිරිපත් වෙනවා කියලා එතුමාට ඒ අයිතිය තියෙනවා. නමුත් එතුමා තවම කියලා නැහැ එතුමා ජනාධිපතිවරණ අපේක්ෂකයා ලෙස ඉදිරිපත් වෙනවා කියලා.
නාමල් රාජපක්ෂ මහතා තමයි ශ්‍රී ලංකා පොදු ජන පෙරමුණේ ජාතික සංවිධායකයා බවට පත් කරන්නෙත්. ඊයේ පෙරේදා සටන අරඹමු හම්බන්තොටින් කියලා සමුළුවකුත් පැවැත්වූවා. බැලූ බැල්මටම පේන්න තියෙනවා ඔහුව ජාතික නායක්ත්වයකට රැගෙන ඒමේ දේශපාලන ව්‍යාපෘතියක් ක්‍රියාත්මක වෙනවා කියලා.
ඕනෑම කෙනෙක් දේශපාලනය කරන්නේ ඉහළට යාමේ දේශපාලන බලාපොරොත්තු ඇතුව. එතුමාට දේශපාලන න්‍යාය පත්‍රයක් තියෙනවා. ඉතින් ඒ දේශපාලන න්‍යාය පත්‍රය තුළ එතුමා කටයුතු කරනවා. මම ඒකේ වැරැද්දක් දකින්නේ නැහැ.
පොදු ජන පෙරමුණේ ජනාධිපති අපේක්ෂකයා ලෙස නාමල් රාජපක්ෂව තෝරා ගත්තොත් ඔබගේ තේරීම මොනවගේ එකක් වේවිද?
මේ ජනාධිපතිවරණයට තරග කරන්න එතුමා වේලාසන වැඩියි. මම මේක එතුමාටත් කියලා තියෙනවා. එතුමාට ඒ තැනට එන්න ඕනෑ තරම් කල් තියෙනවා. හැබැයි ඔහු මේ දේ කළොත් ඔහුට ඒ තැනට ඒමට තියෙන අවස්ථාව නැතිවෙලා යනවා. මොකද පහුගිය කාලයේ වෙච්ච දේවල් එක්ක පොහොට්ටුව එක්කත් රාජපක්ෂ නාමය එක්කත් මිනිස්සුන්ගේ වෛරයක් තියෙනවා. ඒක නිසා මම හිතන්නේ ඔහුට තව කල් තියෙනවා. එතුමාට ඕනෑනම් ඉදිරිපත් වෙන්න පුළුවන්. එතකොට එතුමාටත් යම් පිරිසක් සහයෝගය දේවි. පොහොට්ටුවේම තව කාණ්ඩයකුත් නැති වේවි. ඒකත් ඔහුම බලා ගන්න ඕනෑ.
ඒ කාරණය වගේම පොහොට්ටුව තුළ මතවාදීමය විදියට බෙදිලා ඉන්න කාරණයක් තමයි මුලින් පැවැත්විය යුත්තේ ජනාධිපතිවරණයද පාර්ලිමේන්තු මැතිවරණයද කියන එක. බැසිල් රාජපක්ෂ ඇතුළු පිරිසකගේ අදහස තමයි මුලින් පාර්ලිමේන්තු මැතිවරණයක් පවත්වනවානම් හොඳ බව. ඒ ගැන ඔබටත් පෞද්ගලික මතයක් ඇති.
පක්ෂේ ඇතුළේ කණ්ඩායමක් කියනවා පාර්ලිමේන්තු මැතිවරණයකට යමු කියලා. තවත් කණ්ඩායමක් කියනවා ජනාධිපතිවරණයකට යමු කියලා. හැබැයි මගේ පෞද්ගලික මතය පාර්ලිමේන්තු මැතිවරණයකට ගියොත් පක්ෂයක් විදියට ඒක වාසියි. හැබැයි කිසිම පක්ෂයක් බහුතර බලයක් ලබා ගන්නේ නැති වෙලාවක මුලින් පාර්ලිමේන්තු මැතිවරණයකට ගියොත් දේශපාලන වශයෙන් රට අරාජික වෙනවා. ආර්ථික වශයෙන් රට අරාජික වෙලා ඉන්න වෙලාවක ශක්තිමත් ආණ්ඩුවක් නැත්නම් රටකට ඒක බලපානවා. යුද්දෙ තියෙන වෙලාවේ කරූ ජයසූරිය මහත්තයා එක්ක 13 දෙනෙක් ආණ්ඩුවට ඇවිල්ලා යුද්දේ දිනන්න මහින්ද මහත්තයාට හයියට හිටියා. මේ ආර්ථික අර්බුදය දිනන්නත් හොඳ ශක්තිමත් ආණ්ඩුවක් තියෙන්නෙ ඕනෑ. මම විශ්වාස කරනවා රටේ මිනිස්සු ගැන හිතලා මේ වෙලාවේ ජනාධිපතිවරණයකට යන්න ඕනෑ කියලා.
ජනාධිපතිවරණයක් මුලින් තිබ්බොත් මම විශ්වාස කරනවා රනිල් මහත්තයා දිනයි කියලා. රනිල් වික්‍රමසිංහ මහත්තයා දින්නොත් ඔහුට ආණ්ඩුවක් පිහිටුවන්න ශක්තියක් තියෙන්න ඕනෑ. රනිල් වික්‍රමසිංහ මහත්තයා පැරදිලා වෙන කෙනෙක් දින්නත් ඔහුටත් ආණ්ඩුවක් පිහිටවන්න හයියක් තියෙන්න ඕනෑ. නැත්නම් රටක් ගෙනියන්න බැහැ. රට අරාජික වෙලා අයිඑම්එෆ් එක, වර්ල්ඩ් බෑන්ක් එක අඩියක් පස්සට අරගත්තොත් මිනිස්සුන්ට ආයෙත් පෙට්‍රල් පෝලිම්වල ඉන්න වේවි, බෙහෙත්ටික නැති වේවි. නොයෙකුත් දේවල්වලට මුහුණ දෙන්න වේවි. රට ගැන හිතලා කරනවා නම් ජනාධිපතිවරණයකට යන්න ඕනෑ. පක්ෂය ගැන හිතලා කරනවා නම් පාර්ලිමේන්තු මැතිවරණයකටත් යන්න පුළුවන්.
