No menu items!
22.5 C
Sri Lanka
19 May,2024

ජනතාව සාගින්නේ සිටියදී පොහොට්ටුවෙන් ඩේ‍රජර් යාත්‍රා සාදයක්

Must read

වරාය හා නාවික රාජ්‍ය ඇමති ප්‍රේමලාල් ජයසේකර හෙවත් චොකා මල්ලීගේ ආරාධනයෙන් මැති ඇමතිවරුන් සඳහා ශ්‍රී ලංකා වරාය අධිකාරියට අයත් හංසකාවා නම් ඩේ‍රජර් යාත්‍රාවක් තුළ ජනවාරි 09 දින පැවැත් වූ සාදය මේ වනවිට දැඩි කතා බහට ලක්වී තිබේ. ඒ කරුණු කිහිපයක් නිසාය. එකක් එම ඩේ‍රජර් යාත්‍රා සාදය සඳහා ශ්‍රී ලංකා වරාය අධිකාරිය නම් වූ රාජ්‍ය ආයතනයේ සම්පත් භාවිත කිරීමය. අනෙක රටේ ජනතාව ආර්ථික අතින් ඉතා අසීරු මොහොතක දිවි ගෙවද්දී ජනතාවගේ එම අසීරුතාවට වගකිව යුතු පාලක පක්ෂයක් මහ මුහුදේ පාටි දැමීමය.

ඩේ‍රජර් යාත්‍රාවක් තුළ මහ මුහුදේ දැමූ මෙම පාටිය සම්බන්ධයෙන් වීඩියෝ පටයක් පවා මේ වනවිට සංසරණය වෙමින් පවතින අතර එහි එම ඩේ‍රජර් යාත්‍රාවට මහින්ද රාජපක්ෂ ඇතුළු ශ්‍රී ලංකා පොදු ජන පෙරමුණ සමග කටයුතු කරන මැති ඇමතිවරු ගොඩවන ආකාරයද, එම යාත්‍රාව තුළ හිඳ සතුටු සාමීචියේ යෙදෙමින් විනෝද වන අයුරුද පෙන්නුම් කරයි.
එහෙත් ශ්‍රී ලංකා වරාය අධිකාරියේ මාධ්‍ය අංශය නිල නිවේදනයක් නිකුත් කරමින් සඳහන් කර ඇත්තේ ‘ශ්‍රී ලංකා වරාය අධිකාරිය විවිධ අවස්ථාවලදී විවිධ රාජ්‍ය නායකයින්, ප්‍රභූවරුන්, වෘත්තිකයන්, සේවාලාභීන්, නැව් සමාගම්වල විදේශීය නියෝජිතයින්, මාධ්‍යවේදීන් සඳහා වරාය නැරඹීමටත්, වරාය තුළ සිදුවන සංවර්ධන කටයුතු සම්බන්ධයෙන් වඩාත් නිවාරදි තොරතුරු ලබාදීමත්, තොරතුරු ලබාදීම සඳහා ඇතුළත හා පිටත වරායන්හී නිරීක්ෂණ චාරිකාවන් සංවිධානය කරනු ලබයි.’ බවයි.

ඒ අනුව රාජ්‍ය අමාත්‍ය ප්‍රේමලාල් ජයසේකර විසින් අමාත්‍ය නිමල් සිරිපාල ද සිල්වාගෙන් කරන ලද ඉල්ලීමක් පරිදි ශ්‍රී ලංකා වරාය අධිකාරිය මගින් අමාත්‍යවරුන් හා මන්ත්‍රීවරු පිරිසක් සඳහා කොළඹ වරායේ සිදුවන සංවර්ධන කටයුතු විශේෂයෙන්, වරාය අධිකාරිය මගින් වරාය අධිකාරියේ මුදල් යොදවා ඉදිවන නැගෙනහිර පර්යන්තයේ දැවැන්ත සංවර්ධනයත්, ජේසීටී පර්යන්තයේ සංවර්ධන කටයුතුත්, බටහිර පර්යන්තයේ සංවර්ධන කටයුතු හා අධිවේග මාර්ග පද්ධතියේ සිදුවන සංවර්ධන කටයුතු පිළිබඳ විශේෂ නිරීක්ෂණ චාරිකාවක් මගින් දැනුවත් කිරීමක් සිදුකරන ලද බව හා එයින් පසු ‘හංසකාවා ඩේ‍රජරයෙන්’ පිටත වරාය නිරීක්ෂණ චාරිකාවක් සිදු කෙරුණ බවයි.

මුද්‍රිත හා වි්‍යුත් මාධ්‍ය මගින් මුහුද මැද පාටියක් යනුවෙන් හෙවත් විනෝද සවාරියක් යනුවෙන් එය නිර්වචනය කිරීම වැරදි අර්ථකථනයක් සමාජය වෙත ලබාදීමට උත්සාහ කර ඇති බවත්, ඒ සඳහා ආහාර හෝ වෙනත් කිසිදු වියදමක් ශ්‍රී ලංකා වරාය අධිකාරිය මගින් සිදුකර නොමැති බවත් එම මාධ්‍ය නිවේදනයේ වැඩිදුරටත් සඳහන් වේ.

ශ්‍රී ලංකා වරාය අධිකාරියේ මාධ්‍ය අංශය එසේ සිය රාජ්‍ය ඇමතිවරයා ආරක්ෂා කිරීමේ දේශපාලන කොන්ත්‍රාත්තුවක් බාරගෙන තිබුණද, රාජ්‍ය ඇමති ප්‍රේමලාල් ජයසේකර මාධ්‍ය කළ විමසීම්වලදී ඒ සම්බන්ධයෙන් අදහස් ප්‍රකාශ කිරීම ප්‍රතික්ෂේප කර තිබුණි. එසේ ප්‍රතික්ෂේප කිරීමට හේතුව වෙන කිසිවක් නොව එම සාදය සාධාරණීය කිරීමට ඔහුට කිසිදු හේතුවක් නැති කමය.

රාජ්‍ය ඇමති ප්‍රේමලාල් ජයසේකර මෙම ඩේ‍රජර් යාත්‍රා සාද අවස්ථාව සඳහා සියලු පක්ෂ නියෝජනය කරන සියලුම මැති ඇමතිවරුන්ට ආරාධනා කළාද නැද්ද යන්න පැහැදිලි නැතත්, ඒ සම්බන්ධයෙන් සංසරණය වන වීඩියෝ දර්ශන අනුව පැහැදිලි වන්නේ රාජපක්ෂවරුන් සමග සිටින ශ්‍රී ලංකා පොදුජන පෙරමුණේ මැති ඇමතිවරුන් ඒ සඳහා සහභාගි වී සිටි බවයි. අඩුම තරමේ වරාය අධිකාරිය විෂය අයත් වරාය, නාවික හා ගුවන් සේවා ඇමති නිමල් සිරිපාල ද සිල්වාවත් එහි දක්නට සිටියේ නැත.

වරාය අධිකාරියේ මාධ්‍ය අංශය කියනා ආකාරයට එම වරාය නැරඹුම් අවස්ථාව එකී කොටස් සඳහා සිදුකරන්නක් නම් ඒ සඳහා මැති ඇමතිවරුන්ට ඇරයුම් කළ යුත්තේ රාජ්‍ය ඇමතිවරයා නොව ශ්‍රී ලංකා වරාය අධිකාරියයි. නොඑසේ නම් විෂය භාර ඇමති නිමල් සිරිපාල ද සිල්වායි. එහෙත් මාධ්‍ය නිවේදනයේ පිළිගෙන ඇති ආකාරයටම ඒ සඳහා විෂය භාර ඇමතිවරයාගෙන් රාජ්‍ය ඇමතිවරයා අවසර ගෙන තිබේ. ශ්‍රී ලංකා නිදහස් පක්ෂයේ සාමාජිකයෙක් වන ඇමති නිමල් සිරිපාල ශ්‍රී ලංකා පොදුජන පෙරමුණේ සාමාජිකයන්ට පාටියක් දා ගැනීම සඳහා අවසර ලබාදී ඇති බව ඒ අනුව පෙනේ.

කොහොමත් රාජ්‍ය ඇමති ප්‍රේමලාල් ජයසේකර මාධ්‍ය සංදර්ශන පවත්වමින් කියමින් සිටියේ ඔහුට ලැබී ඇති රාජ්‍ය ඇමති ධුරයට කිරීමට කිසිවක් නැති බවත්, රාජ්‍ය ඇමති ධුරයේ වරප්‍රසාද ලබමින් ඔහු නිකම් සිටින බවත්, එම අමාත්‍යාංශය වංචා දූෂණවලින් ඉවහා ගිය තැනක් බවත්, ඒ සම්බන්ධයෙන් ඉදිරියේදී හෙළිදරව් කිරීමට ඔහු බලාපොරොත්තු වන බවත්ය. ඇමති නිමල් සිරිපාල ද සිල්වාද නොසිටි මෙම මහ මුහුදේ ඩේ‍රජර් යාත්‍රා සාදය ඔහු මහජනතාවට පෙර සිය පක්ෂයේ නායකයා ඇතුළු පිරිසට එම කරුණු හෙළිදරව් කිරීමේ අවස්ථාවක් බවට පත්කර ගත්තාද යන්න දන්නේ නැත.

වරාය අධිකාරියේ මාධ්‍ය නිවේදනයෙන් මෙම ඩේ‍රජර් යාත්‍රා සාදය සඳහා එම අධිකාරියෙන් කිසිදු මුදලක් වැය නොවූ බව කියමින් සාධාරණීකරණය කර තිබුණත් ඩේ‍රජර් යාත්‍රාවක් පණගන්වා යාත්‍රා කිරීමම යනු ඉන්ධන වැයවන ඒ සඳහා මුදල් වැයවන වන කටයුත්තකි. මෙම ඩේ‍රජර් යාත්‍රා යොදා ගන්නේ වරාය තුළ හා වරායෙන් පිටත නැව් එන මාර්ගයේ නියමිත ගැඹුර පවත්වා ගැනීම සඳහා වැලි හා මඩ ඉවත් කිරීමේ කටයුතු සඳහා වන අතර නැව්වල මෙන් ඒවාහී විශාල පිරිසකට එක්වී සාද පැවැත්වීම සඳහා පහසුකම් නිර්මාණය කර නැත. මෙම ඩේ‍රජර් යාත්‍රා සාදය සම්බන්ධයෙන් සංසරණය වන තොරතුරු අනුව එම සාදයට අවශ්‍ය කෑම බීම පමණක් නොව පුටු මේස පවා වරාය අධිකාරියෙන් රාජ්‍ය ඇමතිවරයාගේ නියෝග පරිදි ඇණවුම් කර තිබේ. එහි තේරුම වන්නේ එම සාදය පැවැත්වීම සඳහා පුටු මේස යාත්‍රාවේ අවශ්‍ය ලෙස සකස් කර ඇති බවයි.

ඒ සියලු කටයුතු සඳහා වියදම් කර ඇත්තේ හෝ වියදම් වී ඇත්තේ රාජ්‍ය ඇමති ප්‍රේමලාල් ජයසේකරගේ පෞද්ගලික මුදල් නොව වරාය අධිකාරියේ හෙවත් මහජනතාවගේ මුදල් බව පැහැදිලිය. එසේ නොවේ නම් රාජ්‍ය ඇමතිවරයාද, ඔහු වෙනුවෙන් ස්වෙච්ඡාවෙන් පෙරට පැමිණ ඇති වරාය අධිකාරියේ මාධ්‍ය අංශයද කියනුයේ ඒ සඳහා වැය වූ මුදල් රාජ්‍ය ඇමතිවරයා ගෙවූ බව හෝ ඔහු පසුව ගෙවීමට නියමිත බවයි.

අපට දැන ගන්නට ඇති පරිදි මෙම යාත්‍රාවේ ගමන සඳහා ශ්‍රී ලංකා නාවික හමුදාවේ ආරක්ෂාව එහි යාත්‍රා මගින් සපයා ඇත. එයද පෞද්ගලික කටයුත්තක් සඳහා රාජ්‍යයේ සම්පත් භාවිත කිරීමකි. පෞද්ගලිකව වෙන්කර යන ගමන් සඳහාද මෙම දේශපාලකයින් මුදල් ගෙවන්නේ නැති බවට ඕනෑ තරම් උදාහරණ පසුගිය කාලයේ තිබේ. ඒ සඳහා හොඳම උදාහරණය වන්නේ ශ්‍රී ලංකා ගුවන් හමුදාවේ හෙළිකොප්ටර් ඇතුළු ගුවන් යානා ගමන් වෙනුවෙන් මහින්ද රාජපක්ෂ ඇතුළු රාජපක්ෂවරුනුත්, ඔවුන්ගේ නඩයත් ගෙවීමට ඇති මුදල්ය. අනෙක ඔවුන්ගේ පක්ෂයේ මැතිවරණ කටයුතු වෙනුවෙන් මිනිසුන් ඇද්දවීම සඳහා ශ්‍රී ලංකා ගමනා ගමන මණ්ඩලයට ගෙවීමට ඇති මුදල්ය. තවත් එකක් වන්නේ මැතිවරණ ප්‍රචාරක කටයුතු වෙනුවෙන් විකාශය කළ දැන්වීම් සඳහා ශ්‍රී ලංකා රූපවාහිනී සංස්ථාවට ගෙවීමට ඇති මුදල්ය.

ඒ අනුව ගත් කල තමන්ගේම නොවන තමන්ගේ අනුගාමිකයෙකුගේ මෙම මහ මුහුදේ යාත්‍රා සාදය රටට කෙසේ වෙතත් රාජපක්ෂවරුන්ට නම් සොච්චම් දෙයක් බව පැහැදිලිය.
ඒ නිසා අවශ්‍ය වන්නේ රාජ්‍ය සම්පත් සිය පෞද්ගලික අභිලාෂයන් සඳහා අවභාවිතා කරන මෙම දූෂිත දේශපාලන සංස්කෘතිය අවසන් කිරීමේ පමණක් නොව එම දූෂිත සංස්කෘතිය යළි ඇති වීමට නොහැකි ලෙස තිත තැබීමේ සමාජ දේශපාලන ව්‍යාපාරයක්ය. එය ඇති කිරීමේ හැකියාව ඇත්තේද මේ රටේ මහජනතාවටමය.

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි