‘ලැබෙන්නට සලස්වා ඇති තොරතුරුවලට අනුව, සමාගම සතුව ටැංකි ලොරි 182ක් පමණක් තිබූ අතර සමාලෝචිත වර්ෂය අවසානයේදී සත්‍ය ලොරි රථ රියදුරන්ගේ සංඛ්‍යාව 222ක් විය. තවද, පසුගිය කාල සීමාව තුළ ටැංකි ලොරිවල සැබෑ භාවිතය ඉතා සීමිත විය. ඒ අනුව ලොරි රථ රියදුරන්ගේ බහුතරයක් අක්‍රීයව සිට ඇත. මේ අනුව ඵලදායි සේවාවක් ලබා නොගෙන අතිරික්ත ටැංකි ලොරි රියදුරන් පිරිසක් නඩත්තු කිරීමට සමාගම සැළකිය යුතු මුදලක් වැයකර ඇති බවද නිරීක්ෂණය විය.’ මේ බව සඳහන් වන්නේ ලංකා ඛනිජ තෙල් තොග ගබඩා පර්යන්ත සමාගම විසින් පාර්ලිමේන්තුවට ඉදිරිපත් කර ඇති 2021 වාර්ෂික වාර්තාවේ ඇතුලත් විගණකාධිපතිවරයාගේ වාර්තාවේය.
තොග ගබඩාවලට, ලංකා ඛනිජ තෙල් නීතිගත සංස්ථාව සහ ලංකා අයිඕසී සමග ලියාපදිංචි වූ අලෙවි නියෝජිතයන්ට සහ පාරිභෝගිකයන්ට ඛනිජ තෙල් නිෂ්පාදන බෙදා හැරීම ලංකා ඛනිජ තෙල් තොග ගබඩා පර්යන්ත සමාගමේ ප්‍රධාන ව්‍යාපාරික කටයුත්ත වන අතර ඒ සඳහා එම සමාගමටම අයත් බවුසර් 147ක් සහ සමාගම සමග ලියාපදිංචි කුලී බවුසර් 653ක් සහිත බවුසර් ඇණියක් පවත්වාගෙන ගොස් ඇත.
ඒ සම්බන්ධයෙන් සිය නිරීක්ෂණ ඉදිරිපත් කරමින් විගණකාධිපතිවරයා සඳහන් කරන්නේ සමාගම සතු බවුසර් සැළකිය යුතු ප්‍රමාණයක් ප්‍රශස්ත ලෙස භාවිතා කර නැති බවයි. මාසයක කාලයක් සඳහා සිදුකරන ලද විගණන පරීක්ෂණයට අනුව අදාළ මාසය තුළ සමාගම සතු බවුසර් 147න් බවුසර් 47ක්ම එක බෙදා හැරීමක් සඳහා හෝ යොදාගෙන නැත. තවද සමාගම සතු බවුසර් භාවිතය ධාරිතාවෙන් අඩකට වඩා අඩුවෙන් හෙවත් දිනකට 50 සිට 79 දක්වා සීමා කර තිබී ඇත.
එසේ වුවද 2022 මැයි 02 දින ඉන්ධන බෙදා හැරීම සඳහා සමාගම සතුව තිබූ බවුසර් සියල්ලම සේවයේ යොදවා ඇති බවත්, එයට හේතුව එදින පැවති වෘත්තීය සමිති ක්‍රියාමාර්ගයක් හේතුවෙන් පුද්ගලික බවුසර් හිමියන් සමාගමට බවුසර් ඉතා සුළු ප්‍රමාණයක් පමණක් ලබාදී තිබීම බවත් විගණනය සඳහන් කරයි. ඒ අනුව සමාගම සතු බවුසර් උපරිම ප්‍රමාණයට භාවිත කළ හැකිව තිබියදී පුද්ගලික බවුසර් හිමියන්ට වැඩි අවස්ථාවක් ලබාදීමේ අරමුණින් සමාගමේ බවුසර් භාවිතය අවම කර ඇති බව විගණකාධිපතිවරයාගේ නිරීක්ෂණය වෙයි.
සමාගම සතු බවුසර් එසේ ප්‍රශස්ත ලෙස භාවිත කර නොතිබුණද, එම බවුසර් ඇණිය නඩත්තු කිරීම සඳහා ස්ථාවර පොදු කාර්ය පිරිවැය සහ එහි රියදුරන් සහ රිය සහායකවරුන් සඳහා වන වැටුප්, වේතන හා අනෙකුත් දීමනාද, වාහන බලපත් ගාස්තු ආදී වියදම් සමාගම විසින් පූර්ණ ලෙසින් දරා තිබේ. පුද්ගලික බවුසර් තෝරා ගැනීමේදී රජයේ ප්‍රසම්පාදන මාර්ගෝපදේශ අනුගමනය කර නොතිබුණ බවද, එහි විනිවිදභාවය අතිශය ගැටළු සහගත බවද විගණකාධිපතිවරයා සඳහන් කරයි.
2022 ජනවාරි මස කුලී බවුසර් භාවිතා කිරීමේදී දින 21කට වඩා බවුසර් 64ක්ද, දින 16-20 අතර බවුසර් 230ක්ද, දින 11-15 අතර බවුසර් 130ක්ද, දින 6-10 අතර බවුසර් 52ක්ද, දින 5කට වඩා අඩුවෙන් බවුසර් 48ක්ද, භාවිතා කර නැති බවුසර් 129ක්ද හඳුනාගෙන ඇත. මේ නිසා පුද්ගලික බවුසර් සඳහා ඉන්ධන බෙදා හරින ගමන් වාර ලබාදෙන රටාව හෝ පදනම පැහැදිළිව හඳුනාගැනීම ව්‍යාකුළ වූ බව විගණන වාර්තාව සඳහන් කරයි.
මෝටර් වාහන ණය, නිවාස ණය, ආපදා ණය, සකසුරුවම් සමිති ණය, විශේෂ ණය, බාධක ණය, අත්තිකාරම් ආදී ලෙස සමාගම සිය සේවා නියුක්තිකයන්ට විවිධ ණය යෝජනා ක්‍රම කිහිපයක් හඳුන්වා දී ඒවා පවත්වාගෙන ගොස් ඇති අතර 2021 වර්ෂය අවසානයේ අය විය යුතු මුළු ණය ශේෂය රුපියල් බිලියන 3.359ක් වී ඇත. එම ණය ලබාදීම් සම්බන්ධයෙන් සිය නිරීක්ෂණ ඉදිරිපත් කරමින් විගණකාධිපතිවරයා සඳහන් කරන්නේ සැළකිය යුතු ණය කළඹක් හඳුන්වා දී පවත්වාගෙන ගොස් තිබුණද, සේවක ණය කළමනාකරණය සඳහා නිසි මූල්‍ය ප්‍රතිපත්තියක් ස්ථාපිත කර නොතිබුණ බවයි.
එමෙන්ම ඒ සම්බන්ධයෙන් වැඩිදුරටත් විගණකාධිපතිවරයා සඳහන් කරන්නේ සමාගම සතුව ප්‍රමාණවත් අරමුදල් නොමැතිකම හේතුවෙන් ඉන්ධන ටැංකිවල ගබඩා ධාරිතාව සහ නළ මාර්ග ඇතුළු බෙදාහැරීමේ මාර්ග වැඩි දියුණු කිරීම වැනි ඉතා හදිසි සහ වැදගත් ප්‍රාග්ධන වැඩි දියුණු කිරීමේ කටයුතු පවා ප්‍රමාද වී හෝ කල් දමා ඇති බවත්, එය කාර්ය මණ්ඩලය වෙනුවෙන් විශාල ණය ප්‍රමාණයක් පවත්වාගෙන යෑම නිසා සිදුවී ඇති බවයි. එසේම සේවකයින්ට අසීරුතා ඇති නොකර එම ගැටළු මගහරවා ගැනීම සඳහා අදාළ ණය යෝජනා ක්‍රමය වාණිජ බැංකුවක් හෝ මූල්‍ය ආයතනයක් වැනි බාහිර මූලාශයකට ලබා දීම සලකා බලන මෙන් විගණන හා කළමනාකරණ කමිටුව විසින් නිර්දේශ ඉදිරිපත් කර තිබුණද ඒ පිළිබඳ සමාගම නිසි ක්‍රියාමාර්ග ගෙන නොතිබුණ බවයි.
සේවක ණය පහසුකම් සැපයීම සඳහා නිසි ප්‍රතිපත්තියක් හෝ ප්‍රතිසාදන සැළැස්මක් ස්ථාපිත කර පවත්වාගෙන ගොස් නොතිබුණ බවත්, ප්‍රධාන ණය ගොනුවක් නිසි පරිදි නඩත්තු කර නොතිබුණ බවත්, එහි ප්‍රතිඵලයක් ලෙස ඉල්ලා අස්වූ හෝ විශ්‍රාම ගිය සේවා නියුක්තිකයන් නොගෙවූ හෝ ඔවුන්ගෙන් අයකර නොගත් ණය මුදල් නොගෙවූ ණය හෝ අයකරගත නොහැකි ණය ලෙස සඳහන් කර තිබූ බවයි. එසේම ණය ආපසු ගෙවීම පැහැර හැරීමට එරෙහිව නීතිමය ක්‍රියාමාර්ග ගැනීමටද පියවර ගෙන නැති බවයි. එහි ප්‍රතිඵලයක් ලෙසින් 2021 වර්ෂය අවසානයේ පැහැර හරින ලද ණය ශේෂය රුපියල් මිලියන 41.44ක් වී ඇති බවයි. චක්‍රලේඛ වලට අනුව ලංකා ඛනිජ තෙල් සංස්ථාවේ ණයවල මාසික වාරික වෙනත් අඩු කිරීම් සමග සියයට 50ක් ඇතුලත තිබිය යුතු වූවත් එයට අනුකූලව කටයුතු කර නැත.
මුළු සේවක සංඛ්‍යාව වන 2638න් ණය ලබාගෙන නැත්තේ සේවකයන් 93 දෙනෙකු පමණී. වාරිකය ලෙස මූලික වැටුපෙන් සියයට 40කට වඩා ගෙවීමට ණය ලබාගෙන ඇති පිරිස 924ක් වන අතර මූලික වැටුපෙන් සියයට 40 සිට 70 දක්වා වාරික ගෙවීමට ණය ලබාගෙන ඇති පිරිස 1594ක් වේ. මූලික වැටුපෙන් සියයට 75 සිට 99 දක්වා වාරික ගෙවීමට ණය ලබාගෙන ඇති පිරිස 24ක් වන අතර මූලික වැටුපෙන් සියයට 100ට වඩා වාරික ගෙවීමට ණය ලබාගෙන ඇති පිරිස 3කි.
සේවකයින් 1335ක් හෙවත් මුළු සේවක පිරිසෙන් සියයට 50කට වඩා වැඩි පිරිසක් ඔවුන්ගේ මූලික වැටුපෙන් සියයට 75කට වඩා අතිකාල වැඩ කිරීමෙන් ආදායම් උපයා ඇති අතර සේවකයන් 988ක් මූලික වැටුපෙන් සියයට 100කට වඩා අතිකාල ආදායමක් උපයා ඇත. සේවකයන් 210 ක් ඔවුන්ගේ මූලික වැටුපෙන් සියයට 200කට වඩා අතිකාල ආදායමක් උපයා ඇති අතර සේවකයන් 19 දෙනෙකු මූලික වැටුපෙන් සියයට 300ට වඩා අතිකාල අදායමක් උපයා ඇත.
