No menu items!
23.3 C
Sri Lanka
20 April,2024

වැඩ බලන්නට හෝ දේශබන්දුට දිය හැකිද?

Must read

හිටපු පොලිස්පති සී.ඩී. වික්‍රමරත්න පොලිස්පති ධුරයෙන් විශ්‍රාම ගැනීමට නියමිතව තිබුණේ පසුගිය මාර්තු මස 25 වනදාය. එහෙත් ජනාධිපතිවරයා ඔහුට මාස 3ක සේවා දිගුවක් ලබාදෙන්නට කටයුතු කළ අතර එම කාලය අවසන්වූ පසුව පසුගිය ජූලි මස 9දා සිට ක්‍රියාත්මක වන පරිදි ඔහුට තවත් මාස 3ක සේවා දිගුවක් හිමිවිය. මෙම දෙවන සේවා දිගුව අවසන් වනවිට හෝ ජනාධිපතිවරයාට නව පොලිස්පති කෙනෙකුන් පත් කරන්නට බැරිවුණ අතර ඒ අනුව තෙවන වරටත් සී.ඩී. වික්‍රමරත්න මහතාට තවත් සති 3ක සේවා දිගුවක් හිමි විය. එම සති තුනක කාලය ඉකුත්වන විටද තත්ත්වය එසේම තිබුණ අතර ඒ අනුව පසුගිය ඔක්තෝබර් 13දා ඒ මහතාට සිව්වන සේවා දිගුවත් හිමිවිය. ඒ තවත් සති තුනක කාලයක් සඳහාය. ඒ අනුව ඒ මහතාගේ සේවා කාලය නොවැම්බර් 24 දායින් අවසන් විය.

මේ අතරතුර කාලයේ නව පොලිස්පතිවරයා බවට ජේ්‍යෂ්ඨ නියෝජ්‍ය පොලිස්පති දේශබන්දු තෙන්නකෝන් මහතා පත් කළ යුතු බවට ජනාධිපතිවරයාට ඒත්තු ගැන්වීමට මහජන ආරක්ෂාව පිළිබඳ අමාත්‍ය ටිරාන් අලස්, පාර්ලිමේන්තු මන්ත්‍රී වජිර අබේවර්ධන වැනි අය විශාල මෙහෙයුමක් ක්‍රියාත්මක කරමින් සිටියෝ ය. එම උත්සාහය සමග කාදිනල් හිමි, සිවිල් සංවිධාන සහ පුද්ගලයන් විශාල ප්‍රමාණයක් චෝදනා තිබෙන පුද්ගලයෙකු පොලිස්පති ධුරයට පත් කිරීමෙන් වළකින්නැයි ජනාධිපතිවරයාගෙන් ඉල්ලා සිටීමට කටයුතු කළේය. එම ඉල්ලීම් ඝෝෂාව සමග දේශබන්දු තෙන්නකෝන් මහතා පොලිස්පති කිරීම තාවකාලිකව හකුලා ගන්නට ආණ්ඩුවට සිදුවිය.

එහෙත් අවසානයේ පසුගිය 29 දා ජේ්‍යෂ්ඨ නියෝජ්‍ය පොලිස්පති දේශබන්දු තෙන්නකෝන් මහතා වැඩ බලන පොලිස්පතිවරයා ලෙස පත් කරන්නට ජනාධිපතිවරයා විසින් කටයුතු කරනු ලැබීය. මෙම පත් කිරීමත් සමග බොහෝ දෙනෙකු ප්‍රකාශ කරන්නේ සී.ඩී. වික්‍රමරත්න මහතාගේ කාලයේ අභාවයට ගිය පොලීසිය නව වැඩ බලන පොලිස්පතිවරයා පත් කිරීමත් සමග තාර්කික අවසානයකට ළඟාවෙනු ඇති බවය. එය එසේ විය හැකිද?

ඉතිහාසයේ ප්‍රථම වතාවට චෝදනා විශාල ප්‍රමාණයක් තිබෙන උසස් පොලිස් නිලධාරියෙකු මෙන්ම පසුගිය අරගලය අවස්ථාවේ ජනතා ප්‍රහාරයට ලක්වූ පොලිස් නිලධාරියෙකු වැඩබලන පොලිස්පතිවරයා බවට පත්වී ඇත. 1971 ඉපදුණු දේශබන්දු තෙන්නකෝන් මහතාට 2031 වර්ෂය තෙක් සක්‍රිය පොලිස් සේවයේ කටයුතු කළ හැකිය. ඒ අනුව ඔහු බොහෝදුරට මෙම තත්ත්වය තුළ නිත්‍ය පොලිස්පතිවරයා බවට පත්වන්නට තිබෙන ඉඩකඩ වැඩිය. අඩුම වශයෙන් ජනාධිපති වික්‍රමසිංහගේ ඉතිරි ධුර කාලය තුළ හෝ ඔහු වැඩබලන පොලිස්පතිවරයා සේ කටයුතු කරනු ඇත. එම තත්ත්වය තුළ මෙම පොලිස් නිලධාරියාගේ පොලිස් ඉතිහාසය සැකවින් හෝ දැනගෙන සිටීම හොඳය.

වැඩබලන පොලිස්පතිවරයාට විරුද්ධව නැගෙන ප්‍රධාන චෝදනාව වන්නේ, ඔහු දැනුවත් කර තිබියදීත් පාස්කු ප්‍රහාරය වළක්වා ගැනීම සඳහා කටයුතු නොකළ බවය. පාස්කු ප්‍රහාරය පිළිබඳ ජනාධිපති කොමිෂන් වාර්තාවේ සිංහල පරිවර්තනයේ 350 වෙනි පිටුවේ ඔහු පිළිබඳව මෙසේ සඳහන් වෙයි. ‘ඔහු හුදෙක් පණිවිඩකරුවෙක් ලෙස පමණක් කටයුතු කර ඇති අතර ඔහුගේ රාජකාරිය ඉටුකිරීමට අපොහොසත් විය. ඒ අනුව ඔහුට විරුද්ධව විනය පරීක්ෂණයක් පැවැත්විය යුතු බව පරීක්ෂණ කොමිසම තීරණය කරයි‘

2019 අප්‍රේල් 11 දින එවක බස්නාහිර පළාත භාර ජේ්‍යෂ්ඨ නියෝජ්‍ය පොලිස්පති නන්දන මුණසිංහ තමන් යටතේ සිටි බස්නාහිර උතුර භාර නියෝජ්‍ය පොලිස්පති දේශබන්දු තෙන්නකෝන්, කොළඹ දිසාව භාර නියෝජ්‍ය පොලිස්පති ලලිත් පතිනායක, බස්නාහිර දකුණ භාර නියෝජ්‍ය පොලිස්පති වසන්ත වික්‍රමසිංහ, කළුතර දිසාව භාර නියෝජ්‍ය පොලිස්පති ජී.ඕ. පෙරේරා යන අයට සහරාන් ඇතුළු තව්හිත් ජමාත් ත්‍රස්තවාදී සංවිධානයෙන් කතෝලික පල්ලි ඉලක්ක කරගනිමින් ප්‍රහාර මාලාවක් එල්ලවි හැකියැයි අනතුරු අඟවා, ක්‍රියාත්මක වන්නට නියෝග හතරක් ලබාදී ඇත. එහෙත් ඔහු එහිදී එම ලිපිය තම පහළ නිලධාරීන්ට යැවීම පමණක් සිද්ධ කර ඇත.

මේ පිළිබඳව පොලිස් විශේෂ විමර්ශන ඒකකය එස්.අයි.යූ 108/2019 යටතේ රාජකාරිය පැහැර හැරීම පිළිබඳව විමර්ශනයක් සිදුකර ඇත. ඒ අනුව එම විමර්ශනයේදී දේශබන්දු තෙන්නකෝන් මහතා වැරදිකරුවෙකු බවට තීරණය කර චෝදනා පත්‍රයක් ලබාදීමට නිර්දේශ නිකුත් කර ඇත. පසුව මෙම චෝදනා පත්‍රය මහජන ආරක්ෂාව පිළිබඳ අමාත්‍යාංශයට ගියත් එතැනින් එහාට එය ක්‍රියාත්මක වී නැත.

පසුගිය 2022 ජූලි 09 වෙනිදා ජනාධිපති මන්දිරයට ඇතුල් වූ අරගලකරුවන් සොයාගත් මුදල් රුපියල් ලක්ෂ 178.5ක මුදල එම අරගලකරුවන් කොටුව පොලීසියට භාර දෙන්නට කටයුතු කළ අතර එම අවස්ථාවේදී කොටුව පොලීසියේ ස්ථානාධිපතිවරයාට දූරකථනයෙන් අමතන දේශබන්දු තෙන්නකෝන් මහතා එම මුදල් මහජන ආරක්ෂාව භාර අමාත්‍ය ටිරාන් අලස්ට ගෙනිහින් දෙන්න යැයි ප්‍රකාශ කර ඇත. එම අවස්ථාවේදී ඒ පිළිබඳව කොටුව පොලීසියේ ස්ථානාධිපතිවරයා රාජකාරි සටහන් යොදා ඇති අතර පසුව එම සිදුවීම අධිකරණයට වාර්තා කරනු ලැබීය.

ඒ අනුව එම සිදුවීම පිළිබඳව විශේෂ විමර්ශනයක් සිදුකරන පොලිස් විශේෂ විමර්ශන ඒකකය එහි වාර්තාව පොලිස්පතිවරයා වෙත යවමින් චෝදනාපත්‍රයක් ලබාදෙන්න යැයි නිර්දේශ නිකුත් කර ඇත. මෙම විශේෂ විමර්ශනය යන කාලය තුළදී එම ඒකකයේ අධ්‍යක්ෂකවරයා සේ කටයුතු කළ වික්‍රමසිංහ මහතා තමාට එල්ල වූ තර්ජනයක් ගැන අධිකරණයට, වින්දිතයන් ආරක්ෂා කිරීමේ දෙපාර්තමේන්තුවට සහ පොලිස්පතිවරයාට කරුණු වාර්තා කර ඇත. ඉන්පසුව එම තර්ජනය පිළිබඳව එස්.අයි.යූ 340/2022 යටතේ විමර්ශනයක් සිදුකර ඊට අදාළව චෝදනා පත්‍රයක් ලබාදෙන ලෙස පොලිස්පතිවරයාට නිර්දේශ නිකුත් කර ඇත.

ඉන්පසුව, සීඅයිඩීයේ හිටපු අධ්‍යක්ෂ විශ්‍රාමික ජේ්‍යෂ්ඨ පොලිස් අධිකාරී ශානී අබේසේකර මහතාට වින්දිතයන් ආරක්ෂා කිරීමේ දෙපාර්තමේන්තුව ආරක්ෂාව ලබාදෙන්න යැයි නියෝග කර තිබියදී, එම නියෝග පැහැර හැරි බවට දේශබන්දු තෙන්නකෝන් මහතාට චෝදනා එල්ලවෙන අතර ඒ පිළිබඳවද විශේෂ විමර්ශනයක් එස්.අයි.යූ 575/2022 යටතේ සිදුකර චෝදනා පත්‍රයක් ලබාදෙන්නට යැයි නිර්දේශ නිකුත් කර ඇත.

පුදුමයට කරුණ වන්නේ මේ කිසිදු අවස්ථාවක එකුදු නිර්දේශයක් හෝ ක්‍රියාත්මක වී නොතිබීමය. වැඩබලන පොලිස්පතිවරයාට ඉහළ දේශපාලන බලාධිකාරියේ සහාය උපරිමයෙන් ලැබෙන බවට හොඳම නිදර්ශනය මෙය බව ප්‍රකාශ කළ හැකිය.

මෙවැනි නිලධාරියෙකු වැඩබලන පොලිස්පති බවට පත් කරන්නට හේතුවූ සුවිශේෂ කරුණු මොනවාද? ජේ්‍යෂ්ඨත්වයට අනුව පමණක් පොලිස්පති ධුරය සඳහා සුදුසු අනෙක් නිලධාරීන් දෙදෙනාටද පාස්කු ප්‍රහාරය වළක්වා නොගැනීම යන චෝදනාව එල්ලවන විට එම ධුරාවලියේ තුන්වෙනි තැන සිටි දේශබන්දු තෙන්නකෝන් මහතා වෙත වැඩ බලන පොලිස්පති ධුරය ලැබෙන්නේ ඔහු අනෙක් දෙදෙනාට වඩා ජනාධිපතිවරයට සහ ආණ්ඩුවට හිතවත් නිසාද? පාස්කු ප්‍රහාරය වළක්වා නොගැනීම පිළිබඳව නැගෙන චෝදනාව එල්ල නොවෙන මෙම ජේ්‍යෂ්ඨතා ධුරාවලියේ හතරවැනි ස්ථානයේ සිටින ප්‍රියන්ත වීරසූරිය මහතාගේ නම පොලිස්පති ධුරයට සලකා නොබැලුවේ ඇයි? මෙම ප්‍රශ්නවලට ජනාධිපතිවරයා හෝ ආණ්ඩුව උත්තර ලබාදිය යුතුය.

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි