■ ඉඳුවර බණ්ඩාර
යුද හමුදාපති ජෙනරාල් ශවේන්ද්ර සිල්වා ජුනි මස 01 වැනිදා සිට ක්රියාත්මක වන පරිදි හදිසියෙන්ම එම ධුරයෙන් විශ්රාම ගැන්වීම ඔහුගේ සේවා දිගු නීත්යනුකූලව සිදුවී නැති තත්වය තුළ ඒ සම්බන්ධයෙන් නීතිමය අභියෝගයක් එල්ලවේ යන පදනම මත සිදුවී ඇති එකක් බව වාර්තාවේ.
යුද හමුදාපති ශවේන්ද්ර සිල්වාට ලබාදී ඇතැයි කියන සේවා දිගු සම්බන්ධයෙන් වන ගැසට් නිවේදන නැති බව හා එම තත්වය තුළ ඔහුගේ හමුදාපති තනතුරේ කටයුතු නීත්යනුකූල නොවන බව අනිද්දා පුවත්පත වාර්තා කළ අතර එය සමාජය තුළ ආන්දෝලනයකට ලක්විය.
ඒ සම්බන්ධයෙන් අනිද්දා පුවත්පතට සෘජු පිළිතුරක් නොදෙමින් ආරක්ෂක අමාත්යාංශය නිවේදනයක් නිකුත් කරමින් සඳහන් කළේ ඔහුගේ සේවා දිගු නීත්යානුකූලව සිදුවී ඇති බවයි.
එම සේවා දිගුවලට අදාල ගැසට් නිවේදන ඉල්ලා අනිද්දා පුවත්පතේ නියෝජ්ය කර්තෘ ලසන්ත රුහුණගේ තොරතුරු දැනගැනීමේ පනත යටතේ ආරක්ෂක අමාත්යාංශය, ජනාධිපති කාර්යාලය හා යුද හමුදාවට ඉල්ලුම්පත් යොමු කර ඇතත් ඒ සඳහා මෙතෙක් පිළිතුරු ලබාදී නැත.
මේ තත්වය මත යුද හමුදාපතිවරයාගේ ධුරය නීත්යානුකූල නොවන බවට අධිකරණ ක්රියාමාර්ගයක් ගැනීමේ කටයුතුද සිදුවෙමින් පැවතුණි.
මැයි 20 වැනිදා සිරස රූපවාහිනිය විකාශය කළ ප්රශ්න 10ක් වැඩසටහනට එක්වූ ශවේන්ද්ර සිල්වාගෙන් කවදා තෙක් ධුරයේ සිටින්නේදැයි කළ විමසුමට පිළිතුරු වශයෙන් ප්රකාශ කළේ ජනාධිපතිවරයා ලබාදුන් කාලය තවදුරටත් ඔහුට තිබෙන බැවින් ධුරයේ කටයුතු කරන බවයි. එසේ වුවද ඉන් සතියක් යන්නටත් ප්රථම ඔහුව ධුරයෙන් විශ්රාම ගන්වන බව නිවේදනය කර ඇත.
යුද හමුදාපතිවරයාගේ උපන් දනය යෙදෙන දිනය ජුනි මස 22ට යෙදී තිබෙන අතර එදිනට ඔහුට අවුරුදු 58ක් සැපිරේ. යුද හමුදාපති ධුරයෙන් විශ්රාම ගැන්වුවද ඔහු ආරක්ෂක මාණ්ඩලික ප්රධානී ධුරයේ තවදුරටත් කටයුතු කරන බව වාර්තවේ.
මේ අතර අපගේ යුද හමුදා ආරංචි මාර්ග සඳහන් කරන්නේ ශවේන්ද්ර සිල්වා යුද හමුදාපති ධුරයෙන් විශ්රාම ගත්තද ආරක්ෂක මාණ්ඩලික ප්රධානියා ලෙස නිල නොවන ආකාරයට කටයුතු කරනු ඇති බවය. ඒ සඳහා හේතුව වශයෙන් සඳහන් කරන්නේ නව යුද හමුදාපතිවරයා වශයෙන් නම්කර ඇති යුද හමුදා මාණ්ඩලික ප්රධානී මේජර් ජෙනරාල් විකුම් ලියනගේ ශවේන්ද්ර සිල්වා නියෝජනය කළ ගජබා රෙජිමේන්තුවේ සාමාජිකයකු ලෙස කටයුතු කිරීමත්, යුද හමුදාව තුළ ඔහු පිළිගැනීමට ලක් වූවකු නොවීමත්ය.■
